ایراني رسنیو خبر ورکړی، چې د طالبانو د بهرنیو چارو وزیر امیرخان متقي به راتلونکی اوونۍ دغه هېواد ته سفر وکړي.
سرچینو د یاد سفر موخه، ایراني چارواکو سره پر دوه اړخیزو اړیکو او د کابل او تهران پر ګډو ګټو خبرې بللې دي.
تر اوسه د طالبانو حکومت په دې اړه څه نه دي ویلي.
د یادونې ده، چې متقي څه موده وړاندې قطر ته هم په یو رسمي سفر تللی وو.
د پاکستان د بهرنیو چارو وزیر اسحاق ډار نن د طالبانو حکومت له بهرنیو چارو وزیر امیرخان متقي سره ټیلفوني خبرې کړې.
د پاکستان بهرنیو چارو وزارت ویلي، چې دواړو لورویو پر دوو اړخیزو اړیکو او د سیمې پر سولې بحث کړی.
امیرخان متقي یو وار بیا اسحاق ډار ته بلنه ورکړې چې کابل ته سفر وکړي.
دا په داسې حال کې ده چې د کشمیر تر برید وروسته پاکستان غواړي د ځان لپاره سیمه کې دوستان زیات کړي.
د متحده عربي اماراتو راغلي ځانګړي استازي سیف محمد الکتبي ویلي، چې کابل کې باید د یاد هېواد سوداګرو او پانګهوالو ته یو کنفرانس جوړ شي.
سیف محمد الکتبي د طالبانو حکومت د ریاست الوزرا له اقتصادي مرستیال ملا عبدالغني برادر سره کتنې کې ویلي، چې هېواد یې د اوسپنې پټلۍ او سړکونو برخه کې پانکونې ته لېواله دی.
بل لورته بیا ملا برادر ویلي، چې دوی له طبیعي سرچینو ډک هېواد لري او «اسلامي امارت» هڅه کوي چې په دې برخه کې پانګونه جذب کړي.
رویټرز خبري اژانس خبر ورکړی، چې د هند کشمېر کې تر برید وروسته؛ اوس نېلم درې کې کورونه او بېړۍ په اویا سلنه تخفیف خرڅلاو ته وړاندې شوي.
سرچینه زیاتوي، اوس مهال هلته د سیلانیانو ورتګ کم شوی او د ازاد کشمېر لوري ته د سیلانیانو یو مهم ځای تړل شوی.
سرچینې دغه راز رویټرز ته ویلي، چې د دغه سیمې اقتصادي حالات پر ګرځندوی ولاړ دی؛ خو تر برید وروسته هلته هر څه پیکه شوي.
بل لورته پاکستاني لوري هم کورنیو، د بېړیو او هوټلونو څښتنانو ته د احتیاط سپارښتنه کړې.
پروان کې یو پخواني نظامي د بد اقتصادي وضعیت له کبله ځان وژنه کړې.
یو شمېر سرچینو ویلي، چې دا سړی جبل السراج ولسوالۍ د صفيخېل ګلبهار اوسېدونکی وو.
د معلوماتو له مخې، د نوید په نوم دغه پخوانی سرتېري د نظام له پاشل کېدو وروسته ایران او ترکیې ته هم تللی وو.
د یادونې ده، چې اوس مهال په افغانستان کې بند پخواني نظامي کسان له سختو ستونزو سره لاس او ګرېوان دي.
پخواني ولسمشر حامد کرزي ویلي، پاکستان باید د وسلو پر ځای پر علمي او فرهنګي مراکزو د افغاني شخصیتونو نومونه کېږدي.
نوموړي ویلي، پاکستان یو وار بیا د ابدالي په نوم یو بالیستیک توغندی ازمایلی او له بده بخته، چې تر دې وړاندې یې هم د غزنوي او غوري په نومونو توغندي ازمایلي؛ خو افغان کډوالو سره بیا ناوړه چلند کوي.
د کرزي په خبره، افغانان له پاکستان څخه د ښه ګاونډیتوب پر بنیاد د محترمانه اړیکو غوښتونکي دي.
د یادونې ده، چې پاکستان د ابدالي په نوم بالیستک توغندي څو ورځې وړاندې ازمایلی وو.
د طالبانو حکومت د اوبو او انرژۍ وزارت سرپرست، عبداللطیف منصور د چین له سفیر سره د لیدنې پر مهال له بیجینګ څخه غوښتي، چې په ارزګان او پکتیا کې د برېښنا پروژو په تطبیق کې مرسته وکړي.
دواړو لوریو همداراز د کاپیسا د باغدرې برېښنا بند او د بامیان د ۲۰ میګاواټه لمریزې برېښنا پروژې په اړه خبرې کړې.
په دې لیدنه کې د چین سفیر ژاو شینګ ژمنه کړې چې دغه پروژې به ژر پیل شي او چین به خپلې همکارۍ لا پراخې کړي.
د بلخ ولایت د طالبانو ولایت مقام په یوه اعلامیه کې له ټولو خلکو، په ځانګړي ډول د طالبانو له غړو او مسوولینو غوښتي چې خپلې بېسنده وسلې، زغروال وسایط او تور ښیښهلرونکي موټرونه د دې ولایت د پولیسو قومندانۍ د ډایاک مدیریت ته تسلیم کړي.
اعلامیه کې ویل شوي چې دا اقدام د طالبانو د مشر ملا هبتالله اخندزاده د حکم پر اساس ترسره کېږي.
همداراز یادونه شوې چې هغه طالب غړي چې تصفیهیې تایید شوې، کولای شي وسلې د ثبت لپاره د ډایاک ادارې ته راوړي.
د طالبانو چارواکو خبرداری ورکړی چې هغه وسایط او وسلې چې ثبت نه وي، په تلاشۍنقطو کې به کس درول کېږي او وسله به یې ضبط کېږي.
همداراز، په موټرونو کې د غیر ضروري انتنونو، نظامي نښو او علایمو نصب منع اعلان شوی دی.
دا په داسې حال کې ده چې په دې وروستیو کې وسله والې غلاوې او چریکي بریدونه زیات شوي دي.
د پاکستان پیپلز ګوند مشر بلاول بوټو زرداري د ملي اسمبلۍ غونډې ته په خپله وینا کې د هند له خوا د اندوس د اوبو تړون ځنډول په کلکو ټکو غندلي او دا یې د بشریت ضد جنایت بللی.
هغه ویلي چې هند د اوبو سیاسي کول پیل کړي، چې د ملیونونو خلکو عاید ته ګواښ پېښوي او دا کار یې د هند لیونتوب یاد کړی.
نوموړي ادعا کړې چې پاکستان د ترهګرۍ په برخه کې د هند ښکېلتیا ثابته کړې.
هغه له هند غوښتي، چې ترهګري پرېږدي او د ترهګرۍ پر ضد له پاکستان سره همکاري وکړي، که نه نو راتلونکي نسلونه به یې سخت تاوان وویني.
ملګرو ملتونو کې د پاکستان استازي اسیم افتخار ویلي، چې کشمير د پاکستان او هند ترمنځ اصلي شخړه ده او باید د کشميري خلکو د ارمانونو مطابق حل شي.
افتخار ویلي، چې پاکستان د پاهلګام په سیمه کې د وروستي ترهګریز برید سره هېڅ تړاو نه لري او له نړیوالې ټولنې د همکارۍ غوښتنه کوي تر څو په شفافه توګه د پېښې پلټنه وشي.
هغه زیاته کړې چې پاکستان د ترهګرۍ په وړاندې په نړیوالې مبارزې کې له ۹۰ زره نه زیاتې قربانۍ ورکړې دي.
نوموړي د هند لخوا د انډس د اوبو تړون ځنډولو باندې هم اندېښنه ښودلې او دا یې د نړیوالو قوانینو نقض بللی.