د مولانا حمیدالحق سیاسي ځای ناستي مولانا عبدالحق ثاني ویلي، ژمنه کوي، چې پاکستان کې به اسلامي نظام نافذ کړي.

هغه د خپل پلار د جنازې مراسمو کې ویلي، پاکستان د هیچا شخصي ملکیت نه دی او دوی به په کې اسلامي نظام نافذوي.

نوموړي ویلي، « پاکستان زمونږ دی او مونږ به د خپلو شهیدانو د وینو انتقام اخلو.»

هغه په دې اړه څه نه دي ویلي، چې دا د چا کار دی؛ خو ژمنه یې کړې، چې غلی به پاتې نه شي.

د یادونې ده، چې حمیدالحق حقاني د جمعې په ورځ په یوځانمرګي برید کې له خپلو نورو ملګرو سره یو ځای د اکوړه خټک په حقاني مدرسې کې ووژل شو.

د افغانستان لپاره د پاکستان پخواني ځانګړي استازي اصف دراني ویلي، چې پاکستان د خپلې ګټې لپاره د مجاهدینو مشرانو ته پاکستاني پاسپورټونه ورکړي وو.

دراني له آمو ټلویزیون سره په خبرو کې ویلي، چې برهان الدین رباني، احمدشاه مسعود او عبدالرب رسول سیاف او د هغوی کورنۍ پاکستاني پاسپورټونه درلودل.

نوموړي دغه راز زیاته کړې، چې طالبان له امریکا سره د یوې هوکړې له مخې واک ته ورسول شول او اوس له پاکستان سره یوازې د ټي ټي پي په سر مشکل لري.

اصف دراني د هغې پوښتنې ځواب هم په “هو” ورکړی، چې طالبان او مجاهدین دواړه اسلام اباد واک ته رسولي.

هغه دغه راز زیاته کړې، چې که طالبان د افغانستان ثبات او د سیمې امنیت ته پام ونه کړي، نو له منځه به لاړ شي.

د ازادۍ جبهې د روژې مبارکې میاشتې کې یو طرفه اوربند اعلان کړی دی.

یادې ډلې ویلي، ترهغې یې چې سرتېرو ته ستونزه نه وي؛ نو دوی به پر طالبانو برید ونه کړي.

دوی زیاته کړې، چې د افغانستان وضعیت له نږدې څاري او د طالبانو له لوري د خلکو د ځورولو په صورت کې شرایطو ته په کتو عمل کوي.

ازادۍ جبهې په یوې اعلامیې کې هیله څرګنده کړې، چې د افغانستان خلک په ارام زړه د روژې مبارکه میاشت تېره کړي.

د ایران په سراوان سیمه کې د افغان کډوالو څخه ډک یو موټر چپه شوی دی.

د ایران د زاهدان ښار د پیښو او تازه حوادثو ته د رسېدو مدیر علي عبدالرازق نژاد ویلي، په دې موټر کې ۱۴ تنه کډوال سپاره وو، چې یو تن پکې وژل شوی او ۱۳ نور ټپیان دي.

یاده پیښه وړمه ورځ رامنځته شوې ده او ایراني چارواکو ویلي، چې د کډوالو د قاچاقي شبکو له امله په دې ډول پېښو کې زیاتوالی راغلی دی.

د پاکستان د بهرنیو چارو وزارت ویاند شفقت علي خان ویلي چې د تورخم دروازه د طالبانو له خوا د پاکستان خاورې دننه د پوستې د جوړولو د هڅو له امله تړل شوې ده.

پاکستاني چارواکو ویلي چې د دې سرحد د پرانیستلو لپاره له طالبانو سره خبرې شوې، خو تر اوسه بې‌نتیجې پاتې شوې دي.

د طالبانو حکومت د تورخم کمېسار، عبدالجبار حکمت ویلي، چې پاکستان د افغان لوري د تاسیساتو په غبرګون کې د تورخم دروازه بنده کړې ده.

پاکستاني چارواکي وايي چې د تورخم دروازې تړل کېدو سوداګرو ته شاوخوا ۱۲ میلیونه ډالر زیان رسولی دی.

د یادونې ده چې د تورخم دروازې د تړل کېدو له امله د ترانسپورټ ستونزې زیاتې شوې او ګڼ شمېر سوداګر او مسافر سرګردانه شوي دي.

د کرېکټ ملي لوبډلې پیاوړي لوبغاړي نوین الحق د اوږې عملیات کړی دی.

د افغانستان کرېکټ بورډ ویلي، ملي لوبغاړي نوین الحق په انګلستان کې د اوږې عملیات کړي او بریالي پای ته رسېدلي دي.

کرېکټ بورډ زیاته کړې، چې هغه به له دریو تر څلورو اونیو په استراحت کې وي.

د امریکا د بهرنیو چارو وزیر مارکو روبیو ویلي، چې زیلنسکي باید د خپلو خبرو په اړه بښنه وغواړي.

نوموړی وایي، هیڅ پکار نه وه، چې زیلنسکي هلته لاړ شي او د یو دوښمن په څېر چلند وکړي.

د هغه په خبره، زیلنسکي د سولې د خبرو په لټه کې نه دی او هلته یې هم غوښتل، چې د سولې په اړه د ټرمپ هڅې ناکامې کړي.

د روبیو په خبره، له پایلو پرته د زیلنسکي ټولې غوښتنې منل د بایډن د ادارې کار وو.

د امریکا متحده ایالاتو د ملي اطلاعاتو مدیره تولسي ګابارد له ټرمپ او ونس مننه کړې، چې د اوکراین د جګړې پر پای ته رسېدو یې ټینګار کړی.

هغې ویلي، چې زیلنسکي څوکاله مسلسل هڅه وکړه، ترڅو امریکا د اوکراین په اټومي جګړه کې ښکېله کړي؛ خو ټرمپ او ونس په دې اړه یو واضح دریځ ونیوو.

د یادونې ده، چې د امریکا ولسمشر، مرستیال ولسمشر او زیلنسکي ترمنځ بحث کې امریکايي لوري واضح ویلي، چې دوی نور د دغې جګړې اوږدول نه غواړي.

د روسیې د بهرنیو چارو وزارت ویاندې ماریا زاخاروا وايي، چې ټرمپ د زیلنسکي پر وړاندې له احتیاط کار واخیست او فزیکي چلند یې ونه کړ.

نوموړې ویلي، دا د زیلنسکي تر ټولو لوی دروغ وو، چې ویلي وو، هېواد یې په ۲۰۲۲ کال کې له هر ډول مالي ملاتړ پرته جګړه وکړه.

د زاخاروا په خبره، دا چې ټرمپ او جي‌ډي ونس د هغه پر وړاندې فزیکي چلند ونه کړ؛ نو د احتیاط معجزه باید وبلل شي.

د یادونې ده، چې سپینه ماڼۍ کې د ټرمپ، د هغه د مرستیال او زیلنسکي ترمنځ لفظي شخړه رامنځته شوه، چې له کبله یې زیلسنکي له سپینې ماڼۍ څخه له خبري کنفرانس پرته ووت.

تحریک طالبان پاکستان ډلې پر اکوړه خټک حقانیه مدرسې برید د پاکستان د څارګرې ادارې یا ای ایس ای کار بللی.

یادې ډلې یوې اعلامیه کې دا برید غندلی او ویلي یې دي، چې دا برید د علماوو او مذهبي مشرانو د خاموشه کولو لپاره ترسره شوی.

اعلامیه کې ویل شوي، چې مولانا سمیع الحق د طالبانو ملاتړ کاوه او د دولتي فشارونو باوجود یې د هغوی پر خلاف فتوا ورکول نه منل، چې له همدې امله وژل شوی.

ټي‌ټي‌پي دغه راز خبرداری ورکړی چې دا ډول بریدونه به د دیني علماوو آواز چوپ نه کړي، بلکې د حق داعیان به لا نور پیاوړي شي.