د پاکستان د پوځ مطبوعاتي څانګې (ISPR) د «مارکه حق» په نوم د عملیاتو په اړه د هند سره د وروستیو نښتو معلومات خپاره کړي دي.
د دوی په وینا، د “بنیانالمرصوص” په نوم د پوځي عملیاتو پر مهال ۱۱ پوځیان، چې ۶ یې د پوځ او ۵ د هوايي ځواک غړي وو، وژل شوي دي.
یادې ادارې زیاته کړې، چې په دغه نښتو کې د هند له لوري د بېدلیله بمبارۍ له امله ۴۰ تنه ملکیان، چې ښځې او ماشومان هم پکې شامل دي، هم وژل شوي دي.
هندي چارواکي ادعا کوي چې په پاکستاني خاوره کې د ترهګرو مرکزونه نړول شوي او ګڼ ترهګر وژل شوي.
د امریکا ولسمشر ډونالد ټرمپ ویلي، کېدای شي د روسیې او اوکراین ترمنځ د مستقیمو خبرو لپاره د پنجشنبې په ورځ ترکیې ته سفر وکړي.
نوموړي هیله څرګنده کړې چې له دې ناستې به ښه نتیجه ترلاسه شي.
د روسیې ولسمشر ولادیمیر پوتین وړاندیز کړی چې دا خبرې دې استانبول کې د سولې د ټینګېدو په موخه وشي.
زلنسکي هم ویلي چې چمتو دی له پوتین سره د پنجشنبې په ورځ وګوري.
ترکیه د دواړو لورو د سولې د خبرو کوربهتوب ته چمتووالی ښودلی؛ خو اروپايي مشران تر خبرو مخکې د ۳۰ ورځني اوربند غوښتنه کوي.
د امریکا د فدرالي تحقیقاتو ادارې (FBI) ته هدایت شوی چې له دې وروسته باید د خپلو منابعو یوه مهمه برخه د ناقانونه مهاجرت پر وړاندې مبارزې ته ځانګړې کړي.
رویټرز د څلورو باوري سرچینو له قوله راپور ورکړی چې د FBI په وروستیو داخلي غونډو کې مامورینو ته سپارښتنه شوې چې نږدې درېیمه برخه د خپل کاري وخت له دې وروسته د مهاجرتي دوسیو څېړلو ته ځانګړې کړي.
د دې نوي پالیسي له مخې، د اقتصادي فساد او مالي جرمونو څېړنې، په ځانګړي ډول د سپین پوستو او شتمنو کسانو په اړه، تر ۲۰۲۵ کال پورې ځنډول کېږي.
ویل کېږي دا پرېکړه د ولسمشر دونالد ټرمپ د نوې ستراتیژۍ یوه برخه ده، چې هدف یې د ناقانونه مهاجرت پر وړاندې مبارزه ده.
د اندونیزیا پوځ اعلان کړی چې د دغه هېواد په لوېدیځه برخه کې د زړو مهماتو په یوه زېرمه کې چاودنه شوې، چې له امله یې لږ تر لږه ۱۳ تنه وژل شوي چې ۴ پوځیان هم پکې شامل دي.
دا چاودنه د جاوا په ښار کې هغه مهال شوې، کله چې پوځیانو د زړو مهماتو د شنډولو هڅه کوله.
د اسوشېټډ پرېس د راپور له مخې، د چاودنې دقیق لامل تر اوسه نه دی څرګند، او پوځ یې په اړه پلټنې کوي.
د اینبيسي نیوز د راپور له مخې، د امریکا ولسمشر ډونالډ ټرمپ د خپلې ولسمشرۍ دورې لومړی بهرنی سفر پرون د سعودي عربستان له ریاض ښار څخه پیل کړ.
ټاکل شوې چې نوموړی له سعودي وروسته قطر او متحده عربي اماراتو ته هم سفر وکړي.
ټرمپ دا سفر «تاریخي» بللی او ویلي یې دي چې د سیمې د امنیت او ثبات لپاره مهم بحثونه به ترسره کړي.
ټرمپ به د منځني ختیځ له مشرانو سره د غزې جګړې، له ایران سره د احتمالي مذاکراتو او پراخو سوداګریزو اړیکو په اړه خبرې وکړي.
هغه مخکې له دې، په سپینه ماڼۍ کې ویلي و: «موږ د سعودي عربستان، متحده عربي اماراتو، قطر او نورو هېوادونو امنیت تضمینوو.»
د جمهوریت د کورنیو چارو امنیتي مرستیال جنرال خوشال سادات وایي، کابل کې د شهید اونۍ یا احمدشاه مسعود ورځې په پلمه د یو کیلي موټرو، اسلحو او مخدره موادو قاچاق ترسره کېده.
د پخواني جمهوریت دغه جنرال چې د ډیوه پتنګ په ایکس سپیس کې خبرې کولې، وویل چې احمد مسعود نه پیژني او نه یې ورسره خبرې شوي.
هغه د شمال ټلوالې د مجاهدینو پر یو شمیر قومندانانو تور ولګوه چې له ازبکستان څخه یې د شرابو کاروبار کوه.
د هند لومړي وزیر نریندرا مودي ویلي، چې وینې او اوبه یوځای نشي بهېدلی.
هغه ویلي، له پاکستان سره به یوازې د ترهګري په اړه خبرې کوي او بس.
نوموړي خپل ملت ته وینا کې ویلي، چې پر پاکستان یې بریدونه د لنډ مهال لپاره ځنډولي او دی به د د غه هېواد کړنې وڅاري، چې که بیا یې ترهګري نه لاس وانخیست؛ نو دوی به ورسره حساب کتاب وکړي.
مودي تر دې وړاندې هم ویلي و، چې پاکستان باید له ترهګري لاس واخلي.
د پخواني ولسمشر حامد کرزي د دفتر مشر کریم خرم ویلي، چې لوېدیځ هېوادونه د خپلو جنګي جنایتونو د پټولو لپاره تاریخ خپله لیکي او د افغانانو غږونه د توطیې تیورۍ په نوم بدناموي.
نوموړي په خپله تازه تبصره کې د BBC هغه رپوټ ته اشاره کړې چې پکې بریتانوي عسکرو د افغانستان او عراق په جګړو کې د ملکي خلکو، حتی ماشومانو، د وژنې اعتراف کړی دی.
خرم زیاتوي، چې پخوا به هر هغه چا چې د لوېدیځ پر سیاستونو نیوکه کوله، د طالبانو، پاکستان، یا ایران ملاتړی بلل کېده.
هغه دا هم ویلي، د بګرام زندان د ملاتړ په خاطر ځینو افغان چارواکو د امریکایي چارواکو دفاع کوله، حال دا چې وروسته د امریکا کانګرس د خپلو پټو زندانونو د شکنجو پلټنه وکړه.
خرم دغه راز ویلي، یو شمېر اجیرو رسنیو او سیاستوالو د لوېدیځو قوتونو ظلمونه پټول.
باوري سرچینو رویټرز ته ویلي چې د سوریې ولسمشر احمد شرع هڅه کوي، چې د امریکا د ولسمشر ډونالد ټرمپ پام د هغه د منځني ختیځ د سفر پر مهال جلب کړي.
شرع ټرمپ ته وړاندیز کړی چې په دمشق کې د “ټرمپ برج” جوړ کړي، له اسرائیل سره اړیکې عادي کړي او امریکا ته د سوریې د نفتو او ګازو منابعو ته لاسرسی ورکړي.
د راپور له مخې، د انرژۍ شرکت مشر جاناتان بس د شرع سره کتلي او هڅه کوي د ټرمپ د منځني ختیځ د سفر پر مهال د دوی لیدنه تنظیم کړي.
رویټرز لیکلي، که څه هم د ټرمپ او شرع لیدنه ناممکنه ښکاري؛ خو ټاکل شوې چې د ټرمپ د سفر پر مهال یو لوړپوړی ملاقات د امریکایي او سوریایي چارواکو ترمنځ ترسره شي.
تر «جنرال» مبین وروسته طالبانو خپل یو بل خواخوږی بشیر احمد حنفي هم نیولی.
ښاغلی حنفي چې په ټولنیزو رسنیو کې په ځانګړي ډول په ټیک ټاک کې دیني مسایل بیانوي او د طالبانو حکومت ملاتړی دی په هلمند کې طالب استخباراتو نیولی دی.
د نوموړي نږدې ملګري وایي، بشیر حنفي له هغه وروسته نیول شوی چې د افغانو نجونو پرمخ د زده کړو د مرکزونو پرانیستل یې غوښتي وو.