ملګرو ملتونو یو وار بیا له اسرائیل غوښتي چې غزې ته د مرستو رسولو اجازه ورکړي.
د یاد سازمان ویاند سټیفن دوجاریک وایي، په داسې حال کې چې غزه کې دوه میلیونه وګړي، خوراکي توکو، درملو او برېښنا ته اړتیا لري؛ خو اسرائیل ورباندې مرستې بندې کړې دی.
هغه غوښتته کړې چې دا بندیز باید پای ته ورسیږي.
د سوریې نوي حکومت د یاد هېواد دموکراتیک ځواکونو سره تړون لاسلیک کړ.
د دغه تړون پر اساس به یاد ځواکونه د احمد الشرع تر مشري لاندې د سوریې په نوي حکومت کې مدغم کېږي.
دا تړون تېره ورځ لاسلیک شوی.
د یادونې ده چې د سوریې دموکراتیک ځواکونه د امریکا له ملاتړ هم برخمن دي.
د طالبانو حکومت د کانونو او پترولیم وزارت وايي، چې افغانستان کې د ټاپي پروژې چارې ۸ کیلو مټره مخ ته تللې دي.
د یاد وزارت ویاند وايي، اوس مهال اقلیمي شرایط لږ سخت دي او د هوا په ښه کېدو سره به د دغې پروژې چارې لا ګړندۍ شي.
افغانستان کې د ټاپي پروژې عملي چارې څه موده وړاندې پیل شوې وې، چې د نامناسبو اقلیمي شرایطو له کبله ورو روانې وې.
په داسې حال کې، چې له تېرو ۱۹ ورځو راهیسې پاکستاني لوري د تورخم لار تړلې؛ د طالبانو حکومت د رییس الوزرا اداري مرستیال عبدالسلام حنفي وايي، پاکستان او افغانستان کولای شي، چې خپلې اړیکې پیاوړې کړي.
هغه اسلام اباد کې د طالبانو حکومت سفیر سردار احمد شکیب سره کتنه کې ویلي، چې افغانستان او پاکستان د دوه ګاونډیو او مسلمانو هېوادونو په توګه د اقتصادي، سیاسي او کلتوري اړیکو د پیاوړتیا لپاره ګڼ ګډ ظرفیتونه لري.
هغه له سفارت او کونسلګریو وغوښتل چې پاکستان کې د افغانانو ستونزو د حل لپاره هم هلې ځلې وکړي.
د اوکراین ولسمشر ولادمیر زیلنسکي په جده کې د سعودي عربستان له ولیعهد محمد بن سلمان سره کتلي دي.
په دې لیدنه کې دواړو لوریو د اوکراین جګړې په پای ته رسېدو خبرې کړې.
په دې لیدنه کې محمد بن سلمان ویلي، چې هېواد یې د اوکراین جګړې د حل لپاره خپلې هلې ځلې نه پرېدي.
د یادونې ده، چې سعودي عربستان د اوکراین جګړې د پای ته رسېدو په اړه د خبرو کوربه دی.
یو شمېر هېوادونو په افغانستان کې د یوناما ماموریت د غځېدو په تړاو خپره شوې اعلامیه کې یو وار بیا د جرمونو نړیوالې محکمې د یو څارنوال له هغې پرېکړې هرکلی کړی، چې ویلي یې وو د طالبانو حکومت مشر ملاهبت الله او د سترې محکمې قاضي القضات عبدالحکیم حقاني باید ونیول شي.
فرانسه، ډنمارک، یونان، ګویانا، پاناما، جنوبي کوریا، سیرالئون، اسلووني او برېټانیا هغه هېوادونه دي، چې د دغې پرېکړې هرکلی یې کړی.
دوی په یوه ګډه اعلامیه کې ویلي، چې اوس مهال ښځې او نجونې له ژوند منع شوې او د دوی غږ خاموش دی.
اعلامیه کې راغلي، چې د طالبانو مشر له خپلو حقونو څخه د ښځو د منع کولو لپاره لږ تر لږه ۸۰ فرمانونه صادر کړي دي.
دا په داسې حال کې ده، چې څه موده وړاندې د جرمونو نړیوالې محکمې یو څارنوال کریم خان ویلي وو، چې د طالبانو مشر او د سترې محکمې قاضي القضات باید ونیول شي.
د ملګرو ملتونو د سیاسي استازولۍ مشره روزا اتونبایووا وايي، افغانستان باید له نړیوالې ټولنې سره یوځای شي؛ خو دا انتخاب د طالبانو د حکومت په لاس کې دی، چې دوی له نړۍ سره یوځای کېدل غواړي او که نه.
نوموړې د ملګرو ملتونو امنیت شورا ته دغه راز ویلي، چې که افغانستان کې د یوناما ماموریت ونه غځول شي او له افغانانو سره مرستې ونه شي؛ نو د افغانستان وضعیت به نور هم سخت شي.
د یادونې ده، چې د افغانستان په اړه د ملګرو ملتونو امنیت شورا ناستې ته د یو شمېر نورو هېوادونو استازو هم ویناوې وکړې.
په ملګرو ملتونو کې د افغانستان استازي نصیر احمد فایق له امنیت شورا غوښتي، چې د طالبانو پر ضد جدي اقدامات وکړي.
نوموړي د جرمونو د نړیوالې محکمې د هغې پرېکړې هرکلی وکړ چې د طالبانو مشرانو ته د قانوني تعقیب غوښتنه کوي.
هغه ویلي، چې د طالبانو چلند د نړیوالو قوانینو او د امنیت شورا د پرېکړهلیکونو خلاف دی.
هغه ټینګار کړی چې بدني مجازات، صحرایي اعدامونه، خپلسري نیونې او شکنجه په پراخه کچه د ښځینه فعالانو، خبریالانو، پخوانیو دولتي چارواکو او د امنیتي ځواکونو د غړو پر ضد کارول کېږي.
فایق د طالبانو له لوري د سرتاسري امنیت د تامین ادعا ته په اشارې ویلي، چې افغانستان لا هم د ترهګریزو ګواښونو پر وړاندې ډېر زیانمن دی.
ښاغلي فایق د طالبانو ضد وسلوالو ډلو یادونه هم کړې او ویلي چې د طالبانو د سیاستونو له امله د دغو ډلو فعالیتونه او نفوذ پراخ شوی دی.
په ملګرو ملتونو کې د پاکستان دایمي استازي منیر اکرم د امنیت شورا ناستې ته ویلي، چې ټيټيپي د افغانستان د طالبانو له غیر رسمي ملاتړ څخه برخمن دی.
نوموړي ویلي، ټيټيپي چې شاوخوا ۶۰۰۰ جنګیالي لري او په افغانستان کې تر ټولو لویه فعاله ترهګره ډله ده.
هغه ادعا کړې چې یادې ډلې د پاکستان پولې ته نږدې خوندي پناهځایونه جوړ کړي او پر ملکي وګړو او دولتي ادارو یې بریدونه ترسره کړي دي.
منیر اکرم دغه راز ویلي، چې دوی داسې شواهد لري چې ښيي د طالبانو چارواکو نه یوازې له پولې هاخوا بریدونه تحمیل کړي، بلکې په هغو بریدونو کې هملاسي هم دي.
هغه زیاته کړې، چې د ټيټيپي غړي او نورې ترهګرې ډلې په افغانستان کې هڅه کوي چې پاکستان بېثباته کړي او د چین ـ پاکستان اقتصادي همکاریو ته د ترهګریزو عملیاتو له لارې زیان ورسوي.
په ملګرو ملتونو کې د روسیې دایمي استازي واسیلي نبنزیا ویلي، چې له طالبانو سره له همکارۍ پرته هېڅ بدیل نشته او دا تګلاره باید د نړیوالې ټولنې د رغنده تعامل او د افغانستان د خلکو د اړتیاوو د درناوي پر بنسټ ولاړه وي.
هغه ټینګار کړی، چې نړیواله ټولنه باید له افغانستان سره رغنده تعامل ولري او تعامل باید له هر ډول فشار او باج اخیستلو پرته وي.
هغه د افغانستان سوله او ثبات د ټولې سیمې په ګټه بللی او ویلي، چې د داعش په ګډون یو شمېر نورې ډلې هڅه کوي وضعیت بېثباته کړي او نه یوازې افغانستان، بلکې ټوله سیمه کمزورې کړي.
هغه همداراز په افغانستان کې د امریکا په پاتې شویو وسلو اندېښنه څرګنده کړې.
نوموړي له نړیوالې ټولنې غوښتي، چې د نامعقولو فشارونو پر ځای، د عملي حللارو او له طالبانو سره د همکارۍ له لارې د افغانستان د ثبات او امنیت لپاره کار وکړي.