د اسراییل پوځ منلې چې تېره میاشت د رفح ښار ته نږدې په یوه برید کې د ۱۵ روغتیايي کارکوونکو وژل کېدل یوه مسلکي ناکامي وه.
یاد پوځ ویلي، د دې پېښې د پایلو له امله یو نظامي قومندان له دندې لرې کېږي.
اسراییلو ویلي، چې یاده پېښه د مارچ میاشتې په ۲۳مه نېټه رامنځته شوې وه.
د یادونې ده چې دغې پېښې د نړیوالو سخت غبرګونونه راپارولې وه.
د قزاقستان د لومړي وزیر مرستیال او د دغه هېواد د اقتصاد وزیر سیریک ژومانگارین نن په یو رسمي سفر کابل ته را ورسېد.
هغه د کابل هوايي ډګر کې ویلي، چې نن به د دواړو هېوادونو ترمنځ یو مهم اقتصادي تړون ترسره شي.
بل لورته بیا قزاقستاني رسنیو ویلي وو، چې نوموړی ښايي د طالبانو له چارواکو سره د کتنو ترڅنګ په قزاق ـ افغان نندارتون کې هم ګډون وکړي.
د امریکا ولسمشر هیله څرګنده کړې چې روسیه او اوکراین به روانه اوونۍ کې د جګړې د پای ته رسولو لپاره یوې هوکړې ته ورسېږي.
ولسمشر ډونالډ ټرمپ ویلي، چې د روسیې او اوکراین ترمنځ د سولې تر هوکړې وروسته به دواړه هېوادونه له امریکا سره د سترو سوداګریزو معاملاتو پیل وکړي.
ټرمپ د یکشنبې په ورځ، پر خپله ټولنیزه شبکه «تروت سوشیال» لیکلي، چې کییف او مسکو به له امریکا سره، چې دا مهال په اقتصادي پرمختګ کې ده، ستره سوداګري پیل کړي او ډېرې شتمنۍ به تر لاسه کړي.
د افغانستان لپاره د پاکستان ځانګړي استازي محمد صادق ویلي، چې پاکستان یو نوی مرکز پرانیستی، ترڅو له افغان کډوالو سره د ستونزو په ځانګړې توګه د پولیسو د ناوړه چلند په اړه مرستې وکړي.
نوموړي زیاته کړې، چې دغه مرکز به د “فډرال کنټرول خونې” په نوم ۲۴ ساعته او د اونۍ په هره ورځ فعال وي، څو د هغو افغان کډوالو شکایتونو ته رسیدنه وکړي، چې د خپل هېواد افغانستان ته د بېرته ستنېدو پر مهال د پاکستاني پولیسو له خوا له بد چلند سره مخ شوي وي.
محمد صادق څرګنده کړې، چې دا اقدام د پاکستان د لومړي وزیر د مرستیال او بهرنیو چارو وزیر اسحاق ډار کابل ته د وروستي سفر وروسته عملي شوی دی.
د طالبانو حکومت ویاند ذبیحالله مجاهد وایي، چې د مهاجرینو د ستونزو د حل لپاره د عالي کمېسیون بېلابېل کمیټې هره ورځ په دوامداره ډول فعالیت کوي، چې پکې د مهاجرینو ثبت، انتقال، د خدمتونو وړاندې کول او نقدي مرستو وېشل شامل دي.
نوموړي د ترسره شویو چارو په تړاو ویلي، چې پرون یکشنبه لږ تر لږه ۶۲۳ کورنۍ ثبت شوي، ۷۴۷ کورنۍ انتقال شوې او ۵۸۹ کورنۍ په موقتي ډول په کمپونو کې ځای پر ځای شوي دي.
د مجاهد په وینا، له شپږو میلیونو زیاتې افغانۍ هم یادو مهاجرینو ته د نقدي مرستو په توګه وېشل شوي دي.
د یادونې ده چې دا مرستې او اقدامات د طالبانو له خوا د هغو مهاجرینو د حالت د ښهوالي لپاره ترسره کېږي، چې په دې وروستیو کې له ایران او پاکستان څخه راستنېږي.
د پښتون ژغورنې غورځنګ ډنمارک څانګې نن د دغه هېواد اغوس کې د افغان کډوالو د جبري اېستل کېدو په غبرګون کې لاریون کړی.
حماسه میډیا ته په رالېږل شویو معلوماتو کې ویل شوي، چې لاریون کوونکو له افغان کډوالو سره د پاکستان چلند غیر انساني او غیر اسلامي بللی.
د یادې څانګې مشر میرویس سالم وزیر ویلي، دوی شاهد دي چې پاکستان افغان کډوالو سره غیر انساني کړنې روانې کړي دي.
د یادونې ده چې روانه اوونۍ پشتون ژغورنې غورځنګ په ډېرو هېوادونو کې لاریونونه پیل کړي.
بریتانوي سیلاني تویوسي اوسېدین ویلي، چې افغانستان کې یې له یو طالب سره جنسي اړیکه ټینګه کړې.
بریټانوي رسنۍ ډیلي میل ویلي، چې ۳۰ کلن اوسېدن چې د پاکستان له لارې افغانستان ته راغلی وایي، یو هوټل کې له طالب امنیتي ساتونکي سره مخ شوی او بیا یې ترې غوښتي چې له ده سره ډوډۍ او فلم یوځای وګوري.
نوموړی ډیلي میل ته زیاته کړې، تر دې وروسته یې طالب ساتونکی ملګری شو، چې بیا یې جنسي اړیکه هم ټینګه کړه.
د هغه په خبره، طالبان رومانتیکه اړیکه او په ځانګړي ډول ښکلول ډېر خوښوي او دا طالب ښه پوهېده چې څه وکړي.
نوموړی وایي، هڅه یې کوله چې په دا ډول اړیکو کې محتاط اوسي.
هغه دا هم ویلي چې له تېرو دوو کلونو راهیسې یې ۶۹ هېوادونو ته سفر کړی، ویلي، هڅه کوي چې په هر هېواد کې ځانګړې تجربې ولري، حتی که هغه هېوادونه محدودیتونه ولري.
دغه ګرځندوی ویلي چې له امنیتي ستونزو، د طالبانو له پراخ شتون، او د خلکو له سخت وضعیت سره هم مخ شوی و، او حتی څو ځل یې دا احساس کړی چې شاید له دغه سفره ژوندی ونه وځي.
د سعودي عربستان د کورنیو چارو وزارت وايي، د حمل له ۲۱مې تر ۲۶مې پورې د امنیتي ځواکونو په عملیاتو کې ۲۰ زره او ۶۶۸ ناقانونه مهاجرین نیول شوي، چې له دوو زرو زیاتې یې ښځې دي.
یاد وزارت زیاته کړې، دغه کسان د اقامې، سرحدي امنیت او کار د قوانینو د نقض له امله نیول شوي، او ۳۶ سلنه یې د یمن، ۶۱ سلنه د ایتوپیا او ۳ سلنه د نورو هېوادونو اتباع دي.
دغه وزارت وايي، تر ۱۲ زرو زیات مهاجرین اخراج شوي او خبرداری یې ورکړی چې د ناقانونه مهاجرت مرسته کوونکي تر ۱۵ کلونو زندان او درنو جریمو سره مخ کېږي.
د طالبانو حکومت د کورنیو چارو وزیر سراج الدین حقاني کابل کې له نږدې دوه میاشتنې ځنډ وروسته نن دغه وزارت ته ورغلی.
د یاد وزارت ویاند عبدالمتین قانع ویلي، چې کورنیو چارو وزارت د رهبري غونډه نن د وزارت د سرپرست وزیر، خلیفه سراجالدین حقاني په مشرۍ د وزارت د غونډو په تالار کې ترسره شوه.
قانع زیاته کړې، چې په دغه ناسته کې د وزارت معینانو او اړوند لویو رئیسانو ګډون کړی و.
په دې غونډه کې سراج الدین حقاني ویلي، چې د کورنیو چارو وزارت ټول منسوبین د ولس د خدمت لپاره توظیف شوي او باید د خلکو هوساینه او د هغوی امنیت خپل لومړیتوب وبولي.
نوموړي د امنیتي ځواکونو د مثبت تعامل، مکلفیتونو ته ژمنتیا او ولس سره همغږي ضروري بللې.
د طالبانو حکومت د امربالمعروف او نهې عن المنکر وزارت سرپرست خالد حنفي وايي، چې دعوت، امارت او جهاد ټولنیز عبادتونه دي او ټینګار یې کړی، چې دا عبادتونه تر فردي عبادتونو غوره دي.
هغه په دې غونډه کې د طالبانو مسوولین او عالمان د ټولنې رهبران بللي دي.
حنفي دغه راز ټینګار کړی، چې هغه خلک هم باید ونیول شي، چې خپلې لوڼې په زوره په نکاح ورکوي.
د یادونې ده، چې دغې ناستې کې د ویډیو اجازه نه وه ورکړل شوې.