د اسرائیلو یو لوړپوړي چارواکي «آی۲۴» شبکې ته ویلي، تر هغو چې د ایران او امریکا تر منځ اټومي خبرې روانې وي، اسرائیل به پر ایران برید ونهکړي.
بلخوا، د آکسیوس خبري شبکې د سرچینو په وینا، تمه ده چې د دواړو لورو تر منځ د خبرو شپږم پړاو ژر پیل شي.
تر دې وړاندې داسې راپورونه خپاره شوي وو، چې ګواکې پر ایران د اسرائیل د برید احتمال په لوړه کچه دی.
د خلیج فارس د همکارۍ شورا په کویټ کې د خپلو وزیرانو په ۱۶۴مه غونډه کې د طالبانو له حکومت غوښتي، چې د افغان ښځو د زده کړو او کار حقونه تضمین کړي.
شورا په یوه ګډه اعلامیه کې ټینګار کړی، چې د افغانستان خاوره باید نه د ترهګرو ډلو او نه هم د مخدره موادو د قاچاق لپاره وکارول شي.
د سعودي عربستان، قطر، اماراتو، بحرین، عمان او کویټ د بهرنیو چارو وزیرانو په دې ناسته کې ګډون درلود.
اعلامیه کې پر افغانستان کې د امنیت او ثبات د بېرته راوستلو، د اقلیتونو د خوندیتوب او له ترهګرۍ سره د افغان ولس د مبارزې ملاتړ شوی دی.
شورا د خپلو غړو هېوادونو لهخوا له افغانستان سره د بشري مرستو د دوام هرکلی کړی او پر نړیوالو یې هم غږ کړی، چې بشري، اقتصادي او پرمختیایي مرستې دوامدارې وساتي.
د مزارشریف د روضې جامع جومات خطیب او د شمال مشهور دیني عالم مولوي عبدالقاهر د میاشتې د رؤیت په تړاو د طالبانو حکومت دریځ تر پوښتنې لاندې راوستی.
هغه د یوې مذهبي غونډې پر مهال وویل، چې د امام ابوحنیفه له نظره د اسلامي هېوادونو ترمنځ د وخت او جغرافیې اختلاف، د میاشتې په رؤیت کې د اختلاف لامل نشي کېدلای.
نوموړي زیاته کړې، که یو هېواد کې میاشت ولیدل شي او بل هېواد ترې خبر شي، نو باید د هماغه رؤیت له مخې اختر اعلان کړي یا روژه ونیسي.
عبدالقاهر ویلي، چې تر یو نیم ساعت وختي توپیر هم د اختلاف دلیل نهشي جوړېدای، ځکه د شرعي میاشتې رؤیت د وخت له محدودیت سره نهدی مشروط.
دیادونې ده، چې د افغانستان او سعودي عربستان ترمنځ یو نیم ساعته وخت توپیر شته، خو د طالبانو حکومت له واک ته رسېدو راهیسې د اسلامي مناسبتونو نېټې د خپلې جوړ شوې کمېټې له خوا په خپلواکه توګه اعلانوي.
د افغانستان د پخواني ولسمشر اشرف غني د پخواني دفتر رییس، متین بیک ویلي، چې امریکا باید د افغانستان د سولې د ناکامې تجربې تېروتنې په اوکراین کې تکرار نه کړي.
هغه دا خبرې په یوه مقاله کې کړي چې د «سیفر بریف» وېبپاڼې خپره کړې دي.
بیک لیکلي، لکه څنګه چې طالبانو له امریکا سره مستقیمو خبرو ته ترجیح ورکوله او د افغان حکومت غږ ته پام نه کېده، روسیه هم غواړي له امریکا سره هوکړه وکړي او د اوکراین حکومت له خبرو وباسي.
نوموړي خبرداری ورکړی چې که امریکا د اوکراین د حکومت او خلکو پر ځای یوازې له روسیې سره خبرو ته مخه کړي، دا به د جګړې توازن د مسکو په ګټه بدل کړي.
د ایران مذهبي مشر، آیتالله علي خامنهيي، د امریکا له لوري د اټومي تړون لپاره شوی وړاندیز په ښکاره توګه رد کړی دی.
نوموړي دا څرګندونې نن د اسلامي انقلاب بنسټګر روح الله خمیني د ۳۶م تلین په مناسبت خپلې وینا کې وکړې.
خامنهيي وویل: «امریکا ته زموږ ځواب روښانه دی، دوی هیڅ نشي کولی.»
د خامنهيي په وینا، د امریکا اساسي غوښتنه دا ده چې ایران باید اټومي صنعت ونه لري؛.خو هغه ټینګار وکړ چې ایران به د خپلو اټومي حقونو دفاع ته دوام ورکړي.
دا څرګندونې داسې مهال کېږي چې تر دې وړاندې سپینې ماڼۍ خبرداری ورکړی و، که چېرې تهران د واشنګټن وړاندیز رد کړي؛ نو له “جدي پایلو” سره به مخ شي.
د پاکستان لومړي وزیر شهباز شریف ویلي، چې د افغانستان خاوره باید د هند د نیابتي ډلو لخوا د پاکستان پر ضد ونهکارول شي.
نوموړي دغه څرګندونې د سېشنبې په ورځ د پېښور د سفر پر مهال د پوځ له مشر جنرال عاصم منیر، لوړپوړو امنیتي چارواکو او قبایلي مشرانو سره د ناستو پر مهال وکړې.
شهباز شریف د خېبر پښتونخوا د قبایلي مشرانو یوې جرګې ته په وینا کې، د “خوارجو فتنې” او د هند تر ملاتړ لاندې “ترهګریزو ډلو” پر ضد د پاکستان پر ټینګ هوډ ټینګار وکړ.
هغه زیاته کړې چې د پښتنو زړورتیا او استقامت د پاکستان د ملي تاریخ یوه ویاړلې برخه ده.
نوموړي ژمنه کړې، چې په خېبر پښتونخوا کې به سوله “په هره بیه” وساتل شي، او د دغه ایالت له ځوانانو یې وغوښتل، چې د پاکستان په ثبات، یووالي کې ونډه واخلي.
ټاکل شوې چې د سوریې موقت مشر احمد الشرع به د راتلونکې سپټمبر میاشتې په ترڅ کې نیویارک ته سفر وکړي، څو د ملګرو ملتونو د عمومي سرمشریزې په غونډه کې وینا وکړي.
د سوریایي رسنیو د راپورونو له مخې، دا به له ۱۹۶۷ میلادي کال وروسته، لومړی ځل وي چې یو سوریایي مشر د ملګرو ملتونو په عمومي غونډه کې ګډون او مستقیمه وینا کوي.
احمد شرع له دې مخکې، د روان کال مې میاشت کې د سعودي عربستان په پلازمېنه ریاض کې، د امریکا له ولسمشر ډونالډ ټرمپ سره هم لیدلي وو.
دا لیدنه د سیمهییزو اړیکو او نړیوالو تحولاتو له پلوه خورا مهمه بلل شوې وه.
د طالبانو حکومت مشر شیخ هبتﷲ اخندزاده د لوی اختر په مناسبت پیغام خپور کړی، چې پکې یې افغان ولس او اسلامي امت ته د اختر مبارکي ویلې ده.
نوموړي ویلي چې دا اختر د امن، ثبات او د «اسلامي نظام» د حاکمیت له برکته د ارامتیا تر سیورې لاندې لمانځل کېږي.
هغه ویلي، قرباني یوازې حیوان حلالول نه دي، بلکې د اخلاص، تقوا او اطاعت یو پیاوړی درس دی
نوموړي د دولت چارواکو ته سپارښتنه کړې چې ولس ته په اخلاص سره خدمت وکړي او ځانونه د هغوی خادمان وبولي.
پیغام کې همداراز، له شتمنو غوښتل شوي چې د بېوزلو، یتیمانو، معلولینو او مهاجرینو ملاتړ وکړي.
پیغام کې له ولس او طالبانو غوښتنه شوې چې د شیخ هبت الله اطاعت وکړي، یووالی وساتي او د دښمن له تبلیغاتو ځانونه وساتي.
نوموړي پر فلسطینیانو روان ظلم وحشت بللی او یو وار بیا یې ټینګار کړی، چې دوی د فلسطین له خلکو ملاتړ کوي.
د اسټرالیا د ملبورن پوهنتون د حقوقو پوهنځي اعلان کړی چې د مونټین انسټیټوټ په همکارۍ د افغان مېرمنو لپاره د حقوقي زده کړو یو کلن پروګرام پیلوي.
راپورونه وایي، دا نوښت هغه ښځو ته ځانګړی شوی چې د طالبانو حکومت د بندیزونو له کبله له زده کړو محرومې شوې دي.
د پروګرام مسؤل غلامشاه عادل وايي، هڅه کوي چې افغان مېرمنې بېرته خپل تعلیمي مسیر ته راوګرځوي.
نوموړي زیاته کړې، باور لري چې دا پروژه به د افغانو ښځو حقوقي مهارتونه پیاوړي کړي او دوی به د نړیوالو حقوقي بنسټونو سره ونښلوي.
د پاکستان په حافظاباد ښار کې وسلهوالو کسانو پر یوې ښځې د خاوند مخې ته جنسي تېری کړی، چې ویډیو یې اوس له یوې میاشتې وروسته خپره شوې.
جیونیوز په یو راپور کې وايي، پولیسو دا پېښه جنایي بللې او د څلورو پیژندل شویو کسانو په ګډون، اته کسان پکې تورن دي.
د دغې ښځې خاوند وایي، جې لومړیو کې پولیسو یې شکایت نه ثبتوه او د پولیسو اداره کې یو تورن کس دنده هم لرله چې دی یې ګواښلی و.
پاکستاني چارواکو د عاملینو پر ضد د قانوني اقدام ژمنه کړې ده.