تاجکستان کې د افغانستان پخواني سفیر ظاهر اغبر د تیم بورچت له لوري ده ته امریکا ته د ورتګ له بلنې هرکلی کړی.
نوموړي ویلي، چې ترهګرو”طالبانو” ته د مالیې ورکړې د مخنیوي قانون به دوی ته نوې لاره وټاکي.
هغه ویلي، چې دی د بورچت د ژمنو قدردانی کوي.
د یادونې ده چې نوموړي ته امربکا ته د ورتګ بلنه ورکړل شوې ده.
د ویلو ده چې تر دې وړاندې امرالله صالح ته هم امریکا ته د ورتګ بلنه ورکړل شوې وه.
طلوع نیوز کې یو شمېر سرچینو رسنیو ته ویلي، چې دغې ادارې خپل ۲۵ سلنه کارمندان له دندو لرې کړې دي.
د سرچینې د معلوماتو له مخې، په ټوله کې موبي ګروپ له بېلابېلو ادارو خپل کارمندان اېستلي او ویلي یې دي، چې د بودجې د کمښت له کبله نشي کولای، نور دوی له ځان سره وساتي.
طلوع نیوز د یادو کارمندانو له لرې کېدو وورسته یوازې خپلې شپنۍ خپرونې پرېښې او د ورځې خپرونې یې لغوه کړې دي.
یادې ادارې څو میاشتې وړاندې هم خپل یو شمېر کارمندان له دندو ګوښه کړي وو.
د افغانستان متحدې جبهې له پاکستان څخه د افغان کډوالو د را شړلو پر بهیر نیوکه کړې او دا یې یوه غیر انساني کړنه بللې.
دوی په یوه اعلامیه کې پر اسلامي هېوادونو، بشري ټولنو، نړیوالې ټولنې او دموکراتیکو حکومتونو غږ کړی، چې د دغه کړکېچ مخه ونیسي.
اعلامیه کې له نړیوالې ټولنې غوښتل شوي، چې پر هغو هېوادونو سیاسي فشار راوړي چې دا ډول کړنې کوي.
اعلامیه کې دغه راز ویل شوي:«طالبان نه د افغانانو مشروع استازي دي، نه یې څوک خپل نظام بولي، بلکې افغانان پسې پاڅېدلي دي او نور یې ظلم، وحشت او فقر نه شي زغملی. د دوی د افراطي او تروریستي تفکر له امله، افغانستان له نړیوالې ټولنې، ګاونډیو او سیمې هېوادونو سره هم خطر ته مخامخ شوی دی.»
اعلامیه کې ویل شوي، چې موږ به د طالبانو د افراطي رژیم پر ضد مبارزه کوو.
وروسته له هغې چې د پروان د اطلاعاتو او کلتور ریاست په دې ولایت کې د کیدونکې ارغوان ګل مشاعرې نیټه د خرابې هوا له امله وځنډوله، د طالبانو پیژندل شوی او ټولنیزو رسنیو فعال «جنرال» مبین دا د بیان آزادۍ زندۍ کیدل وباله.
ښاغلي مبین په خپله ایکسپاڼه لیکلي:« د افسوس ځای دی چې مشاعره هم تر امر ثاني ځنډول کیږي او علت یې باراني هوا ښودل کیږي؛ خو اسمان تک شین دی.»
هغه وړاندې لیکلي:«هغه نظام چې د شعر په ژبه، په نقد هم بندیز لګوي؛ نو دا ډیره بده خبره ده.»
نوموړي د طالبانو په سیمهییز حکومت نیوکه کړې چې په شنه اسمان کې د باراني موسم اعلان په دې مانا دی چې د دوی په اوړو کې شګه ده.
ټاکل شوې وه چې د ارغوان ګل تر نامه لاندې په ګل غونډۍ پارک کې نن د ګڼو شاعرانو په شتون کې مشاعره وشي.
د کرملین ویاند اعلان کړی چې روسیه چمتو ده چې د ایران او امریکا ترمنځ د تاوتریخوالي د حل لپاره هر ممکن ګام د سیاسي او دیپلوماتیکو لارو چارو له لارې پورته کړي.
دیمیتري پیسکوف ویلي، چې مسکو له ایران سره پرلهپسې سلا مشورې کوي، چې د هغو له ډلې یوه یې د اتومي تړون موضوع ده.
مسکو له دې مخکې د ایران پر ضد د هر ډول برید له پایلو څخه خبرداری ورکړی و.
د روسیې د بهرنیو چارو وزارت مرستیال، سرګي ریابکوف، خبرداری ورکړی چې د ایران د اتومي تاسیساتو پر ضد هر ډول برید کولای شي د ټولې سیمې لپاره خطرناکې پایلې ولري.
یوناما له نړیوالو تمویل کوونکو غوښتي چې له افغانانو سره دې خپلو بشري مرستو ته په ۲۰۲۵ میلادي کال کې هم دوام ورکړي.
یوناما په یوه خبرپاڼه کې ویلي چې دا مهال شاوخوا ۲.۹ میلیونه کسان په افغانستان کې بېړنیو مرستو ته اړتیا لري.
یاد دفتر خبرداری ورکړی، که دا مرستې کمې شي، د تېرو څلورو کلونو لاسته راوړنې به له خطر سره مخ شي او خلک به منفي بدیلو لارو ته مخه کړي.
دا غوښتنه داسې مهال شوې چې ټاکل شوې د افغانستان د مرستو او همغږۍ نړیواله ناسته د روانې اونۍ په ترڅ کې د ترکیې په استانبول ښار کې جوړه شي.
په دغه ناسته کې به نړیوال تمویل کوونکي، مالي بنسټونه او د ملګرو ملتونو استازي ګډون ولري.
د ایران د بهرنیو چارو وزیر عباس عراقچي وايي، امریکا سره د خبرو لپاره بېړه نه لري او دوی د مستقیم خبرو اترو وړاندیز هم د پخوانیو دلایلو له کبله رد کړی دی.
هغه ویلي، توپ د امریکا په میدان کې دی او هر وخت یې چې ایران ته ځواب ورکړ؛ نو دوی به هم ورته عمل وکړي.
تر دې وړاندې ایران ویلي وو، چې د ګواښ تر سیوري لاندې مستقیمې خبرې اترې بې معنی دی.
د یادونې ده، چې ټرمپ ګواښ کړی و، چې که خبرې ناکامې شي، نو دوی به پر ایران برید وکړي.
د طالبانو حکومت د کډوالو او بېرته راستنېدونکو چارو وزارت چارواکي وايي، چې له پاکستان څخه راستنېدونکو افغان کډوالو لپاره اسانتیاوې برابروي.
له یاد وزارت څخه په خپره شوې خبرپاڼه کې راغلي، چې د راستنېدونکو افغان کډوالو د اړتیاوو ارزولو لپاره تورخم ته یو پلاوی استوي.
د یاد وزارت سرپرست مولوي عبدالکبیر ویلي، چې دوی به هلته د اړتیا وړ امکانات برابر او د مرستو جلب لپاره به له نړیوالو بنسټونو سره غونډې وکړي.
د طالبانو حکومت د بهرنیو چارو وزیر امیرخان متقي د طالب چارواکو ترمنځ خپل منځي اختلافات رد کړل.
هغه ویلي چې مسؤلین د خدای، عقیدې او اطاعت تابع ملګري دي.
بل لورته تېره ورځ د طالبانو د عامې روغتیا وزارت سرپرست نور جلال جلالي هم ویلي وو، چې د دوی د چارواکو ترمنځ هیڅ اختلاف نشته.
وروسته تر هغې، چې امریکا اسرائیل ته د توغندیو دفاعي سیستم وسپاره؛ د یاد هېواد ۱۴ تلویزون ویلي، چې دوی په بشپړ ډول دفاع ته چمتو دي.
سرچینې د یو شمېر چارواکو له قوله راپور ورکړی، چې ایران ښايي پر دوی برید وکړي؛ نو وار له مخه یې تل ابیب دفاع ته چمتو دی.
دوی وايي، که ایران پر اسرائیل برید کوي؛ نو دا به د تهران یوه ناسمه محاسبه وي.
د یادونې ده، چې امریکا وړمه ورځ دغه سیستم اسرائیل ته سپارلی وو.