ایران په رسمي ډول د سپاه پاسداران د سمندري ځواکونو د قومندان علي رضا تنګسیري مړینه تایید کړه.

د ایران د دولتي رسنیو د راپورونو له مخې، نوموړی څو ورځې وړاندې د ایران په جنوبي سیمه کې د یو برید پر مهال سخت ټپي شوی و او وروسته یې د ټپونو له امله ساه ورکړه.

د سپاه پاسداران په خپره شوې اعلامیه کې ویل شوي چې د تنګسیري مړینه د «دښمن د برید» پایله ده، خو د برید د څرنګوالي او عاملینو په اړه نور جزییات نه دي ورکړل شوي.

تنگسیري د ایران د سمندري ځواکونو له مهمو قومندانانو څخه و، چې د ستراتیژیکو اوبو په ځانګړي ډول د خلیج فارس په سیمه کې یې مهم رول درلود.

وړاندې اسرائیل د دې برید مسولیت په غاړه اخیستی او ویلي یې و، چې تنګسیري یې د جیټ الوتکې لخوا هدف ګرځولی او وژلی دی.

د ملګرو ملتونو د خوړو او کرنې سازمان ویلي چې په افغانستان کې د څلورمې پرله‌پسې اوونۍ لپاره د ورښتونو وړاندوینه شوې ده.

یاد سازمان ویلي چې وروستیو بارانونو په ډېرو سیمو کې د خاورې رطوبت زیات کړی او دا د للمي کښت لپاره ګټور بلل کېږي، ځکه د کرنیزو حاصلاتو پر وده او زیاتوالي مثبت اغېز لري.

د خوړو او کرنې سازمان د وړاندوینو له مخې ویلي چې د هېواد د مرکزي، ختیځو او سوېل ختیځو ولایتونو ځینې سیمې ښايي د مارچ له ۳۰مې څخه د اپرېل تر ۵مې پورې د سختو ورښتونو شاهدې وي.

د ملګرو ملتونو د خوړو او کرنې سازمان ویلي چې په افغانستان کې د څلورمې پرله‌پسې اوونۍ لپاره د ورښتونو وړاندوینه شوې ده.

یاد سازمان ویلي چې وروستیو بارانونو په ډېرو سیمو کې د خاورې رطوبت زیات کړی او دا د للمي کښت لپاره ګټور بلل کېږي، ځکه د کرنیزو حاصلاتو پر وده او زیاتوالي مثبت اغېز لري.

د خوړو او کرنې سازمان د وړاندوینو له مخې ویلي چې د هېواد د مرکزي، ختیځو او سوېل ختیځو ولایتونو ځینې سیمې ښايي د مارچ له ۳۰مې څخه د اپرېل تر ۵مې پورې د سختو ورښتونو شاهدې وي.

د پخواني ولسمشر حامد کرزي د دفتر ویاند ایمل فیضي پاکستان د سیمې لوی شیطان بللی او ویلي یې دي چې دغه هېواد «دلالي» کوي او څو مخیز سیاست مخته وړي.

فیضي څرګنده کړې چې پاکستان له هر لوري ګټه اخلي: له عربي هېوادونو سره د اړیکو په برخه کې ایران غندي او د هغوی لپاره د اکمالاتو د کرښې چمتووالی ښيي، خو له ایران سره په خبرو کې ادعا کوي چې د ایران تر څنګ ولاړ دی.

هغه ویلي چې له امریکا سره د اړیکو په برخه کې پاکستان ټرمپ د نوبل د سولې جایزې مستحق بولي، د نفتو د تېرېدو خبرې رسنیزې کړي او د مذاکراتو منځګړیتوب هم تعقیب کړي.

فیضي ټینګار کړی چې پاکستان د څو مخیزو معاملو له امله د سیمې د نورو هېوادونو لپاره د بې باورۍ سبب شوی او ایران یې اوس فرصت‌طلبه ګڼي.

په هالنډ کې د زوترمیر ښاروالۍ شورا غړې او سیاسي فعالې څانګه صدیقي د افغانستان پر ختیځو سیمو د پاکستان بریدونه د نړیوالو قوانینو له مخې جنګي جرمونه بللي دي.

نوموړې پر خپله اېکس‌پاڼه د کونړ د وروستۍ پېښې له انځورونو سره لیکلي چې پر ملکي وګړو بریدونه د نړیوال بشري قانون له اساسي اصولو څخه ښکاره سرغړونه ده او د جنګي جرمونو بېلګه بلل کېږي.

هغې دا هم ویلي چې نړیواله ټولنه باید د ملکي وګړو د وژنې په تړاو د پاکستان حکومت او په افغانستان کې د واکمنو چارواکو څخه حساب وغواړي او د خلکو د خوندیتوب لپاره جدي ګامونه واخلي.

د پخواني ولسمشر اشرف غني د ویاند مرستیال شاه حسین مرتضوي ویلي، چې پاکستان په دې ورځو کې د سیمه‌ییزو شخړو د کنټرول هڅې کوي، خو د دې هېواد منځګړیتوب او اعتبار لا هم د پوښتنې لاندې دی.

نوموړي زیاته کړې چې سره له دې چې پاکستان له سعودي عربستان سره ستراتیژیکې اړیکې لري، د ایران سره پر پوله د شمسي پوځي اډې د امریکا ته د سپارلو سابقه، له افغانستان او هندوستان سره کړکېچونه، او کورنۍ ستونزو د پاکستان د منځګړیتوب وړتیا اغېزمنه کړې ده.

د تېر جمهوري نظام پر مهال د دفاع وزارت سرپرست شاه محمود میاخېل ویلي، چې پاکستاني ځواکونو د کونړ ولایت په مرکز اسعداباد کې پر ملکي وګړو برید د بشریت ضد جرم کړی دی.

هغه ویلي چې په دغه برید کې د یوې کورنۍ څو غړي، د ماشومانو په ګډون، وژل شوي او ټپیان شوي دي.

ښاغلي میاخېل زیاته کړې چې نړیواله ټولنه د افغانستان د اوسني وضعیت له امله تر ډېره چوپه پاتې شوې ده.

نوموړي دغه راز ویلي چې د ملکي وګړو پرله‌پسې په نښه کول باید وغندل شي او د دې پېښې د عاملینو د حساب ورکولو لپاره باید نړیوال اقدام وشي.

د امریکا ولسمشر ډونالډ ټرمپ ویلي چې د امریکا او ایران ترمنځ غیرمستقیمې خبرې د پاکستان له لارې روانې دي او ښه پرمختګ لري.

ټرمپ ویلي چې ښايي ډېر ژر د دواړو هېوادونو ترمنځ هوکړه وشي.

هغه دا ادعا هم کړې چې ایران د پاکستان تر بیرغ لاندې د تېلو د ټانکرونو شمېر دوه چنده کړی او اوس شاوخوا ۲۰ ټانکرونو ته د هرمز له تنګي د تېرېدو اجازه ورکړل شوې ده.

ټرمپ دا هم ویلي چې د ایران د پارلمان رئیس د اضافي ټانکرونو د تېرېدو اجازه ورکړې ده.

هغه په مرکه کې زیاته کړې چې امریکا غواړي د ایران د تېلو کنټرول ترلاسه کړي؛ خو دا کار ښايي د امریکا اوږدمهاله پوځي حضور ته اړتیا ولري.

د طالبانو حکومت مرستیال ویاند، حمدالله فطرت وایي چې د پاکستاني پوځ اړوند ملیشو یو ځل بیا د کونړ ولایت پر مرکز اسعداباد بریدونه کړي دي.

د فطرت په وینا، دغه برید نن مازیګر شاوخوا پنځه بجې د پاکستاني پوځ لخوا د کونړ اسعداباد پر اړوندو کلیوالو سیمو او د ولسي وګړو پر کورونو د هاوانونو او نورو درنو وسلو په کارولو ترسره شوی دی.

نوموړي زیاته کړې چې د لومړنیو معلوماتو له مخې، په دې برید کې یو ملکي وګړی وژل شوی او ۱۶ تنه نور ټپیان شوي، چې ډېری یې ښځې او ماشومان دي.

پاکستان نږدې هره ورځ د کونړ په مختلفو کلیوالو سیمو د ملکي خلکو کورونه هدف ګرځوي، او د مالي زیان سره سره، ملکي خلکو ته مرګ ژوبله اړوي.

د قطر اړوند العربیه ټلویزیوني شبکې راپور ورکړی چې د ایران په پلازمېنه تهران کې د اسرائیلي بریدونو په ترڅ کې د دغې شبکې دفتر هدف ګرځول شوی.

د العربیه شبکې د معلوماتو له مخې، برید د بې‌پیلوټه الوتکې له لارې ترسره شوی او توغندی د ژوندۍ خپرونې پر مهال پر ودانۍ لګېدلی دی.

د راپورونو له مخې، د العربیه شبکې کارکوونکي له دې پېښې روغ وتلي، خو د شاوخوا ودانیو لږ تر لږه لس تنه اوسېدونکي ټپیان شوي دي.

یاده شبکه دا پېښه د روانې جګړې له پیل راهیسې په تهران کې د یوې نړیوالې رسنۍ پر دفتر لومړنی مستقیم برید بولي.

تر دې دمه د اسرائیل له لوري په رسمي ډول د دې پېښې په اړه څه نه دي ویل شوي، او لا هم د برید اصلي هدف روښانه نه دی.

دا برید په داسې حال کې ترسره کېږي چې یوه ورځ وړاندې په لبنان کې هم د اسرائیلي بریدونو پر مهال درې خبریالان وژل شوي وو.