د امریکا د بهرنیو چارو وزیر مارکو روبیو ویلي، چې حکومت د هغو کسانو د ویزو وضعیت څېړي چې د کولمبیا پوهنتون کتابتون ته ناقانونه ننوتي او تاوان یې ورته اړولی دی.
هغه زیاته کړې، چې د حماس پلوي نور زموږ په هېواد کې ځای نه لري.
دا څرګندونې وروسته له هغې شوې چې د نیویارک پولیسو لسګونه هغه محصلین ونیول، چې د پوهنتون د کتابتون یوه برخه نیولې وه، طبلونه یې وهل او د فلسطین په ملاتړ شعارونه یې ورکول.
پولیسو ویلي، لږ تر لږه ۴۰ څخه تر ۵۰ محصلین یې له کتابتونه اېستلي دي.
د افغانستان لپاره د روسیې ځانګړي استازي ضمیر کابلوف ویلي، چې د طالبانو نوم د بندیزونو له لیست څخه اېستل یو مهم ګام و؛ څو له طالبانو سره قانوني اړیکې ټینګې شي.
هغه زیاته کړهې، تر دې پرته روسیې له طالبانو سره قانوني تړونونه نشوای لاسلیکولی.
کابلوف ټینګار کړی، چې د ترهګرۍ د ګواښونو د مخنیوي لپاره د طالبانو حکومت باید باثباته پاتې شي؛ خو دا ثبات یوازې له ځواک سره نه، بلکې د افغانستان د ټولنیز او اقتصادي وضعیت له ښه والي سره هم تړاو لري.
د پاکستان د بهرنیو چارو وزیر، محمد اسحاقډار، د هند وروستي بریدونه شرموونکی جنایت بللی او ویلي یې دي، چې دا کړنې دواړه اټومي ځواک لرونکي هېوادونه د لویې جګړې تر پولو رسولی شي.
ده ویلي، هند قصداً ملکي خلک، جوماتونه، او د برېښنا پروژه په نښه کړې او دا هر څه د نړیوالو کنوانسیونونو ښکاره نقض ګڼل کېږي.
هغه دغه راز ویلي، چې هند د کشمیر د پېښې په اړه د بې لورې څېړنې وړاندیز ته مثبت ځواب نه دی ویلی.
هندي بې پیلوټه الوتکو دا ځل اسلام اباد په نښه کړی.
ټولنیزو رسنیو کې خپرو شویو ویډیو ګانو کې لیدل کېږي، چې د شاه فیصل جومات ته څېرمه بریدونه شوي.
تر اوسه په دې اړه رسمي څه نه دي ویل شوي.
هندي رسنیو راپور ورکړی، چې هند د پاکستان د لاهور ښار دفاعي سیستم له منځه وړی.
د معلوماتو له مخې، هند دا مهم او تجارتي ښار بې دفاع کړی او اوس مهال یې څو ځایه د ځانمرګو ډرون بریدونه پرې کړي.
ټولنیزو رسنیو کې لاس په لاس شویو ویډیوګانو کې لیدل کېږي، چې د راولپنډۍ لوبغالي ته نږدې هم برید شوی.
هندي ډرون الوتکو د راولپنډۍ لوبغالي سره نږدې ډرون برید کړی.
اوس مهال د پاکستان کرکټ بورډ یوه بېړنۍ ناسته رابللې، تر څو د پي ایس ایل د پاتې لوبو په اړه پرېکړه وکړي.
ټاکل شوې وه، چې نن ماښام هلته د پېښور زلمیو او کراچۍ لوبه وشي.
د هند او پاکستان ترمنځ د سختو پوځي تاوتريخوالو له زیاتوالي سره، یو شمېر نړیوالو هوايي شرکتونو د خونديتوب له امله خپل پروازي مسیرونه بدل کړي دي.
د پنجشنبې په ورځ هم د دغو دوو هېوادونو د شمال پر فضا تګ راتګ محدود وو.
د فلایت رادار ۲۴ ویبپاڼې د پروازونو د معلوماتو پر بنسټ، نړیوالې الوتنې اوس له خپلو پخوانیو لارو څخه اوړي او د جنوبي آسیا پر ځای د عمان، متحده عربي اماراتو او کویټ له هوايي حریم څخه تېرېږي.
سره له دې چې تر دې دمه د الوتنو د کومې پېښې يا زيان راپور نه دی ورکړل شوی، خو حالات لا هم بېثباته ګڼل شوي او د تاوتريخوالي د ژر کمېدو هېڅ نښه نه تر سترګو کېږي.
په ورته مهال، نړیوالو بنسټونو هم د شخړو د پراخېدو د خطر له امله اندېښنه ښودلې او د تاوتريخوالي د کنټرول غوښتنه کوي.
د پاکستان پوځ وايي، ۲۵ هاروپ ډرونونه چې د اسراییلو په فابریکه کې جوړ او د هند له خوا پاکستان ته رالېږل شوي وو، را نسکور کړي دي.
د پاکستان د پوځ ویاند احمد شریف چوهدري ویلي، چې دغه بېپیلوټه الوتکې د کراچۍ او لاهور په شاوخوا کې او په نورو سیمو کې نسکورې شوې دي.
چارواکو د بریدونو هدف نهدی څرګند کړی.
بل لورته یو شمېر سرچینې وایي چې هندي الوتکو لاهور کې یو شمېر ځایونه خپل هدف ګرځولي.
د نړۍګرځندوی او سفر یوه مشهور وېبسایټ افغانستان د نړۍ د تر ټولو خطرناکو هېوادونو په سر کې ځای پر ځای کړی او ویلي یې دي چې د خراب امنیتي وضعیت له امله باید هېڅوک دې هېواد ته سفر ونهکړي.
بلاروس، ایران، روسیه، سوریه، یمن او نور هېوادونه هم له افغانستان وروسته په دې لېست کې شامل دي.
یاد وېبسایټ خبرداری ورکړی چې سفر دې هېوادونو ته نه یوازې خطرناک دی، بلکې د مسافرت بیمه هم باطلوي او د قونسلګرۍ مرستې محدودوي.
د طالبانو حکومت ویلي چې په افغانستان کې سرتاسري امنیت شته؛ خو نړیوالو لکه امریکا، بریتانیا او کاناډا خپلو وګړو ته خبرداری ورکړی چې د تښتونې، ترهګریزو بریدونو او نیونې له وېرې دې هېواد ته سفر ونهکړي.
د «ای ای ار» مجلې په یوه تازه مقاله کې څرګنده کړې چې طالبانو له روسیې سره په مسکو کې د سفارت په کچه د خپل سیاسي ماموریت د لوړولو په اړه خبرې کړې دي.
مقاله زیاتوي، چې دا پیغام د روسیې د بهرنیو چارو وزارت استازي، ضمیر کابلوف، د کابل سفر پر مهال طالب چارواکو ته رسولی دی؛ خو له دې سره سره، روسیې ټینګار کړی چې دا اقدام د طالبانو د رسمي پېژندنې معنا نه لري.
مقاله کې راغلي، چې دا نوې اړیکې کولای شي د روسیې، افغانستان او نورو هېوادونو ترمنځ د سوداګرۍ، زیربنایي همکاریو، بشري مرستو او د ترهګرۍ ضد مبارزې په برخو کې دوه اړخیز او څو اړخیز تعاملونه زیات کړي.