د ننګرهار د طالبانو حکومت امنیه قومندانۍ ویاند، سید طیب حماد، ویلي چې په حصارک ولسوالۍ کې یو کس د ۳۳ څارویو د غلا په تور نیول شوی دی.
د ویاند په وینا، نیول شوي کس دا څاروي له لوګر ولایته غلا کړي او خپل جرم یې منلی دی.
طالب ځواکونو ویلي، له دغه سړي څېړنې روانې دي او دوسیه به یې عدلي او قضايي ارګانونو ته وسپارل شي.
د طالبانو حکومت د دفاع وزارت سرپرست مولوي محمد یعقوب مجاهد د ازبکستان د استخباراتو له رییس قرباناف باخودیر، د هغه له مرستیال مختورف فرخ، او د سرحدي ځواکونو له قوماندان خسانوا سلیمجون سره لیدنه کړې ده.
د دفاع وزارت په خبرپاڼه کې ویل شوي، چې دواړو لوریو د افغانستان پر امنیت، د سرحدي همکاریو، او د دوهاړخیزو اړیکو پر پیاوړتیا بحث کړی دی.
یعقوب مجاهد د ازبکستان له لوري په نړیوال سټیج د افغانستان له ملاتړ مننه کړې او د دواړو هېوادونو د اړیکو د لا پیاوړتیا غوښتنه یې کړې ده.
د ننګرهار پخوانی والي ضیاءالحق امرخېل د کانکور ازموينې د بریالي بشپړېدو هرکلی کړی؛ خو ويلي يې دي چې د نجونو نهګډون د اندېښنې وړ موضوع ده.
ښاغلي امرخېل پر خپله ټولنیزه شبکه ایکس لیکلي، چې د کانکور عمومي اول نمره او نورو بریالیو ته مبارکي وايي؛ خو خواشیني څرګندوي چې د نجونو ګډون په دې بهیر کې نشته.
هغه زياته کړې: «زموږ زړورې نجونې، چې حتی د جګړو پر مهال يې تعليم نه و پرېښی، نن د امن په فضا کې له زدهکړو محرومې دي.»
امرخېل دا وضعیت د يو پلار له نظره دردناک بللی او لیکلي يې دي، چې د تعلیم نشتوالی يو ملت تل نورو ته محتاج ساتي.
پخواني ولسمشر حامد کرزي د ۱۴۰۴ کال د کانکور بریالي شویو زده کوونکو ته مبارکي ویلي.
ښاغلي کرزي په خپله ایکس پاڼه په سږني کانکور کې د نجونو په نه ګډون او د هغوی له زده کړو په محرومیت ژوره خواشیني څرګنده کړې.
نوموړي د طالبانو له حکومت غوښتنه کړې چې د نجونو پرمخ د ښوونځیو او پوهنتونونو دروازې پرانیزي څو هېواد د علم او تخصص له لارې پرمختګ وکړي او له بهرنۍ اړتیا وژغورل شي.
د طالبانو حکومت د ملي دفاع وزارت لوی درستیز فصیح الدین فطرت وايي، هغه پوځي چورلکې او الوتکې چې له افغانستانه بهرنيو هېوادونو ته لېږدول شوې، د افغانستان ملي شتمني ده او دوی ترې نه تېرېږي.
نوموړي دا څرګندونې نن د دفاع وزارت د یو کلنو لاسته راوړنو د بیانولو پر مهال وکړې، ویې ویل چې له هغو هېوادونو سره خبرې روانې دي چې دغه چورلکې او الوتکې ورلېږدول شوي.
د فصیح الدین فطرت په خبره، دا الوتکې او وسایط به بېرته افغانستان ته راوستل شي.
د معلوماتو له مخې، د طالبانو حکومت تر واکمنېدو وروسته شاوخوا ۲۲ پوځي الوتکې او ۲۴ چورلکې ل د ازبکستان خاورې ته لېږدول شوې وې.
د بنګلهدېش جېټ الوتکې غورځېدو کې ۲۷ تنه وژل شوي.
د بنګلهدېش د چارواکو په وینا، د دغه هېواد د هوايي ځواک یوه جېټ الوتکه چې د روزنیز ماموریت لپاره الوتې وه، د ډهاکه ښار په یوه ښوونیز کمپلکس کې غورځېدلې ده.
په پېښه کې لږ تر لږه ۲۷ تنه وژل شوي، چې ۲۵ یې ماشومان دي.
چارواکي زیاتوي چې ۸۸ نور کسان ټپیان شوي او روغتونونو ته لېږدول شوي دي.
د پېښې علت تر اوسه نه دی څرګند شوی.
د ايران د بهرنيو چارو وزير عباس عراقچي ويلي، چې د “مرګ پر امريکا” شعار د امريکا د حاکمانو سياستونو ته متوجه دی، نه امريکايي ولس ته.
نوموړي دا څرګندونې د امريکايي تلويزيون فاکسنيوز سره په يوه ځانګړې مرکه کې وکړې.
عراقچي ټينګار وکړ چې د خلکو تر منځ ممکن تند نظريات وي؛ خو دا د ايران رسمي سياست نه دی او نه هم د يو هېواد د ولسمشر وژنه د ايران د دولت په پاليسۍ کې ده.
دا څرګندونې پر داسې مهال کېږي چې په ايران کې د امريکا ولسمشر ډونالډ ټرمپ او د اسرایيلو د لومړي وزير بنيامين نتنياهو پر ضد د وژنې شعارونه پيل شوي، چې راپورونه وايي ځينو ايراني چارواکو يې ملاتړ کړی.
د امریکا د عدلیې وزارت د دوشنبې په ورځ شاوخوا ۲۴۰ پاڼې اسناد خپاره کړل، چې د مارتین لوتر کینګ د وژنې سره تړاو لري.
دغه اسناد د امریکا د ملي آرشیف په ویبپاڼه کې خپاره شوي او ویلي یې دي چې نور اسناد به هم خپاره کړي.
مارتین لوتر کینګ د امریکا د تورپوستو خلکو د حقونو لپاره له تاوتریخوالي پرته مبارزه کوله، چې په ۱۹۶۸ کال کې په ممفیس کې ووژل شو.
جیمز ارل ري، چې یو پخوانی مجرم او د نژاد پر بنسټ کرکې لرونکی و، د هغه د وژنې مسوولیت منلی وو؛ خو وروسته یې خپله خبره بېرته رد کړې وه.
د طالبانو حکومت په کابل کې یو شمېر ښځې او نجونې د محرم نهلرلو او د حجاب د نهرعایت له امله نیولي دي.
نیول شوې مېرمنې وايي، له ضمانت وروسته خوشې شوي؛ خو ورته خبرداری ورکړل شوی چې له محرم پرته له کوره د وتو اجازه نهلري.
دغو مېرمنو ادعا کړې چې د نیولو پر مهال ورسره سپک چلند شوی او سخت ګواښونه ورته شوي دي.
ویل کېږي چې نیونې په زور شوې او ځینې مېرمنې له ارایشګاوو ایستل شوي دي.
د طالبانو حکومت دا نیونې ردوي او وایي چې د حجاب په اړه د عامه پوهاوي کمپاین یې پیل کړی دی.
د اوکراین ولسمشر، ولودیمیر زلنسکي، ویلي چې د روسیې سره د سولې خبرې به د چهارشنبې په ورځ، د اسد لومړۍ نېټه، په ترکیه کې پیل شي.
نوموړي د خبرو اترو د چټکتیا غوښتنه وکړه.
د روسیې دولتي خبري آژانسونو هم د ترکیې له سرچینو راپور ورکړی چې دا خبرې به دوه ورځې، یعنې پنجشنبه او جمعه، دوام وکړي.
زلنسکي ویلي، د اسیرانو د تبادلې، د ربړول شوو ماشومانو د بېرته ستنولو، او د مشرانو د لیدنې لپاره چمتووالی نیسي.
کرملین ویلي، لا هم د دقیقې نېټې تایید ته منتظر دی؛ خو ټینګار کوي چې د دواړو لورو دریځونه د جګړې د پای ته رسېدو په اړه “په بشپړه توګه متضاد” دي.
دواړو خواوو تر دې وړاندې هم دوه ځله په استانبول کې خبرې کړې وې؛ خو لا هم د اوربند یا تلپاتې حل هواري ته نه دي رسېدلي.