د چین سفارت په اسرائیل کې له خپلو اتباعو غوښتي چې ژر تر ژره دغه هېواد پرېږدي.
سفارت خبرداری ورکړی چې د ایران او اسرائیل ترمنځ شخړه لا پسې شدیده شوې، ملکي تاسیسات زیانمن شوي، او د قربانیانو شمېر زیات شوی دی.
چینایانو ته سپارښتنه شوې، چې د اردن له ځمکنۍ لارې له اسرائیله ووځي، ځکه چې امنیتي وضعیت خراب شوی او د دغه هېواد هوايي حریم لا هم تړلی دی.
د اسراییلي شبکې i24News د راپور له مخې، د امریکا دفاع وزیر پیت هګست امر کړی چې د ایران پر ضد د اسراییلو د عملیاتو لپاره دې د امریکا احتمالي ګډون ته چمتووالی ونیول شي.
دا چمتووالی به یوازې هغه مهال عملي شي که ولسمشر ټرمپ یې اجازه ورکړي.
راپور کې زیاته شوې، چې د سنتکام ځینې لوړپوړي چارواکي، په ځانګړي ډول جنرال مایکل کوریلا، له دې اقدامه ملاتړ کوي، خو د ټرمپ ادارې یو شمېر نور مشران یې بیا مخالف دي.
د نیویارک ټایمز د تحلیلي راپور له مخې، د اسراییلو او د ایران تر منځ روانه نښته چې د غبرګولي په ۲۳مه پیل شوې، له پخوانیو شخړو سره توپیر لري، ځکه چې اوس څلور ورځې تېرې شوې؛ خو دواړه خواوې لا هم د شاتګ نیت نه لري.
په راپور کې ویل شوي، چې برعکس د تېرو کلونو لنډمهاله بریدونو چې په څو ساعتونو کې پای ته رسېدل، دا ځل وضعیت اوږد شوی او د کړکېچ د ختمېدو کوم څرګند لوری نه تر سترګو کېږي.
په دې شرایطو کې، د امریکا د ولسمشر رول د دغه بحران په راتلونکې بهیر کې ډېر مهم بلل شوی، ځکه چې د واشنګټن پرېکړې کولی شي د شخړې لوری بدل کړي.
د یادونې ده چې دا ځل د اسراییلو بریدونو د ایران د سپاه پاسداران څو لوړپوړي قوماندانان او ځینې اټومي ساینسپوهان وژلي دي او دغه راز ګڼ ملکیان هم وژل شوي.
بلخوا، د تهران بریدونو هم په اسراییلو کې ځینې تاوانونه اړولي دي.
د امریکا ولسمشر ډونالډ ټرمپ د ایران له خلکو غوښتي چې ژر تر ژره پلازمېنه تهران پرېږدي او یو ځل بیا یې ټینګار کړی چې ایران باید له امریکا سره د اټومي تړون موافقه کړې وای.
هغه په ټروت سوشال کې لیکلي «ایران باید اټومي وسله و نه لري. دا خبره مې بیا بیا کړې او ټول باید سمدستي تهران پرېږدي!»
تر دې مخکې د اسرائیل لومړي وزیر هم ورته غوښتنه کړې وه.
د ایران حکومت په غبرګون کې له خلکو غوښتي چې دغو غوښتنو ته پام و نه کړي.
ایران د اسرائیل بله ایف ۳۵ جنګي جټ الوتکه نسکوره کړې.
دا په روانه جګړه کې دویمه دا ډول الوتکه ده، چې ایران یې له منځه وړي.
اسرائیل تر اوسه په دې اړه څه نه دي ویلي.
د اسرائیلو لومړي وزیر بنیامین نتانیاهو ویلي، چې د ایتالله علي خامنهيي هدف ګرځول ناممکن نه دي.
هغه د ایبيسي نیوز شبکې سره په مرکه کې ویلي، چې د خامنهیي وژل جګړه نوره نه شي ډېرولی، بلکې پای ته به یې ورسوي.
نتانیاهو زیاته کړې، چې دوی به هر هغه کار وکړي چې اړتیا وي.
هغه وایي، چې ایران د یوې بېپایلې جګړې او حتی اټومي جګړې سرحد ته رسولي؛ خو اسرائیل غواړي دې ته د پای ټکی کېږدي.
ایران د اسرائیل په یو شمېر اشغالي سیمو بریدونه پیل کړل.
تر اوسه یې د کره په نښه شویو اهدافو په اړه جزیات نشته.
ایران تر دې وړاندې ویلي وو، چې دوی به په اسراییل یو تر ټولو قوي برید وکړي.
اسرائیل تهران کې د هلال احمر پر کار کوونکو برید کړی.
ایرانۍ رسنۍ وایي، چې دغه برید کې د هلال احمر دوه کارکوونکي وژل شوي.
اسراییل تر اوسه په دې اړه څه نه دي ویلي.
اسرائیل د ایران پر بېلابېلو سیمو بریدونو ته زور ورکړی.
اوس مهال مهراباد هوایي میدان او تهران کې د الوتکو جوړولو یو مرکز په نښه شوي.
ایران بیا وایي، چې دوی یو قوي برید ته د چمتووالي خبر ورکړی.
د ایران د حکومت ویاندې فاطمه مهاجراني ویلي، چې د اسراییلو د بریدونو په پایله کې ۴۵ ښځې او ماشومان وژل شوي او ۷۵ نور ټپیان شوي دي.
نوموړې زیاته کړې، چې دوی په یو تپل شوي جګړه کې راګیر دي.
دا په داسې حال کې ده، چې لاهم د دواړو لوریو ترمنځ جګړه نه ده درېدلې.