د ملګرو ملتونو امنیت شورا د دوشنبې په ورځ، د جون ۲۳مه، د افغانستان په اړه غونډه کوي.
په دې غونډه کې به د ملګرو ملتونو ځانګړې استازې رزا اوتونبایوا، د بشري چارو مرستیاله جویس موسویا او د ښځو برخې مشره سیما باهوس خبرې وکړي.
ویل کېږي، چې تر علني ناستې وروسته به د بندو دروازو تر شا هم یوه ناسته وشي.
د ایران د بهرنیو چارو وزیر، عباس عراقچي د اسلامي همکاریو سازمان د بهرنیو وزیرانو غونډې کې د ګډون لپاره استانبول ته رسېدلی دی.
نوموړي ویلي، د ایران په وړاندې د اسراییلو بریدونه به په دې غونډه کې ځانګړی بحث وي.
هغه زیاته کړې چې له یو شمېر هېوادونو د بهرنیو وزیرانو سره به لیدنې ولري او له ترکي ولسمشر رجب طیب اردوغان سره هم ځانګړې ناسته لري.
بلخوا، د امریکا ولسمشر ډونالډ ترمپ خبرداری ورکړی چې ایران یوازې دوه اونۍ وخت لري څو د امریکا احتمالي هوايي برید مخه ونیسي او ښايي تر هغې وړاندې پرېکړه وکړي.
د متحدې جبهې مشر جنرال سميع سادات وایي، د افغانستان متحده جبهه یوازې د هېواد د آزادۍ لپاره مبارزه کوي او نه غواړي د بل هېڅ هېواد په جګړه کې ښکېله شي.
نوموړي د ایران په جګړه د هغه او نورو افغان جنرالانو په اړه د کابل پوډکاسټ وروستی راپور «غلط، مغرضانه او ناځوانمردانه» بللی دی.
یوې امریکايي ایکس پاڼې د جورجیا سن شاین له قوله لیکلي و، چې درې افغان جنرالان خوشحال سادات، جنرال سمیع سادات او جنرال هیبت الله علیزي د امریکا له سنټرل کمانډ سره د ایران په وړاندې د احتمالي برید په صورت کې د همکارۍ غوښتنه کړې.
د طالبانو حکومت هیله لري چې روسي ستر شرکتونه په افغانستان کې پانګونه وکړي.
د طالبانو حکومت د سوداګرۍ خونې مرستیال محمد یونس مهمند، چې سنپترزبورګ ته تللی، ویلي، اوس هم روسي شرکتونه په افغانستان کې فعال دي.
دغه پلاوی د کرنې وزیر عطاءالله عمري په مشرۍ د ۲۰۲۵ اقتصادي کنفرانس لپاره روسیې ته تللی.
یاد کنفرانس د جوزا له ۲۸ تر ۳۱مې دوام لري او پر کرنه، صنعت، پانګونه او چاپېریال تمرکز کوي.
له هغه وروسته چې روسیې د طالبانو حکومت له ترهګرو ډلو وایستل، اړیکې یې ورسره پراخې شوي دي.
د اسراییلو لهخوا د ایران پر مواضعو د دوامداره بریدونو له امله، په تهران کې د هند سفارت اعلان کړی چې خپل ټول وګړي له ایرانه باسي.
د هند د چارواکو په وینا، شاوخوا لس زره او اوه سوه، هندي اتباع په ایران کې دي.
دغه راز، سفارت ویلي چې د نیپال او سریلانکا د غوښتنې له مخې، د دغو هېوادونو د اتباعو په تخلیه کې هم مرسته کوي.
ایراني رسنۍ وايي، په مشهد ښار کې مېشتو یو شمېر افغان کډوالو د اسراییلي بریدونو په غبرګون کې د ایران ملاتړ څرګند کړی دی.
راپورونه ښيي چې دغه کډوال د یو لړ دیني مراسمو پر مهال ویلي، د ایران تر څنګ ولاړ دي او که اړتیا وي، جهاد ته چمتو دي.
ګډونوالو د اسراییلو بریدونه سخت غندلي او له نړیوالې ټولنې یې غوښتنه کړې چې د دې وضعیت د مهار لپاره بېپروا پاتې نه شي.
د ترکمنستان د بهرنیو چارو وزارت مرستیال احمد قربانوف او د اروپايي اتحادیې د بهرنۍ پالیسۍ د آسیا څانګې استازې پاولا پامپولوني د افغانستان د وضعیت او د سیمې د امنیت په اړه خبرې کړې دي.
قربانوف ویلي، ترکمنستان هڅه کوي د سولې او دوامدار پرمختګ لپاره هغه نوښتونه عملي کړي چې د افغانستان د ثبات سبب ګرځي. نوموړي ټینګار کړی چې د بشري مرستو دوام هم د عشقآباد د مهمو همکاریزو اقداماتو برخه ده.
دواړو لورو د ستراتیژیکو بنسټیزو پروژو، لکه د ترکمنستان او افغانستان ترمنځ د اورګاډي پټلۍ جوړول او د انرژۍ او ترانسپورت نوي دهلیزونه، مهم وبلل.
کاسپین پست د ترکمنستان د بهرنیو چارو وزارت په حواله لیکلي، قربانوف او پامپولوني چمتو دي چې د دواړو خواوو ترمنځ د علاقې وړ موضوعاتو په برخه کې ګډ کار ته دوام ورکړي.
د ایران د بهرنیو چارو وزیر سید عباس عراقچي وایي، تر هغو چې د اسراییلو تېری پای ته نه وي رسېدلی، له امریکا یا نورو هېوادونو سره د اټومي پروګرام په اړه خبرې نه کوي.
دا څرګندونې په داسې حال کې شوي چې اروپا هڅه کوي ایران بېرته د خبرو مېز ته راولي.
بلخوا د امریکا ولسمشر ډونالډ ټرمپ ویلي، اسراییل ته به د بریدونو د درولو لپاره فشار ور نه کړي، او دا هم شک لري چې اروپا دې د ایران او اسراییلو ترمنځ اوربند ته لاره هواره کړي.
ټرمپ زیاته کړې، ایران غواړي له امریکا سره خبرې وکړي، نه له اروپا سره.
ایراني رسنیو خبر ورکړی، چې څو شېبې وړاندې په تهران او قم کې د زوروې زلزلې ټکانونه محسوس شوي.
دا زلزله د ځمکې په لس کیلومتره ژوروالی کې شوې.
د رسنیو د معلوماتو له مخې، د زلزلې شدت د ریختر په کچه ۵.۲ درجې اټکل شوی دی.
د طالبانو حکومت د کابل امنیه قومندانۍ ویاند، خالد ځدراڼ ویلي چې د پخوانۍ سندرغاړې زلاله هاشمي د ورکېدو په اړه خپاره شوي راپورونه او اوازې د طالبانو لهخوا تر لومړنۍ څېړنې لاندې نیول شوي دي.
نوموړي وضاحت ورکړی چې تر اوسه پورې د پلټنو موندنې ښيي چې زلاله هاشمي د زور یا اجباري تښتونې پرته، پخپله خوښه له کوره وتلې ده.
د هغه په وینا، د تښتونې یا کوم بل زور زیاتي نښې ندي موندل شوي.
ځدراڼ زیاته کړه چې دا موضوع لا هم د طالبانو لهخوا څېړل کېږي او که اړتیا وي، نو نور جزئیات به له رسنیو سره شریک کړي.