په پاکستان کې د طالبانو حکومت پخواني سفیر مولوي عبدالسلام ضعیف ویلي، چې اوس د خلیج او نورو عربي هېوادونو لپاره یو مهم او ذهبي فرصت برابر شوی څو په خپل منځ کې قوي ائتلاف رامنځته کړي.
نوموړي ویلي، عربي هېوادونه کولای شي د فدرالي حکومت په څېر یو ګډ نظام جوړ کړي او ځینې مهم بنسټونه لکه نظامي او استخباراتي ارګانونه سره یوځای او همغږي کړي.
د هغه په وینا، د دغه ډول همکارۍ له لارې به یاد هېوادونه وکولای شي چې امریکایي اډو ته ځواب ورکړي او ټکنالوژۍ ته وده ورکړي.
د امریکا ولسمشر ډونالډ ټرمپ خبرداری ورکړی چې که ایران په هرمز تنګي کې سمندري ماینونه ځای پر ځای کړي وي او له سمدستي لرې کولو پرته پاتې شي، نو د ایران پر ضد پوځي اقدامات به “په تاریخ کې بې ساري” وي.
ټرمپ په خپل ایکس ټروت سوشیال پاڼه، ویلي چې که ماینونه لرې شي، نو دا به د اړیکو په ښه کولو کې لوی ګام وي.
هغه همدارنګه وویل چې د امریکا ځواکونه به د نشه يي توکو قاچاقو ضد ټکنالوژي او توغندي وکاروي ترڅو هر هغه کښتۍ یا بیړۍ چې د هرمز تنګي ماینونه ځای پر ځای کوي، په چټک او زوردار ډول له منځه یوسي.
هغه مهال چې د امریکا او اسرائیل په ګډو هوایي بریدونو کې د ایران مذهبي مشر علي خامنه اي ووژل شو او ایران په ځوابي بریدونو کې په سیمه کې د امریکا اډې هدف وګرځولې، د پاکستان لومړي وزیر شهباز شریف د ایران بریدونه وغندل او په زغرده یې له امریکا او متحدینو خپل ملاتړ اعلان کړ؛ تازه یې د ایران نوي رهبر مجتبی خامنه اي ته په یو لیک کې د هغه د پلار علي خامنه اي د وژل کېدو له امله خواخوږي څرګنده کړې او په عین حال کې یې د ستر رهبر د مسؤلیتونو د منلو مبارکي ورکړې ده.
شهباز شریف په خپل پیغام کې مجتبی خامنه اي ته لیکلي، چې د پاکستان او ایران اړیکې د ګډ دین، تاریخ، کلتور او ژبې پر بنسټ ولاړې دي.
شهباز شریف زیاته کړې، چې پاکستان به له ایران سره د دواړو هېوادونو د خلکو د ګټو لپاره د متقابلو همکاریو د لا پیاوړتیا په موخه په ټولو برخو کې نږدې کار ته دوام ورکړي.
د طالبانو حکومت د برېښنا شرکت د یوې اعلامیې په خپرولو سره ویلي، چې له ازبکستان څخه هېواد ته د ۲۲۰ کیلوولټ وارداتي برېښنا لېږد مزي د بغلان ولایت د تاشقرغان تنګي په سیمه کې د سخت باران، توپان او د ډبرو د ښوېدو له امله پرې شوي او پرچاو شوي دي.
د برېښنا شرکت د معلوماتو له مخې، دا مهال پروان، کاپیسا، پنجشېر، کابل، ننګرهار، لغمان، میدان وردګ، غزني، لوګر، پکتیا او خوست ولایتونو ته وارداتي برېښنا پرې شوې ده.
د برېښنا شرکت په وینا، دا مهال په کابل کې روغتونونو او مهمو امنیتي مرکزونو په څېر د لومړۍ کټګورۍ ځایونو ته د داخلي تولید او د تاجکستان وارداتي برېښنا په مرسته برېښنا برابره شوې، او نورو سیمو ته د امکاناتو له مخې په نوبتي ډول برېښنا ورکول کېږي.
یاد شرکت ویلي، چې تخنیکي ټیمونه سیمې ته استول شوي او هڅه کوي چې د کاري زمینې له برابرېدو سره سم ژر تر ژره ستونزه حل کړي.
د ایراني رسنیو د راپورونو له مخې، د «وعده صادق ۳۵» په نوم د عملیاتو نوې څپه نن شپه ترسره شوې او د اسرائیل پر بېلابېلو اهدافو پرمختللي توغندي توغول شوي دي.
راپورونه وایي چې په دې بریدونو کې د «خیبرشکن»، «قدر»، «خرمشهر»، «فتاح» او «عماد» په نوم هدفمند توغندي کارول شوي او ټاکلي هدفونه یې په نښه کړي دي.
همدارنګه ویل شوي چې د لبنان حزبالله ځواکونو د اشغال شوې فلسطین په شمال کې پر یو شمېر اهدافو هم بریدونه کړي دي.
بلخوا د عراق د مقاومت ډلو هم اعلان کړی چې نن یې یو ځل بیا په عراق کې د امریکا د پوځ پر حضور لرونکو اډو بریدونه کړي دي.
تر اوسه د دغو بریدونو په اړه د اسرائیل، امریکا او یا هم نورو خپلواکو سرچینو له لوري رسمي تایید نه دی شوی.
د طالبانو حکومت مرستیال ویاند حمدالله فطرت وایي، له پاکستان سره پر فرضي کرښه په پرتو ولایتونو کې د پاکستان د پوځ بریدونه او جنګي جنایتونه لا هم دوام لري.
د نوموړي په وینا، تېره شپه د پکتیا ولایت د ډنډ پټان ولسوالۍ د کوټ کلي په سیمه کې د پاکستاني پوځ د هاوان مرمۍ د یوه ملکي کور سره لګېدلې چې له امله یې ۳ ملکي وګړي وژل شوي او ۳ نور ټپیان شوي دي.
فطرت زیاتوي چې د پکتیکا ولایت د شکین ولسوالۍ په بېلابېلو سیمو کې هم د پاکستاني پوځ له لوري د عامو خلکو پر کورونو او عامه تاسیساتو ۱۲ د هاوان مرمۍ او ۱۴ د ډي سي توپ مرمۍ توغول شوې دي، چې دغه مرمۍ په شاړو ځمکو، تخلیه شویو کورونو او د ولسوالۍ د امنیه قومندانۍ ته نږدې سیمو لګېدلې دي، خو د ځاني تلفاتو راپور نه دی ورکړل شوی.
د ده په خبره، د پکتیکا ولایت د برمل ولسوالۍ پر سیمو هم شاوخوا ۹۰ د هاوان او توپ مرمۍ فیر شوې دي.
بل لور ته د خوست ولایت د ځاځي میدان ولسوالۍ په څو کلیو کې د سهار راهیسې د درنو وسلو په مټ د ملکي خلکو کورونه په نښه شوي دي، چې یو ملکي کس ټپي شوی او ګڼ شمېر کورنۍ له خپلو کورونو بې ځایه شوې دي.
همدارنګه د نورستان ولایت د کامدیش ولسوالۍ د نوآباد، دونیژه او ډبه کلیو اوسېدونکي وايي چې له پرون راهیسې پر سیمې د هاوان او توپونو بریدونه روان دي، چې له امله یې خلک له خپلو کورونو وتلي، څو کورونه نیمه ویجاړ شوي او شاوخوا ۲۰ څاروي وژل شوي دي.
د استرالیا حکومت اعلان کړی چې د ایران د ښځو د فوټبال ملي لوبډلې پنځو لوبغاړو ته یې بشري ویزې ورکړې او خوندي ځای ته یې انتقال کړې دي.
د استرالیا د کډوالۍ وزیر توني برک ویلي، دغه لوبغاړې د اسیا جام سیالیو تر پای وروسته په استرالیا کې پاتې کېدل غواړي او د پولیسو له خوا خوندي ځای ته لېږدول شوې دي.
د چارواکو په وینا، یادې لوبغاړې فاطمه پسندیده، زهرا غنبري، زهرا سربالي، عاطفه رمضانزاده او مونا حمودي دي.
وزیر برک زیاته کړې چې دغو لوبغاړو ټینګار کړی چې دوی سیاسي فعالانې نه دي، بلکې یوازې غواړي په خوندي چاپېریال کې ژوند وکړي.
د لوبغاړو د امنیت په اړه اندېښنې هغه مهال زیاتې شوې چې د ایران لوبډلې د اسیا د ښځو د فوټبال جام سیالیو پر مهال د سویلي کوریا پر وړاندې د لوبې مخکې ملي سرود ونه ویلو، چې په ایران کې پرې توند غبرګونونه راوپارېدل.
د استرالیا حکومت ویلي، د ایران د ښځو فوټبال لوبډلې نور غړي هم که وغواړي، کولی شي په دغه هېواد کې د پاتې کېدو غوښتنه وکړي.
بل لور ته د امریکا ولسمشر ډونالډ ټرمپ هم پر دې موضوع غبرګون ښودلی او ویلي یې دي چې که استرالیا دغه لوبغاړې ونه مني، امریکا چمتو ده چې هغوی ته پناه ورکړي.
د اسراییلو لومړي وزیر بنیامین نتانیاهو ویلي چې د اسراییل هیله دا ده چې د ایران خلک له استبدادي نظام څخه خلاص شي، خو ټینګار یې کړی چې د دې هدف پوره کېدل په پای کې د ایران د خلکو په خپله اراده پورې تړلي دي.
نتانیاهو زیاته کړې چې د اسراییلو له لوري تر اوسه ترسره شوي اقدامات د ایران پر وړاندې فشار زیات کړی دی.
د هغه په وینا:«بېشکه د هغو اقداماتو له لارې چې تر اوسه ترسره شوي، موږ د هغوی مقاومت کمزوری کړی، خو زموږ کار لا پای ته نه دی رسېدلی.»
د اسراییلو لومړي وزیر همداراز ویلي، که د اسراییل هڅې د ایران له خلکو سره یوځای بریالۍ شي، نو د سیمې په کچه به بنسټیز بدلونونه رامنځته شي.
د ده په خبره، که د ملتونو په ژوند کې د تلپاتې بدلون امکان وي، نو دوی هڅه کوي داسې بدلون رامنځته کړي.
د طالبانو حکومت تر واک لاندې د چاپیریال ساتنې ادارې مشر مطیعالحق خالص ویلي چې سږ کال به په ټول هېواد کې شاوخوا ۱۰ مېلیونه نیالګي وکرل شي.
هغه زیاته کړې، چې د تېر کال د پلان له مخې شاوخوا ۱۷ مېلیونه نیالګي کرل شوي وو؛ خو سږکال یې هدف شاوخوا ۱۰ مېلیونه ټاکل شوی دی.
خالص له ټولو هېوادوالو غوښتي چې د نیالګیو د کېنولو او ساتنې په برخه کې فعاله برخه واخلي او د چاپیریال ساتنې لپاره هڅې وکړي.
د ایران د بهرنیو چارو وزیر عباس عراقچي ویلي، لا هم ډېر وختي دی چې د مجتبي خامنهیي د امریکا سره د خبرو په اړه نظر څرګند شي.
نوموړي همدا راز د امریکا سره د بیا مذاکراتو په اړه شک څرګند کړی.
عراقچي ویلي:«موږ ټول د هغه څرګندونو او ویناوو په تمه یو چې وروسته به وړاندې شي، خو زه فکر نه کوم چې د امریکایانو سره د خبرو موضوع یا د بیا مذاکراتو مسئله د بحث پر مېز وي، ځکه موږ له امریکایانو سره ډېر ترخه او بده تجربه لرو.»
هغه ټینګار کړی چې ایران د امریکا سره د اړیکو په برخه کې د احتیاط پالیسۍ تعقیبوي او هر ډول پرېکړه د ملي ګټو او تجربو پر بنسټ نیول کېږي.
همدا راز، عراقچي ویلي چې ایران د خپلو اصولو په رڼا کې خپلې ستراتیژیکې تګلارې جاري ساتي او د بهرنیو فشارونو په وړاندې به د ملي پریکړو له حق څخه نه شي تېرېدلی.