د غزې د روغتیا وزارت اعلان کړی چې د سېشنبې له سهار راهیسې د اسراییل په تازه بریدونو کې لږ تر لږه ۱۰۵ فلسطینیان ژوند له لاسه ورکړی، چې په وژل شویو کې ۳۲ هغه کسان هم شامل دي چې د مرستو په تمه ولاړ وو.
یاد وزارت همداراز ویلي، په تېرو ۲۴ ساعتونو کې د درې ماشومانو په ګډون ۱۳ تنه نور فلسطینیان د لوږې او خوارځواکۍ له امله مړه شوي دي.
د چارواکو په وینا، د جګړې له پیل راهیسې د لوږې له کبله د مړو شویو کسانو شمېر ۳۶۱ ته رسېدلی، چې ۱۳۰ ماشومان هم په کې دي.
د طالبانو حکومت د اقتصاد وزارت وايي، د ختیځو ولایتونو د وروستۍ زلزلې د قربانیانو د عاجلو مرستو د چټکتیا لپاره یې له ملګرو ملتونو اړوندو ادارو سره غونډه کړې ده.
د طالبانو حکومت د اقتصاد وزیر دین محمد حنیف له دغو ادارو غوښتي چې بشري مرستې زیاتې او دوامداره کړي.
د ملګرو ملتونو استازو ژمنه کړې چې له نړیوالو بنسټونو څخه د لا ډېرو مرستو د جذب لپاره به کار وکړي.
د طالبانو حکومت د معلوماتو له مخې، یوازې په کونړ کې د وژل شویو شمېر ۱۴۱۱ ته او د ټپیانو شمېر ۳۱۲۴ ته رسېدلی، او شاوخوا ۵۴۱۲ کورونه نړېدلي دي.
متحده عربي امارات د ګډو عملیاتو د قومندانۍ په چوکاټ کې د لټون او ژغورنې ځانګړې ډله افغانستان ته استولې ده.
د اماراتو رسنیو د راپورونو له مخې، دغه ډله د هېواد ختیځو سیمو زلزله ځپلو ته د بیړنیو مرستو رسولو لپاره افغانستان ته ولېږل شوه.
پاکستانۍ اېکسپرېس ټرېبیون ورځپاڼه وایي، چې د طالبانو حکومت تر واکمنېدو څلور کاله وروسته پاکستاني چارواکي مني چې د دوی لومړنۍ هیلې عملي نه شوې او پر افغانستان د هند نفوذ هم کم نه شو.
د راپور له مخې، له طالبانو سره د تحریک طالبان پاکستان (ټيټيپي) ډله بېرته پیاوړې شوې او وسلو او مالي سرچینو ته په لاسرسي سره یې بریدونه زیات کړي دي.
اېکسپرېس تریبیون همداراز ویلي، چې د بلوڅ بېلتون غوښتونکو فعالیتونه هم پراخ شوي دي.
یاده ورځپاڼه وایي، پاکستان هڅه کړې چې طالبان د ټيټيپي پر ضد اقدام ته اړ کړي؛ خو بریالی شوی نه دی.
دغه ورځپاڼه وايي، طالبان نه یوازې دغو ډلو ته پناه ورکوي، بلکې مالي او وسلهوال ملاتړ یې هم کوي.
په راپور کې زیاته شوې چې طالبانو له هند سره پراخې اړیکې ټینګې کړي او د پوځي تجهیزاتو او روزنې لپاره یې نوي ډیلي ته مخه کړې ده.
د ایران د سفارت سرپرست علیرضا بیکدلي د ۸۰ ټنه خوراکي توکو په ګډون له بشري مرستو سره کونړ ته تللی دی.
په دغو مرستو کې ۱۵۰۰ بوجۍ اوړه او ۱۰۰۰ قوطۍ غوړي شامل دي.
بیکدلي د خاص کونړ ولسوالۍ له مسوولانو سره په لیدنه کې د زلزلې د مرګژوبلې او مالي زیانونو له امله خواشیني ښودلې او ډاډ یې ورکړی چې د ایران دولت او ولس د افغانانو ترڅنګ ولاړ دي.
ځايي چارواکو د ایران له مرستو او همدردۍ مننه کړې او ویلي یې دي چې دغه مرستې به د متضررو کورنیو تر لاسونو ورسول شي.
د خېبرپښتونخوا په کُرمه کې پر یوه موټر د ډزو پېښه کې لږ تر لږه پنځه تنه وژل شوي او څو نور ټپیان شوي دي.
ځايي سرچینې وايي، پېښه هغه مهال رامنځته شوه چې ناپېژاندو وسلهوالو پر یوه ملکي موټر ډزې وکړې.
تر اوسه د برید انګیزه روښانه نه ده او مسوولیت یې هم کومې ډلې نه دی منلی.
د بلوچستان په مرکز کویټه ښار کې د شاواني لوبغالي ته څېرمه ځانمرګي برید شوی چې له امله یې ۱۷ تنه وژل شوي او ۳۶ نور ټپیان شوي دي.
برید هغه مهال ترسره شو چې د بلوڅ مشر عطاالله منګل د مړینې د کلیزې مراسم روان وو.
د معلوماتو له مخې، په دغه مراسمو کې د پښتونخوا ملي عوامي ګوند مشر محمود خان اڅکزی او د بلوڅ ملي ګوند مشر اختر منګل هم ګډون درلود؛ خو دواړه له پېښې روغ وتلي.
تر اوسه هېڅ ډلې د برید مسوولیت نه دی منلی.
د خېبرپښتونخوا صوبایي حکومت د افغانستان زلزلهځپلو ته د مرستو د لېږلو په موخه غونډه کړې او ۳۵ لارۍ مرستې یې د طالبانو حکومت قونسلګرۍ ته سپارلي.
په دغو مرستو کې درمل، خیمې، ترپالونه، توشکې، بالښتونه او کمپلې شاملې دي.
د یاد حکومت په وینا، دغه مرستې د زلزلهځپلو کورنیو د بېړنیو اړتیاوو د پوره کولو لپاره برابرې شوې دي او تر هغو به دوام وکړي چې لومړنۍ اړتیاوې پوره شي.
د طالبانو حکومت د خېبرپښتونخوا له دې اقدامه مننه کړې او دا یې د ورورۍ نښه بللې ده.
د امريکا د کالیفورنیا ایالت د سکرمنټو ښار یو شمیر فعالان د کونړ زلزله ځپلو سره د مرستې په پار په افغان مغازو کې د مرستې صندوقونه کیښودل.
ددې کمپاین یوه تن مسول غیرت بهیر حماسه میډیا ته وویل، چې په دې کار دوی غواړي بیړنۍ مرستې راټولې او په وخت د کونړ غمځپلو کورنیو ته ورسیږي.
نوموړي په بهر میشتو هیوادوالو غږ وکړ چې په سخت وخت کې د خپلو خلکو سره ودریږي.
په ختیځ په ځانګړي ډول په کونړ کې د تېرې ورځې زلزلې سلګونه کورنۍ د غم په ټغر کینولي دي.
د طالبانو حکومت د رییس الوزرا اقتصادي مرستیال ملا عبدالغني برادر د سرپل ولایت په بلخاب ولسوالۍ کې د ډبرو سکرو د کان د استخراج او د کانونو ترمنځ د نښلونکي سړک د پرانیستې په مراسمو کې ویلي، چې د هېواد د طبیعي زېرمو کارونه د ملي اقتصاد د پیاوړتیا، د عوایدو د زیاتوالي او د بنسټیزو پروژو د تمویل لپاره حیاتي اهمیت لري.
هغه ویلي، چې د ملي پراختیا شرکت د بلخاب د سکرو کانونو د اسانتیا لپاره له ۲۰۰ کیلومترو زیات سړکونه جغل کړي دي چې له مخې یې د کانونو ترمنځ تګ راتګ او د سکرو انتقال اسان شوی دی.
نوموړي زیاته کړې، چې د بلخاب د سیمې اوسېدونکي به وکولای شي د اړتیا وړ سکاره په مناسب نرخ ترلاسه کړي، او ورسره به په دې ولسوالۍ کې د روغتونونو جوړول، د سړکونو پراختیا او نورو ټولنیزو خدمتونو ته هم ځانګړې پاملرنه وشي.