د پاکستان د بهرنیو چارو وزارت اعلان کړی چې د ترکیې د بهرنیو چارو وزیر هاکان فیدان او د دفاع وزیر جنرال یاشار ګولر د چهارشنبې په سهار اسلام‌آباد ته رسېدلي دي.

د سفر موخه د دواړو هېوادونو تر منځ د ګډو ګټو پر موضوعاتو خبرې اترې ښودل شوې ده.

که څه هم د پاکستان او ترکیې بهرنیو چارو وزارتونو د سفر نور جزییات نه دي ورکړي؛ خو ویل کېږي چې دا سفر د دواړو هېوادونو د نږدې ستراتیژیکو اړیکو په دوام ترسره کېږي.

پاکستان او ترکیې په وروستیو کلونو کې په نظامي، اقتصادي، سیاسي او بشري برخو کې پراخې همکارۍ کړې دي.

ترکیې د هند او پاکستان تر منځ د پولو پر سر نښتو کې د پاکستان د ملي حاکمیت ملاتړ کړی و.

د امریکا په تګزاس ایالت کې د سېلابونو له امله د مړو شمېر لږ تر لږه ۱۰۹ تنو ته لوړ شوی چې ډېری یې ماشومان دي.

دغه سېلابونه د روانې جولای میاشتې په څلورمه راغلي او د تګزاس مرکزي برخې یې سختې ویجاړې کړې دي.

د رویټرز خبري اژانس د ایالتي چارواکو له قوله وايي چې شاوخوا ۱۸۰ نور کسان لا هم ورک دي او د اوبو کموالي او د لټون پراختیا سره کېدای شي مړي نور هم زیات شي.

د افغانستان لپاره د ملګرو ملتونو ځانګړي راپور ورکوونکي، ریچارډ بنت، ویلي چې د طالبانو د مشر شیخ هبت‌الله اخندزاده او د سترې محکمې د رییس عبدالحکیم حقاني د نیولو حکم هغو هېوادونو ته یو څرګند پیغام دی چې غواړي د طالبانو له حکومت سره اړیکې عادي کړي.

ریچارډ بنت په اکس لیکلي، طالبان د ښځو او نجونو اساسي حقونه او کرامت تر پښو لاندې کوي، او د نیولو دا حکم د عدالت پر لور یو لوی ګام دی، په ځانګړي ډول د افغان ښځو لپاره.

دا په داسې حال کې ده چې تېره ورځ نړیوالې جزایي محکمې د بشریت ضد جرمونو له امله د شیخ هبت‌الله اخندزاده او عبدالحکیم حقاني د نیولو حکم صادر کړ.

بل لورته د طالبانو حکومت دا حکم بې‌اساسه بللی او ویلي یې دي چې نړیوال جزایي عدالت نه‌ مني.

د افغان سولې لپاره د امریکا پخواني ځانګړي استازي زلمي خلیل‌زاد له ایران غوښتي چې افغان کډوال دې په مدني او د درناوي وړ ډول بېرته هېواد ته واستوي.

نوموړي ویلي، له ایران څخه یې د افغان کډوالو د ایستلو په اړه اندېښمنوونکي راپورونه ترلاسه کړي او ټینګار یې کړی چې د کډوالو د ایستلو بهیر باید ورو شي یا هم له افغان او نړیوالو مرستندویو بنسټونو سره همغږي وشي.

خلیل‌زاد زیاته کړې چې ډېری افغان کډوال چې له ایران ایستل کېږي، په خپل هېواد کې د اوسېدو مناسب ځای نه لري او افغانستان د جګړې وروسته له سختې بې‌وزلۍ سره مخ دی چې دا شمېر راستنېدونکي په لنډ وخت کې نه شي جذب کولی.

د کابل پخواني والي احمدالله علیزي پر خپل ټویټر لیکلي چې افغانستان دا مهال د کورنیو ستونزو او نړیوالو فشارونو تر منځ راګېر دی او یوازې د ملي تفاهم او ټول‌شموله مشارکت له لارې له دغه کړکېچه وتلی شي.

نوموړي د روسیې له‌خوا د طالبانو حکومت د رسمیت پېژندنه د روسیې د خپلو اهدافو برخه بللې.

هغه ټینګار کړی چې بهرني هېوادونه نه‌شي کولای د افغانستان لپاره سیاسي ثبات جوړ کړي او افغانان باید خپله د هېواد د راتلونکي پرېکړه وکړي.

ښاغلي علیزي د طالبانو حکومت له مشرتابه غوښتي چې ټول افغان مشران، له هر قوم او تفکره، راټول او د ملي اجماع لپاره زمینه برابره کړي.

د اسرائيلو لومړي وزير، بنیامین نتنیاهو د ايران د اتومي پروګرام او بالستيک توغنديو په اړه وويل چې دا دواړه د اسرائيلو لپاره ستر ګواښ وو او اوس د امريکا سره په ګډه دغه ګواښونه له منځه تللي دي؛ خو دا معنی نه لري چې بيا به بيرته راژوندي نشي.

هغه وويل اسرائيل به د ايران د اتومي او توغندي پروګرامونو څارنه کوي ترڅو د دوی د بيا فعالېدو مخه ونيول شي.

نتنياهو زياته کړه چې د امريکا او اسرائيلو بريدونو د منځني ختيځ څېره بدله کړې ده او دې سره د اسرائيلو او عربي او مسلمانو هيوادونو ترمنځ د ابراهيمي تړون پراختيا ته لاره پرانيستې ده.

د طالبانو حکومت ویاند ذبیح‌الله مجاهد د طالبانو حکومت د مشرانو د نیولو په تړاو د نړیوالې محکمې پرېکړه رد کړې.

هغه ویلي، «اسلامي امارت» دا محکمه نه پېژني او نه ورته کوم التزام لري.

نوموړي دا اقدام د اسلامي شریعت او د مسلمانانو د عقیدې پر وړاندې ښکاره دښمني بللې ده.

مجاهد زیاتوي، دا ډول پرېکړې د «اسلامي امارت» پر شرعي دریځ هېڅ اغېز نه شي کولای.

د امریکا د بهرنیو چارو وزارت ویلي، د طالبانو حکومت د دوی له نظره یوه نړیواله ترهګره ډله ده.

دا څرګندونې د روسیې له خوا د طالبانو حکومت د رسمیت پېژندلو په غبرګون کې شوې دي.

یاد وزارت زیاته کړې، دا د حیرانتیا خبره نه ده چې روسیه له شریرو لوبغاړو سره همکارۍ ته دوام ورکوي.

نړیوالې محکمې «لاحه» د طالبانو حکومت د مشر شیخ هبت‌الله اخندزاده او د طالبانو د سترې محکمې قاضي القضات عبدالحکیم حقاني د نیولو حکم صادر کړی.

نړیوالې محکمې شیخ هبت‌الله او عبدالحکیم حقاني د بشري حقوقو ته د نه درناوي او د بشریت پر وړاندې د جنایت په جرم تورن کړي دي.

د امریکا ولسمشر، ډونالډ ټرمپ د فلسطينيانو د انتقال په اړه د پرمختګونو خبر ورکړ.

ټرمپ د دوشنبې په ماښام له بنیامین نتانیاهو سره خبریالانو ته وویل چې امریکا او اسراییل له هغو هېوادونو سره کار کوي چې غواړي فلسطینیانو ته یو ښه راتلونکی برابر کړي.

هغه وویل چې د اسراییل شاوخوا هېوادونو په دې برخه کې ښه همکاري کړې ده.

نتانیاهو هم وویل چې که خلک غواړي پاتې شي، پاتې کیدای شي او که غواړي ولاړ شي، باید دا زمینه ورته برابره شي، چې په اسانه لاړ شي.

دا په داسې حال کې ده، چې اوس مهال د اسرائیل مذاکراتي ټیم په دوحه کې د خبرو لپاره په چمتووالي بوخت دی.