په ترکمنستان کې د طالبانو حکومت د سفارت سرپرست فضل محمد صابر د پاکستان له سفیرې فریال لغاري سره لیدلي دي.
دواړو د دوه اړخیزو سوداګریزو اړیکو، پاکستان کې د افغان کډوالو ستونزو او د ویزو اسانتیاوو په اړه خبرې کړې دي.
پاکستانۍ سفیرې ژمنه کړې چې دغه موضوعات به له خپل حکومت سره شریکوي.
نوموړې د کابل او اسلاماباد ښې اړیکې مهمې بللي او د ستونزو د حل لپاره یې د اړیکو پراختیا اړینه ګڼلې ده.
د افغانستان لپاره د ملګرو ملتونو ځانګړي راپور ورکوونکي ریچارډ بنیټ د طالبانو حکومت د مشرانو پر ضد د نړیوالې جنايي محکمې د نیولو حکم ستایلی او دا یې د معافیت فرهنګ پر ضد مهم ګام بللی دی.
بنیټ ویلي، دا پرېکړه ښځو، نجونو او افغان ولس ته دا پیغام ورکوي چې غږ یې اورېدل شوی او درناوی یې شوی دی.
د نړیوالې جنايي محکمې په وینا، د طالبانو حکومت مشر شیخ هبتالله اخوندزاده او قاضيالقضات عبدالحکیم حقاني له ۲۰۲۱ تر ۲۰۲۵ پورې د ښځو او زیانمنو ډلو پر وړاندې بشري ضد جنایتونه کړي.
د طالبانو حکومت دا حکم بېاساسه او بېاغېزې بللی.
د طالبانو حکومت د کډوالو د ستونزو د حل عالي کمیسیون ویلي، چې په تېرو ۱۹ ورځو کې لږ تر لږه ۵۰۵ زره او ۳۸۹ افغان کډوال له ایرانه ایستل شوي دي.
دوی زیاتوي، یوازې د چنګاښ په ۲۰مه نېټه ۳۰ زره او ۵۱۹ کسان د اسلامقلعه او پُلابریشم له لارې هېواد ته داخل شوي دي.
د کمیسیون په وینا، له دغو کسانو ۲۱۲ زره او ۳۲۲ تنه جبري ایستل شوي، او ۲۹۳ زره او ۶۷ نور په خپله خوښه راستانه شوي دي.
خبرپاڼه زیاتوي، چې د چنګاښ په ۱۹مه هم ایران ۳۲ زره او ۷۳۸ افغانان له خاورې ایستلي دي.
د افغان کډوالو له ایرانه ایستل لا هم دوام لري.
الجزیرې راپور ورکړی چې د اسرائیل په تازه بریدونو کې په غزه کې لږ تر لږه ۱۷ کسان وژل شوي، چې درې تنه یې د یوې کورنۍ غړي وو.
دا بریدونه داسې مهال شوي چې امریکايي چارواکو د حماس او اسرائیل تر منځ د اوربند د احتمالي توافق خبر ورکړی و.
د ټرمپ ځانګړي استازي استیو ویتکاف ویلي، د اختلاف موارد له څلورو یو ته راکم شوي او هیله ده د اوونۍ تر پایه د ۶۰ ورځني اوربند موافقه وشي، چې له مخې به یې ۱۰ ژوندي یرغمل شوي کسان او د ۹ نورو مړي خوشې شي.
د طالبانو حکومت په بغلان کې شپږ کسان د شرابو د څکلو په تور نیولي دي.
د طالبانو حکومت د امربالمعروف وزارت ویاند سیفالسلام خیبر ویلي، دا کسان د تاله و برفک ولسوالۍ د عاشقان درې په یوه میلمهخانه کې د شراب څښلو پر مهال نیول شوي.
ویاند زیاتوي، نیول شويو کسان “نور غیرشرعي کارونه” هم کول.
نوموړي دغه راز ویلي، چې دوی تر لومړنۍ پلټنې وروسته عدلي او قضايي ارګانونو ته سپارل شوي دي.
د متحدې جبهې مشر جنرال سمیع سادات د مولانا خانزیب د وژنې په تړاو خواشیني څرګنده کړې او ویلي یې دي چې خانزیب په خپله سیمه کې د امن او آزادۍ یو اغېزناک او زړور غږ و، چې د مذهبي افراطیت او نیابتي ترهګرۍ پر ضد یې مبارزه کوله.
جنرال سادات ویلي، د مولانا خانزیب مړینه د هغو زرګونو مبارزینو د سیستماتیکې او هدفمندې وژنې تسلسل دی، چې دښمن غواړي په لر او بر افغانستان کې جهالت او افراطیت حاکم اوسي او په وینا یې بزدله دښمن یي حتی په شهادت رسولو مسؤلیت نشي اخستلی.
نوموړي د مولانا خانزیب کورنۍ او د ازادۍ د لارې ملګرو ته د زړه له کومي تسلیت ویلی.
هغه په پای کې ویلي: «هغه نه دی مړ، زموږ د کړنو د طریقه ژوندی دی.»
د اوکراین ولسمشر ولودیمیر زلنسکي اعلان کړی چې د امریکا له لوري پوځي مرستې، چې څه وخت مخکې ناڅاپه بندې شوې وې، بېرته پيل شوې دي.
زلنسکي ویلي، له امریکا، په ځانګړي ډول د جنرال کیت کلوګ چې د ډونالډ ټرمپ ځانګړی استازی دی، ورسره پوځي همکاري روانه ده.
پخوا پینټاګون د ځینو هوايي دفاعي توغندیو او توپچي ګولیو لېږد درولی و، څو د خپلو وسلو ذخیرې وارزوي.
تر دې وړاندې د امریکا ولسمشر ډونالډ ټرمپ ویلي و، چې غواړي اوکراین ته نور وسلې واستوي.
د طالبانو حکومت تر واک لاندې د خوست نړیوال هوایي ډګر چارواکي وایي چې ډېر ژر به د کام ایر شرکت له لارې له خوست څخه کویټ ته مستقیمې سوداګریزې الوتنې پیل شي.
دوی وایي، دا لومړی ځل دی چې له خوست څخه کویټ ته مستقیمه الوتنه ترسره کېږي، او ټاکل شوې هره چهارشنبه له جولای ۲۳مې وروسته دا پروازونه ترسره شي.
چارواکي تمه لري چې دا به د ختیځو ولایتونو اوسېدونکو ته د سفر اسانتیاوې برابرې کړي.
د اسراییلو د لومړي وزیر دفتر د نیویارک ټایمز هغه راپور رد کړی چې بنیامین نتانیاهو یې د خپلې سیاسي بقا لپاره د غزې د جګړې د اوږدولو په تور تورن کړی و، او دا یې “توهین، دروغ او د بېاعتباره سیاسي فعالانو تکراري خبرې” بللي دي.
د دفتر په وینا، د نتانیاهو مشري ددې سبب شوې چې د نړیوالو او کورنیو مخالفتونو سره سره د حزبالله، د اسد رژیم، حماس او د ایران د اټومي ګواښونو پر ضد مهم عملیات ترسره شي.
بیان زیاتوي، که نتانیاهو د لوړپوړو امنیتي چارواکو مشورې منلې وای؛ نو دا بریاوې به نه وای ترلاسه شوې؛ ځکه هغوی ترې غوښتې و، چې د حماس شرایط ومني او جګړه ژر ختمه کړي.
دفتر وايي، نیویارک ټایمز چې د کومو کسانو له خولې خبرې کړې، هغوی هماغه چارواکي دي چې نتانیاهو یې مشورې رد کړې او اوس برطرفه شوي دي.
د ملګرو ملتونو د خوړو نړیوال پروګرام خبرداری ورکړی چې په غزه کې د لوږې بحران بېسارې کچې ته رسېدلی او د مرستو رسونه تقریباً درېدلې ده.
د دې ادارې مرستیال کارل اسکائو، چې تازه له غزې راستون شوی، ویلي چې وضعیت تر بل هر وخت ډېر خراب شوی او نړیوالې ادارې د مرستو توان له لاسه ورکړی.
نوموړي ویلي، شاوخوا ۹۰ زره ماشومان بیړنۍ درملنې ته اړتیا لري او له هر درې کسانو یو یې ورځ بې خوړو تېروي.
بلخوا، د الجزیرې د راپور له مخې، تازه د اسراییلي بریدونو له امله لږ تر لږه ۴۵ فلسطینیان وژل شوي، چې ۱۱ یې د خوړو د مرستې د ترلاسه کولو په لیکه کې ولاړ وو.