ځايي سرچینو راپور ورکړی چې د خېبرپښتونخوا د بنو ولسوالۍ په بکه خېل سیمه کې د نن سهار شاوخوا څلور بجې هوايي برید شوی دی.
د راپورونو له مخې، په برید کې د نرمېخېل په سیمه کې یوه ښوونځی او د پخواني وزیر یوه حجره په نښه شوې ده.
سرچینې وایي، د پېښې پر مهال د تحریک طالبان پاکستان (TTP) غړي او د طالبانو د یو قومندان صدیقالله ګربز اړوند کسان په دغه ځای کې موجود وو.
تر اوسه نه کومو چارواکو د برید پخلی کړی او نه یې هم رد کړی دی، او د تلفاتو په اړه کره معلومات نشته.
د خېبرپښتونخوا په لوړ دېر سیمه کې د پاکستاني پوځ او وسلهوالو ترمنځ تازه نښتې شوې دي چې په ترڅ کې یې لږ تر لږه ۷ پوځیان وژل شوي دي.
امنیتي سرچینو ویلي چې جګړه تېره شپه پیل شوې او د څو ساعتونو لپاره روانه وه.
د راپورونو له مخې، وسلهوالو د پوځ پر پوستو ډلهییز بریدونه کړي چې له امله یې دواړو لورو ته تلفات اوښتي؛ خو د وسلهوالو د مرګ ژوبلې په اړه کره معلومات نه دي ورکړل شوي.
دا پېښه پر داسې مهال رامنځته کېږي چې یوازې یوه ورځ وړاندې په سویلي وزیرستان کې ټيټيپي د یو برید په ترڅ کې ۱۲ پاکستاني سرتېري وژلي وه.
د جرمني پولیسو ویلي، چې د افغان او سوریایي کډوالو ترمنځ د شخړې په ترڅ کې یو ۲۰ کلن ځوان د چړو په برید کې وژل شوی دی.
پولیس وايي، شاوخوا ۱۵ کسانو پر درېیو کسانو برید کړی چې په نتیجه کې یو ځوان ژوند له لاسه ورکړی او دوه نور ټپیان شوي.
پېښه د هومبولتفوروم هنري او کلتوري مرکز ته څېرمه رامنځته شوې ده.
د جرمني رسنیو د راپورونو له مخې، د برید د ښکېلو کسانو په شمېر کې توپیر شته.
ځینې سرچینې وايي چې د سوریایانو ۱۵ کسیزې ډلې پر افغانانو برید کړی، خو نورې بیا ادعا کوي چې برید کوونکي درې سوریایان وو او افغانانو ۱۵ تنه وه.
د څارنوالۍ د معلوماتو پر بنسټ، لاهم د پېښې د عاملانو د پېژندلو او د څرنګوالي پلټنې روانې دي.
سرچینې زیاتوي چې د تېر اګسټ په میاشت کې هم د همدې سیمې په شاوخوا کې د افغان او سوریایي کډوالو نښته شوې وه چې شپږ کسان یې ټپیان کړي وو.
د فرانسې نوی لومړی وزیر سباستین لوکورنو ویلي، د هېواد د مالي ثبات د خوندي کولو لپاره به عملي ګامونه پورته کړي.
نوموړي ټینګار کړی چې د ۲۰۲۶ کال بودجه به د سیاسي مخالفینو په همکارۍ د تصویب لپاره وړاندې کړي.
لوکورنو د خپل مخکېني سلف هغه طرحه هم بېرته واخیسته چې له مخې یې د دوو رسمي رخصتیو د کمولو پلان مطرح شوی و.
نوموړي زیاته کړې چې دا بدلون د بودجوي کسر د راکمولو او د سیاسي بېثباتۍ د مخنیوي په هدف ترسره کېږي.
د چین ځانګړي استازي یو شیایونګ ویلي چې د افغانستان په تړاو یې د تاجیکستان په پلازمېنه دوشنبه کې د شانګهای همکاریو سازمان د غونډې په څنډه کې له روسیې، ایران او پاکستاني استازو سره سلا مشورې کړي دي.
د هغه په وینا، په دې څلور اړخیزه کتنه کې د افغانستان د راتلونکي په اړه د ګډو همکاریو، تعامل او د بیارغونې په بهیر کې د عملي ونډې پر اړتیا ټینګار شوی دی.
دغه ناسته د تاجیکستان په کوربتوب ترسره شوې او ګډونوالو یې د افغانستان د ثبات او پرمختګ لپاره د سیمهییزو هېوادونو د ګډو هڅو پر اهمیت خبرې کړې.
د پاکستان لومړي وزیر شهباز شریف د ۱۲ سرتېرو د جنازې له ګډون وروسته په بنو کې یوې امنیتي ناستې ته ویلي، افغانستان باید روښانه کړي چې د پاکستان ترڅنګ ولاړ دی که د ترهګرو.
نوموړي ټینګار کړی چې ابهام د منلو وړ نه دی او ترهګر به په کلکه ځپي.
شریف یو ځل بیا ادعا کړې چې افغان وګړي د پاکستان په ناامنیو کې ښکېل دي او ویلي یې دي چې ناقانونه مېشت افغان کډوال به ډېر ژر له هېواده وشړي.
هغه د هند په ملاتړ ډلو ته هم ګواښ کړی او ویلي یې دي چې ورته په کلکه ځواب ورکوي.
دغه څرګندونې وروسته له هغه شوې چې تېره ورځ د ټيټيپي برید کې ۱۲ پاکستاني پوځیان وژلي او څلور نور یې ټپیان کړي دي.
د طالبانو حکومت د دغو ادعاوو په اړه تر اوسه څه نه دي ویلي.
د محمود شاه حبیبي ورور، احمد شاه حبیبي، ویلي چې کابل ته د امریکا د ولسمشر د ځانګړي استازي ادم بولر د سفر اصلي هدف د هغه د ورور خوشې کول دي.
نوموړي د شنبې په ورځ ویلي چې د ټرمپ ادارې ورته ډاډ ورکړی تر څو چې محمود شاه حبیبي ازاد نه شي، له طالبانو سره به هېڅ ډول تعامل ونه کړي.
احمد شاه زیاتوي، د طالبانو په بند کې د حبیبي ترڅنګ نور امریکایي بندیان هم شته او که خوشې نه شي، امریکا به پر طالبانو نوي اقتصادي او سفري بندیزونه ولګوي.
محمود شاه حبیبي، چې افغان الاصله امریکایي دی، په ۲۰۲۲ کال کې د طالبانو لخوا د القاعده د مشر ایمن الظواهري د استوګنځای د پیژندلو په تور نیول شوی و.
ادم بولر نن په ناڅاپي سفر کابل ته رسېدلی او د طالبانو حکومت له لوړپوړو چارواکو سره یې لیدلي دي.
د طالبانو حکومت د ریاست الوزراء اقتصادي مرستیال ملا عبدالغني برادر اخوند نن په ارګ کې د امریکا د ولسمشر د بندیانو چارو ځانګړي استازي ادام بویلر په مشرۍ پلاوي سره، چې پخوانی امریکايي استازی زلمی خلیلزاد هم پکې شامل و، لیدنه وکړه.
ارګ په یوه خپره کړې خبرپاڼه کې ویلي، چې په دې ناسته کې دواړو لورو د افغانستان او امریکا ترمنځ پر دوه اړخیزو سیاسي او اقتصادي اړیکو، د سیمې پر وضعیت او د زندانیانو د تبادلې پر موضوع خبرې کړې.
د خبرپاڼې له مخې، ملا برادر په دې ناسته کې ویلي چې د «اسلامي امارت» تر واکمنېدو وروسته د افغانستان اقتصادي وضعیت ښه شوی، اداري فساد او د نشهيي توکو کښت او قاچاق بند شوي، صادرات او ملي عواید لوړ شوي او د کورنیو تولیداتو کچه لوړه شوې ده.
خبرپاڼې ویلي، چې نوموړي ټینګار وکړ چې د پانګونې لپاره اسانه قوانین جوړ شوي او د اقتصادي پراختیا لپاره ملي ستراتیژي او مشورتي بورډ رامنځته شوی دی.
هغه له امریکا غوښتي چې پر افغانستان د فشار پر ځای تعامل ته مخه کړي او د هېواد په بیارغونه او پانګونې کې رول ولوبوي.
خبرپاڼه زیاتوي چې امریکايي استازي ادام بویلر د افغانستان د اقتصادي پرمختګ ستاینه کړې او ویلي چې دواړو هېوادونو د دوحې تړون ښه عملي کړی دی.
نوموړي زیاته کړې چې امریکا د افغانستان له خصوصي سکتور سره د ګډو پانګونو لپاره تیاره ده او دواړه لوري به د زندانیانو د تبادلې پر سر همکاري وکړي.
بویلر د افغانستان د امنیتي وضعیت د ښه کېدو او د نشهيي توکو د قاچاق پر ضد د عملي اقداماتو هرکلی هم کړی.
د «افغانټایمز» رسنۍ مدیره سلما نیازۍ د هند او پرو له دوو نورو خبریالانو سره یو ځای د ۲۰۲۵ کال د «ځوان خبریال» نړیوالې جایزې ګټونکې اعلان شوې ده.
دا جایزه د نړیوالو ځوانو رهبرانو ټولنې لهخوا ورکول کېږي.
سرچینې ویلي، چې د سلما نیازۍ ژورنالېستي فعالیتونه د افغانستان نویو ښځینه خبریالانو ته الهامبښونکي دي او د ښځو لپاره د غږ، حقیقت او مقاومت یوه نمونه ده.
نیازۍ، چې د طالبانو حکومت له بیا واکمنېدو وروسته پاکستان ته تللې وه، له دوو کلونو پټ ژوند وروسته ایرلنډ ته کډواله شوې ده.
نوموړې له هغه ځایه خپل کار ته دوام ورکړی او له هغو خبریالانو سره یې همکاري کړې چې لا هم په افغانستان کې پټ فعالیت کوي.
د ټایمز اف انډیا د راپور له مخې، د طالبانو حکومت د عامې روغتیا وزارت د درملو او خوړو مرستیال وزیر، حمدالله زاهد، تېره اونۍ هند ته سفر کړی و.
راپور زیاتوي، د نوموړي د سفر هدف د روغتیايي او درمل جوړونې نندارتون کې ګډون و.
ورځپاڼې همدارنګه لیکلي، دغه سفر په داسې وخت کې شوی چې ګنګوسې دي د طالبانو حکومت د بهرنیو چارو وزیر امیر خان متقي ښايي روان کال هند ته سفر وکړي.
هند تر اوسه د طالبانو حکومت په رسمیت نه دی پېژندلی؛ خو له کابل سره د اړیکو د ښه کېدو هڅې یې پیل کړې دي.