د ننګرهار د طالبانو حکومت امنیه قومندانۍ ویاند سید طیب حماد وایي، په خوګیاڼو ولسوالۍ کې یو هایلکس موټر چې په ډېرې چټکۍ روان و، په چمتلې سیمه کې پر دوو ښځو وربرابر شوی، چې دواړه یې ځای پر ځای وژلي.
د طالب چارواکو په وینا، موټر چلوونکی نیول شوی او ډېر ژر به عدلي او قضایي ارګانونو ته وسپارل شي.
ایراني رسنیو راپور ورکړی چې په تهران کې یوه ۲۵ کلنه افغانه ښځه له خپلو درې ماشومانو سره وژل شوې ده.
دا پېښه د تهران په مرتضیګرد سیمه کې رامنځته شوې ده.
راپورونه وايي چې د جمعې په ماښام یوې مېرمنې له پولیسو سره اړیکه نیولې او ویلي یې دي چې له ګاونډي کورنۍ یې څو ورځې هیڅ درک نشته او د تعفن بوی ترې خپریږي.
پولیسو له پلټنو وروسته وموندله چې درې ماشومان چې عمرونه یې ۲، ۳ او ۵ کاله دي، د خفګان له امله وژل شوي او مور یې په چړو وهل شوې ده.
ویل کېږي چې دې ښځې له یوه ۷۰ کلن سړي سره واده کړې وه، چې څو ورځې مخکې بېرته افغانستان ته تللی؛ خو لا معلومه نه ده چې دا سفر په خپله خوښه و که له ایرانه ایستل شوی دی.
پولیسو ویلي چې د دې “وحشتناکې پېښې” د عامل یا عاملینو د پېژندلو لپاره پلټنې روانې دي.
د بریتانیا سانډي ټایمز ورځپاڼې په یوه څېړنیز راپور کې افشا کړې چې اسراییل په تېرو ۱۲ میاشتو کې د استخباراتي او نظامي عملیاتو له لارې د ایران د امنیتي، نظامي او هستهیي جوړښتونو ژورو برخو ته ننوتی او قوي ضربې یې ورکړي دي.
دغه راپور کې ویل شوي چې د جولای ۳۰مه، ۲۰۲۴، ماښام مهال، اسراییلي توغندیو د حماس د سیاسي مشر اسماعیل هنیه استوګنځی په تهران کې وویشت، او هممهاله، د حزبالله یو مشر فؤاد شکر په بیروت کې ووژل شو. دا هممهاله بریدونه د اسراییلي ستراتیژۍ نوی پړاو بلل شوی دی.
راپور زیاتوي چې اسراییلي عملیاتو د ایران ګڼ شمېر هستهیي پوهان وژلي، د نطنز او فردو غنیسازي تاسیسات خراب شوي، او د وسلو جوړولو مهم مرکزونه له منځه وړل شوي دي.
موساد د پرمختللو وسایلو لکه له مخکې تنظیم شويو واکيټاکيو له لارې، د حزبالله زرګونه کسان څارلي او هدف ګرځولي دي.
رپوټ وايي چې د اسراییلو استخباراتي ادارې موساد او نظامي استخبارات (آمان) ترمنځ سیالي روانه ده؛ خو دا سیالي د تخنیکي پرمختګونو سبب شوې ده.
د اسراییلو پوځ اعلان کړی چې د یکشنبې له سهاره به د غزې په ګڼ میشتو سیمو کې “بشري وقفې” عملي کړي څو د مرستو وېش ته زمینه برابره شي.
دا اقدام وروسته له هغه کېږي چې د سختې لوږې له امله لسګونه فلسطینیان مړه شول.
د پوځ ویاند ویلي، اسراییل به د خوړو هوايي انتقال ته هم اجازه ورکړي.
د بشري مرستو لپاره ځانګړي لارې پرانیستل شوې دي، او مرستې لکه اوړه، بوره او کنسروي خواړه د نړیوالو ادارو لخوا برابر شوي دي.
فلسطیني سرچینو تایید کړې چې دا مرستې د غزې شمال ته رسېدلي دي.
خو مرستندویه ادارې اسراییل تورنوي چې د مرستو مخنیوی کوي.
د غزې د روغتیا وزارت ویلي، تر اوسه له لوږې ۱۲۵ کسان، چې ۸۵ یې ماشومان دي، مړه شوي دي.
د طالبانو حکومت د بهرنیو چارو سرپرست وزیر، امیرخان متقي د خوړو نړیوال سازمان له مشر جان ایلیف سره د لیدنې پر مهال غوښتنه کړې چې افغانستان ته دې یوازې بېړنۍ مرستې نه، بلکې پرمختیایي برخو ته هم پاملرنه وشي.
د طالبانو حکومت د بهرنیو چارو وزارت په خبرپاڼه کې ویل شوي، چې دواړو لوریو د راستنو شویو کډوالو د مرستو، ستونزو د حل او مؤثرو همکاریو په اړه خبرې کړې دي.
په خبرپاڼه کې د جان ایلیف له قوله ویل شوي، چې دوی به له مرسته کوونکو سره د پرمختیایي پروژو په اړه بحثونه وکړي.
په ترکمنستان کې د طالبانو حکومت د سفارت سرپرست فضل محمد صابر د بیلاروس له سفیر سټنیسلاو چپورنوی سره کتلي او د سیاسي، اقتصادي همکاریو، پانګوالو فرصتونو او د پلاوي تګ راتګ په اړه یې بحث کړی دی.
د طالبانو حکومت سفارت د خبرپاڼې له مخې، دواړو خواوو د هر اړخیزو همکاریو پر پراختیا ټینګار کړی دی.
بلخوا، په قرغیزستان کې هم د طالبانو حکومت د سفارت سرپرست د قطر له سفیر سره د طالبانو حکومت د رسمیت پېژندنې پر موضوع خبرې کړې دي.
د ایران د سیستان و بلوچستان په مرکز زاهدان کې د شنبې په ورځ وسلهوالو د ولایت د عدلیې پر ودانۍ برید کړی، چې له امله یې لږ تر لږه ۹ کسان وژل شوي او ۲۲ نور ټپیان دي.
د سپاه پاسداران د قدس قرارګاه په وینا، ډېری قربانیان عام خلک دي او په وژل شویو کې یوه ښځه او یو ماشوم هم شامل دي.
دوی زیاتوي چې د ځینو ټپیانو حالت نازک دی.
د سپاه په وینا، درې بریدګر چې چاودیدونکي واسکټونه یې درلودل، په نښته کې وژل شوي دي.
بل لورته بیا وسلهوالې ډلې جیشالعدل د برید مسؤلیت منلی او ویلي یې دي چې هدف یې د محکمې قاضیان او کارکوونکي وو، کوم چې د دوی په وینا د بلوڅو لپاره د اعدام حکمونه او د کورونو د ویجاړولو پرېکړې کوي.
جیشالعدل ادعا کړې چې په برید کې یې تر ۳۰ زیات امنیتي او قضایي مامورین وژلي.
د ایران ولسمشر، مسعود پزشکیان ویلي چې چمتو دی افغانستان ته سفر وکړي او د دواړو هېوادونو ترمنځ د اړیکو نوې پاڼه پرانیزي.
پزشکیان دا څرګندونې د بهرنیو چارو وزارت له چارواکو سره په یوه ناسته کې کړې دي.
هغه ویلي، چې له ګاونډیو هېوادونو سره د اړیکو پراخول باید د تهران د بهرني سیاست له مهمو لومړیتوبونو څخه وي.
د طالبانو حکومت په بند کې د برتانوي جوړې زوی جاناتان رینولدز وايي چې مور او پلار یې سخت ناروغه دي او باید ژر روغتون ته ولېږدول شي.
دی وایي، باربي او پیتر له شپږو میاشتو راهیسې په زیرزمیني کې بې له لمر ساتل شوي او روغتیایي حالت یې خراب شوی دی.
رینولدز خبرداری ورکړی، چې ممکن هغوی خپل ژوند له لاسه ورکړي.
د ګاردین په وینا، د برتانیا د بهرنیو چارو وزارت چارواکو له دې جوړې سره لیدنه کړې؛ خو د خلاصون په اړه یې څه نهدي ویل شوي.
یادې جوړې له ۱۸ کلونو راهیسې په بامیانو کې د ښوونې برخه کې کار کاوه او د تېر کال په دلوې میاشت کې نیول شوې ده.
د ترکیې ساحلي ګارد وایي، چې ۳۸ افغان کډوالیې د دغه هېواد د چناققلعه ښار د آیواجیک سواحلو ته نږدې په یوه پلاستیکي کښتۍ کې نیولي دي، چې له منځه یې شل ماشومان دي.
د ترکیې رسنیو راپور ورکړی، چې دغو کډوالو هڅه کوله، له ترکیې څخه د یونان لیسبوس ټاپو ته په غیرقانوني توګه واوړي.
د چارواکو په وینا، نیول شوي کسان تر طبې معایناتو وروسته د کډوالو د ساتنې او ایستنې مرکزونو ته لېږدول شوي، او د پېښې په تړاو څېړنې روانې دي.
په وروستیو اوونیو کې له خطرناکو لارو اروپا ته د مهاجرت کچه لوړه شوې، او ترکیې د سمندري لارو د څار لپاره امنیتي تدابیر زیات کړي دي.