د مدیترانې په ګڼو هېوادونو کې د سختې ګرمۍ او تندو بادونو له امله پراخ ځنګلي اورونه بل شوي دي.
یوازې په ترکیه کې له ۳۶۰۰ زیات کسان له خپلو کورونو وتلو ته اړ شوي دي.
په اسکيشهیر کې ۱۰ اوروژونکي وژل شوي، او لسګونه کسان ژوبل دي.
یونان کې په تېرو ۲۴ ساعتونو کې ۴۴ اورونه ثبت شوي، په کیترا ټاپو کې اور له بادونو سره بیا تازه شوی دی.
په البانیا کې ۹۰۰ اوروژونکي د پوځ په ملاتړ هڅه کوي چې اور ساحلي ښار ساراندا ته ونهرسېږي.
بلغاریا کې هم یو لوی اور ۶۴۰۰ هکتاره ځمکه سوځولې ده.
د طالبانو حکومت ژمنه کړې چې د ازبکستان–اسلاماباد د اوسپنې پټلۍ امنیت به تأمینوي.
ډان ورځپاڼې ویلي، چې دا ژمنه د پاکستان د بهرنیو چارو وزیر محمداسحاق ډار د وروستي سفر پر مهال شوې.
د پاکستان د اوسپنې پټلۍ وزیر حنیف عباسي ویلي، چې د طالبانو حکومت له دې پروژې ملاتړ کوي.
یاد ریل به د افغانستان له لارې ۸۵۰ کیلومتره اوږد د پاکستان، افغانستان او ازبکستان ترمنځ نښلونکی خط وي.
دا ژمنه وروسته له هغه شوې چې د پاکستان او ازبکستان د بهرنیو چارو وزیرانو د امکانسنجۍ هوکړه هم په کابل کې لاسلیک کړې وه.
د طالبانو حکومت مشر شیخ هبتالله اخوندزاده تازه امر کړی چې هغه کتابونه چې “منحرف” بلل شوي، له کتابپلورنځیو، کتابتونونو، مدرسو او پوهنتونونو څخه باید راټول شي.
راپورونه ښيي چې ګڼ مذهبي، فکري او کلتوري آثار لکه د خلیل جبران «پیغمبر» او د یووال نوح هراري «انسان خردمند» کتابونه له لاسرسي ایستل شوي.
د دې پریکړې د پلي کېدو لپاره د طالبانو حکومت اړوند وزارتونو ګډه ناسته کړې.
دغه اقدام په کور دننه او بهر توند غبرګونونه راپارولي او د بیان ازادۍ او فکري محدودیتونو په اړه اندېښنې زیاتې شوې دي.
د ایران د بهرنیو چارو وزارت ویاند اسماعیل بقایي ویلي چې د طالبانو حکومت رسمیت پېژندنه د ایران د حاکمیت موضوع ده، او هر وخت چې تهران یوې پرېکړې ته ورسیږي، خپل رسمي دریځ به اعلان کړي.
نوموړي زیاته کړې چې ایران له افغانستان سره پراخ تماسونه لري او غواړي دا اړیکې دوام ومومي.
هغه ویلي، چې د ایران د بهرنیو چارو وزیر په خپلو ټولو خبرو کې د ایران د حقابې موضوع له افغان لوري سره یاده کړې ده.
د پاکستان د فضا ملي تحقیقاتو ادارې (سوپارکو) اعلان کړی چې د دغه هېواد تازه سپوږمکۍ پیآراساس به د راتلونکې سهشنبې په ورځ د چین له شیچانګ فضايي مرکز څخه مدار ته ولېږدول شي.
د سوپارکو چارواکي وايي، دا ماموریت د پاکستان د فضا پراخولو لپاره د جوړ شوي اوږدمهاله پلان “ویژن ۲۰۴۷” برخه ده.
دا سپوږمکۍ به د ځمکې د مشاهدې، د طبیعي منابعو د مدیریت، او د طبیعي افتونو د څار لپاره کارول کېږي.
د جیونیوز راپور له مخې، پیآراساس له پرمختللو عکساخیستونکو وسایلو سره مجهزه ده او تمه ده چې د کرنې، ښاري پلان جوړونې، د بحران مدیریت، او د چاپېریال د څار په برخو کې مهم رول ولوبوي.
الجزیره وایي، چې نن دوشنبه اسرائیلي بریدونو کې لږ تر لږه ۴۱ فلسطینیان وژل شوي دي.
د راپورونو له مخې، اته تنه ملکي وګړي هغه مهال ووژل شول چې د خوړو ترلاسه کولو پر مهال په نښه شول.
دا بریدونه له هغې وروسته هم روان دي چې اسرائیل اعلان کړی و، هره ورځ به لس ساعته د عملیاتو وقفه کوي، څو بشري مرستې غزې ته ورسوي.
دغه وقفه به له لسو بجو څخه تر اتو بجو پورې د غزې په ځینو سیمو لکه المواسي، دیرالبلح او غزې ښار کې وي.
ملګرو ملتونو تایید کړې چې تر ۱۰۰ زیات د مرستو موټرونه غزې ته داخل شوي؛ خو وایي دا لا هم د قحطۍ مخنیوي لپاره کافي نه دي.
د ایران د بهرنیو چارو وزیر عباس عراقچي ویلي، د ایران او لویدیځ ترمنځ مسئله هېڅکله نه حلېږي.
نوموړي د یکشنبې په ورځ د دانشجو خبري آژانس ته وویل، تر هغې چې امریکا، امریکا وي او ایران، ایران وي، دا شخړه به دوام ولري.
عراقچي زیاته کړې، دا خبره یې لا د باور رایې اخیستو پر وخت هم کړې وه چې د امریکا او ایران د دښمنۍ پای نشته.
وروسته تر هغې، چې حماسه میډیا د برېتانوي جوړې د خلاصون په بدل کې له برېټانیا د سفارت غوښتنه او د افغانستان انټرنشنال د خپرونو بندیدو په اړه معلومات خپاره کړل؛ تازه د پخواني حکومت د پکتیا والي محمد حلیم فدايي لیکلي، چې دا ډله د بهرنیانو د اختطاف په مقابل کې سفارت غواړي.
هغه پر خپله ایکس پاڼه لیکلي، چې« اوس یې خوند وکړ؛ په اختطاف کولو او یرغمل کولو سره سفارت غواړې!!!»
د یادونې ده، چې تر دې وړاندې حماسه میډیا ته یو باوري سرچینې ویلي وو، چې طالبان د یوې بریتانوي جوړې د خوشې کېدو په بدل کې له دغه هېواد غواړي، چې سفارت ورکړي او د افغانستان انټرنشنال خپرونې بندې کړي.
یوې باوري سرچینې د نوم نه ښودلو په شرط حماسه میډیا ته وویل چې د طالبانو حکومت د بریتانوي جوړې د خلاصون په بدل کې له بریتانیا څخه غوښتي چې په دغه هیواد کې د افغانستان انترنشنال خپرونې بندې کړي.
سرچینې ویلي، چې د طالبانو حکومت وړاندیز کړی که دا پریکړه ژر نه عملي کیږي د انګلستان حکومت دې په څو میاشتو کې د افغانستان انترنشنال د خپرونو د بندېدو پروسه پیل کړي.
دغه راز سرچینې زیاته کړې چې د طالبانو حکومت د لندن څخه د احمد مسعود د ایستلو او په لندن کې د بریتانیا سفارت د چارو ترلاسه کول هم غوښتي دي.
د سرچینې په وینا د بریتانیا حکومت ښایي د طالبانو حکومت یوه غوښتنه هم ونه مني.
د بریتانیا لومړی وزیر کیایر ستارمر د غزې د بشري وضعیت له خرابېدو وروسته د کابینې بېړنۍ ناسته راغوښتې ده.
ګارډین ورځپاڼه وايي، ستارمر له هغه وروسته دا پرېکړه کړې چې د غزې د لوږې ځپلو ماشومانو انځورونه یې لیدلي.
سرچینې وايي، بریتانیا فلسطین په رسمیت پېژني؛ خو دقیق وخت یې نهدی ټاکل شوی.
په همدې حال کې، د غزې د اوربند خبرې له هغه وروسته ودرېدې چې امریکا حماس د خبرو په اړه په بد نیت تورن کړه.