د جمهوري نظام د اطلاعاتو او کلتور وزارت پخوانی مرستیال هارون حکيمي وایي چې هېڅ باوجدانه انسان، حتی باوجدانه پاکستانی هم نه شي کولای پر افغانستان د پاکستان وروستي بریدونه توجیه کړي.
نوموړي په عین حال کې ټینګار کړی چې د نجونو پر زده کړو او د ښځو پر حقونو اوسني بندیزونه افغانستان ته تر بهرنیو بریدونو هم زیات زیان رسوي.
حکیمي ویلي چې د نوي ښوونیز کال له پیل سره باید د نجونو او مېرمنو پر مخ د ښوونځیو او پوهنتونونو دروازې پرانستل شي او د هغوی حقونو ته درناوی وشي.
اسلام اباد کې د افغانستان پخوانی سفیر نجیب الله عليخېل وایي چې د پاکستان وروستۍ بمبارۍ د تعجب وړ نه دي، بلکې د هغه هېواد د اوږدمهاله سیاست دوام دی چې یوازې یې وسایل بدل شوي دي.
هغه ویلي چې پاکستان پخوا د بېلابېلو ډلو له لارې په افغانستان کې خپل اهداف تعقیبول، خو اوس د بمباریو له لارې هماغه تګلاره مخ ته وړي.
عليخېل ټینګار کړی چې د جګړو او کړکېچونو پر وړاندې د افغانستان د بریا یوازینۍ لاره ملي یووالی، ډیپلوماتیکې هڅې او پیاوړي رسنیز فعالیتونه دي، څو هېواد وکولای شي له خپلو ارزښتونو او ملي ګټو دفاع وکړي.
نوموړي همداراز ویلي، که افغانان د خپلو ملي ګټو پر بنسټ یووالي ته ورسېږي او هېواد پیاوړی شي، نو هېڅ ګاونډی یا بل هېواد به د افغانستان پر وړاندې د یرغل جرئت ونه کړي.
د ملي امنیت پخواني رئیس رحمتالله نبیل په تازه څرګندونو کې ویلي چې تاریخ موږ ته ښيي چې افغانستان څو ځله د لویو قدرتونو لکه د سړې جګړې، ترهګرۍ پر ضد مبارزو، او جیوپولیټیکي ګټو په نوم د سیالیو میدان ګرځول شوی.
نوموړي ویلي، چې د سترو قدرتونو په لوبو کې هېوادونه او ملتونه یوازې لنډمهالي وسیلې وي، او پاکستان هم د خپلو سیاسي ګټو لپاره د مجاهدینو او طالبانو څخه د استفادې مثال ورکړی دی.
نبیل خبرداری ورکړی، چې د بهرنیو سیالیو وسیله کېدل افغانستان ویجاړ کړی، او یوازې د افغانانو ګډه اراده او د مساوي وګړیتوب پر اصولو ولاړ سیاست کولی شي هېواد ژغوري.
هغه زیاته کړې، چې راتلونکی افغانستان باید د بهرنیو لوبو پر بنسټ نه، بلکې د خلکو پر ارادې جوړ وي، او هر وګړی په خپل وطن کې غږ او حق ولري.
د هغه په وینا، نن د سیالیو وخت نه دی، بلکې د ملي یووالي او ګډو هڅو وخت دی.
نبیل ویلي: که موږ یو نه شو، نه به «ته» پاتې شې او نه به «زه».
د افغان سولې لپاره د امریکا پخواني ځانګړي استازي زلمي خلیلزاد د پاکستان وروستي هوايي بریدونه پر افغانستان په سختو ټکو غندلي دي.
نوموړي ویلي چې د تېرې شپې په بریدونو کې ملکي وګړي وژل شوي او د خصوصي هوايي شرکت کام ایر د تېلو زېرمه هم ویجاړه شوې ده، چې دا کار د منلو وړ نه دی.
خلیلزاد پوښتنه کړې چې ایا د پاکستان واکمن بنسټونه توان لري خپل هېواد په مسؤلانه ډول رهبري کړي که نه.
هغه له اسلاماباد غوښتي چې ژر تر ژره تاوتریخوالی کم کړي او د خبرو اترو لاره خپله کړي، ځکه د هغه په وینا که حالت همداسې دوام وکړي نو افغانان ښايي خپل ځواب ورکړي چې پایله به یې لا ډېر کړکېچ او کړاو وي.
د ملي دفاع وزارت پخواني مرستیال تمیم عاصي ویلي چې د طالبانو حکومت باید ټول هغه قصرونه، لوړ منزلونه او جایدادونه چې د خاینینو او د جمهوریت مفسدینو پورې اړه لري، تثبیت، مصادره یا تخریب کړي.
تمیم عاصي په خپلو څرګندونو کې ویلي: “کله چې څوک دا خاوره خپله نه ګڼي، نو هغه پکې د جایداد حق هم نه لري. د خاینانو همنظري د وطن او خلکو پر ضد باید بې حسابه پاتې نه شي.”
هغه ویلي، چې په پاکستاني تجاوز کې د همغږۍ ښودل شوي کسان باید د خپلو اعمالو او جایدادونو لپاره حساب ورکړي.
اسلام اباد کې د افغانستان پخواني سفیر عاطف مشعل پر افغانستان د پاکستان وروستیو بریدونو ته په غبرګون کې ویلي، چې د هېواد د حریم او د خلکو د وینې دفاع د عدالت الهي اصل دی او افغان ملت به د خپل عزت او خاورې د ساتنې لپاره درېږي.
هغه زیاته کړې چې هر ډول تجاوز حساب لري او هېڅ برید به بې ځوابه پاتې نه شي.
راپورونه وایي، د پاکستان په پلازمېنه اسلاماباد کې د فیضاباد په سیمه کې د څو چاودنو غږونه اورېدلي شوي دي، چې ورسره سم د اسلاماباد هوايي ډګر د الوتنو پر مخ تړل شوی دی.
راپورونه وایي چې دا مهال نه الوتکې له دغه هوايي ډګر څخه الوتنه کولی شي او نه هم هلته ښکته کېدای شي.
ځینې سرچینې ادعا کوي چې د طالبانو حکومت په اسلاماباد کې د پاکستان ځینې پوځي تأسیسات په نښه کړي دي، خو تر اوسه د طالبانو حکومت له لوري په رسمي ډول د دې پېښې په اړه څه نه دي ویل شوي.
بل لورته پاکستاني خبریالانو هم په اسلاماباد کې د چاودنو راپورونه خپاره کړي؛ خو د پېښې په اړه یې لا هم بشپړ جزییات نه دي ورکړي.
د طالبانو حکومت استخباراتي چارواکی جابر نعماني وایي چې د اسلاماباد د فیضاباد په سیمه کې د «حمزه» په نوم پوځي بیس او د هغه قومنداني د پاکستان د پوځ له مهمو ستراتیژیکو مرکزونو څخه ګڼل کېږي.
نوموړي ویلي، دغه مرکز یو منظم او مهم استخباراتي ځای دی او د هدف ګرځولو پرېکړه په ډېر دقت سره شوې ده.
د هغه په وینا، د دغه مرکز په نښه کول د دښمن سیسټم ته یو ژور او مهم پیغام لري.
یو شمېر باوري امنیتي سرچینو رسنیو ته ویلي چې د طالبانو حکومت د پاکستان د پلازمېنې اسلاماباد د فیضاباد په سیمه کې د «حمزه» په نوم پوځي تأسیسات په نښه کړي دي.
د سرچینو په وینا، تر اوسه د احتمالي مرګژوبلې او زیانونو په اړه جزییات نه دي خپاره شوي.
بل لور ته پاکستاني خبریالانو هم په پلازمېنه کې د چاودنو راپورونه خپاره کړي؛ خو تر اوسه یې بشپړ جزییات نه دي وړاندې کړي.
دا په داسې حال کې ده چې څو ورځې وړاندې د طالبانو حکومت د دفاع وزیر ملا یعقوب مجاهد ویلي وو، که کابل په نښه شي؛ نو اسلاماباد به هم خوندي پاتې نه شي؛ خو د طالبانو حکومت تر دې دمه په رسمي ډول د اسلاماباد د وروستیو چاودنو په اړه څه نه دي ویلي.
د رویټرز د راپور له مخې، پاکستاني پوځیانو د افغانستان په بېلابېلو سیمو کې هوايي بریدونه کړي چې له امله یې ملکي تلفات اوښتي او د دواړو هېوادونو ترمنځ تاوتریخوالی نور هم زیات شوی دی.
د طالبانو حکومت ویلي، پاکستاني الوتکو د کندهار هوايي ډګر ته نږدې د خصوصي هوايي شرکت کام ایر د سونتوکو پر ډیپو برید کړی، چې دا ډیپو د ملکي الوتکو او د ملګرو ملتونو د الوتنو لپاره د سونتوکو د برابرولو مهم مرکز دی.
د راپور له مخې، د شپې ناوخته بریدونو د کابل په پلچرخي سیمه کې هم ملکي استوګنیزې سیمې په نښه کړې دي.
د افغانستان لپاره د ملګرو ملتونو ځانکړي دفتر (یوناما) په وینا، په دې بریدونو کې لږ تر لږه څلور ملکي وګړي وژل شوي او ۱۴ نور ټپیان شوي چې ښځې او ماشومان هم پکې شامل دي.
همداراز په ننکرهار ولایت کې د مومنددرې ولسوالۍ پر یوه کور د هاوان مرمۍ لګېدلې چې د سیمهییزو چارواکو په وینا یوه ښځه او یو ماشوم پکې وژل شوي دي.
بل لور ته د پاکستان د اطلاعاتو وزیر عطا الله تارړ ویلي، چې دغه بریدونه د «غضب للحق» په نوم د پوځي عملیاتو برخه ده او هدف یې د وسلهوالو مرکزونه او د هغوی د ملاتړ بنسټونه دي او په بریدونو کې ملکي وګړي یا ملکي تاسیسات نه دي په نښه شوي.
بل لور ته د طالبانو حکومت ویاند ذبیح الله مجاهد خبرداری ورکړی چې دا بریدونه به بې ځوابه پاتې نه شي. او د دفاع وزارت ویلي دي چې د پاکستان د وروستیو بریدونو په غبرګون کې یې د پاکستان په کوهاټ کې د پوځ پر یوې اډې د ډرون برید کړی چې پراخ زیان یې ور اړولی.
د ملګرو ملتونو د معلوماتو له مخې، د فبرورۍ له ۲۶مې راهیسې د دواړو هېوادونو ترمنځ په نښتو کې لږ تر لږه ۷۵ ملکي وګړي وژل شوي او ۱۹۳ نور ټپیان شوي دي، خو د طالبانو حکومت وایي چې د ملکي تلفاتو شمېر له سلو اوښتی دی.