ټاکل شوې، چې د سبا د چین او پاکستان استازي کابل ته د «کابل، بیجنګ او اسلام اباد» ترمنځ د درې اړخیزې ناستې لپاره راشي.
د طالبانو حکومت د بهرنیو چارو وزارت په یوه خبرپاڼه کې ویلي، چې په دغو پلاوو کې به چین د حاکم ګوند د سیاسي بیرو غړی او د دغه هېواد د بهرنیو چارو وزیر، وانګ يي او د پاکستان د صدر اعظم مرستیال او د بهرنیو چارو وزیر اسحاق ډار مله وي.
په دې ناسته کې به د درې واړو هېوادونو ترمنځ د سیاسي، اقتصادي او سیمهییزو همکاریو په شمول پر یو لړ مهمو موضوعاتو هر اړخیز بحثونه تر سره شي.
دیني عالم مولوي رحمت الله اندړ ویلي، چې د افغانستان خپلواکي یوازې د اماني فکر په دوام کې خوندي پاتې کېدای شي.
هغه ویلي غازي امان الله خان د اساسي قانون، د بیان او فکر ازادۍ، د ښځو او سړیو د تعلیم او د سواد د پراختیا له لارې د خپلواکۍ ریښتینی بنسټ کېښود.
نوموړي زیاته کړې:«اوسنی حاکم فکر د اماني فکر ضد دی، د نجونو مکتبونه تړل شوي، د هلکانو پر تعلیم محدودیتونه دي، اساسي قانون کفر ګڼل کېږي او د حکومت مشران له نړیوالو سفرونو هم بې واکه دي.»
هغه ټینګار کړی چې د غازي نوم او ملي بیرغ سره حساسیت د جهالت ښکاره نښه ده او زیاته کړې یې ده چې په دې پېر کې پرته له علم او ټیکنالوژۍ، نه، خپلواکي ګټل کېږي او نه ساتل کېږي.
د طالبانو حکومت د بهرنیو چارو وزیر مولوي امیرخان متقي ویلي چې نړۍ باید د افغانستان په اړه “چپه خوبونه” ونه ویني.
نوموړي ټینګار کړی چې په هېواد کې یو واحد او باثباته نظام حاکم شوی او د بهرنیو هېوادونو جوړېدونکې غونډې بېځایه دي.
متقي د افغانستان د خپلواکۍ د ۱۰۶مې کلیزې په نمانځغونډه کې ویلي چې «اسلامي امارت» هڅه کوي خپل سیاست او ملت له بهرني نفوذ او لاسوهنې خوندي وساتي.
دغه غونډه د طالبانو حکومت د ملي دفاع وزارت په تالار کې جوړه شوې وه چې پکې د رئیسالوزرا اقتصادي مرستیال ملا عبدالغني برادر، د ملي دفاع وزیر مولوي محمد یعقوب مجاهد او د کابینې یو شمېر لوړپوړو چارواکو ګډون کړی و.
د ننګرهار پخواني والي ضیاءالحق امرخېل د افغانستان د خپلواکۍ د بېرته ګټلو د ۱۰۶مې کالیزې په مناسبت ویلي، که څه هم افغانانو خپلواکي ترلاسه کړه؛ خو لا هم د خویندو او لوڼو پر مخ د زده کړو دروازې تړلې دي، چې دا د خواشینۍ وړ ده.
هغه هیله څرګنده کړې چې د خپلواکۍ د ارزښتونو د ساتلو په موخه دې د ځوان نسل لپاره د تعلیم زمینې برابرې شي، تر څو هېواد با ثباته، پرمختللی او پر ځان بسیا شي.
د جمهوري حکومت لومړی مرستیال امرالله صالح وايي، طالبانو د شاه امانالله خان مزار، چې د افغانستان د خپلواکۍ اتل و، مدروکه او ممنوعه سیمه ګرځولې ده او خلکو ته اجازه نه ورکول کېږي چې هلته ولاړ شي.
نوموړی وايي، دا کار د طالبانو له خوا د ملي ارزښتونو او تاریخي شخصیتونو سپکاوی دی.
د هغه په خبره، طالبان خپله پاليسي لا هم له راولپنډۍ اخلي، او د دوی مشري د پاکستان له خوا تنظیمېږي.
صالح زیاتوي، د طالبانو پخوانۍ اړیکې له نصیرالله بابر، د کوټې او پېښور له شوراګانو او د اکوړه خټک له مدرسې سره خلکو ته معلومې دي.
پخواني ولسمشر محمد اشرف غني د خپلواکۍ د ۱۰۶مې کالیزې په مناسبت مبارکي ویلي.
ښاغلي غني ویلي، چې دا ازادي د افغانانو د نیکونو په سرښندنو تر لاسه شوې.
د هغه په خبره، د افغانانو قرباني محکومو ولسونو ته بېلګه شوه.
د طالبانو حکومت د دفاع وزیر مولوي یعقوب مجاهد د خپلواکۍ د ورځې په مناسبت جوړه شوې غونډه کې ویلي، چې د اوسنۍ ازادۍ د ساتلو لپاره باید هڅه وشي.
نوموړي ویلي، په یوې پېړۍ کې افغانانو درې ازادۍ اخیستي؛ خو بېرته یې له لاسه ورکوي.
هغه زیاته کړې، چې د هېواد په هر فرد فرد دا لازم دي، چې د خپلواکۍ په ساتلو کې تر خپله وسه پورې خپل کوشش وکړي، تر څو د چا د خبرو تر تاثیر لاندې رانشي.
مجاهد دغه راز ویلي، چې موږ باید د پردیو دسیسو ته هوښیار واوسو او د دوی د هر بد عمل په وړاندې ودریږو او هیچاته اجازه ورنه کړو چې زموږ په چارو کې مداخله وکړي.
د افغان سولې لپاره د امریکا پخواني ځانګړي استازي زلمي خلیلزاد د افغانستان د خپلواکۍ د کاليزې په مناسبت په یوه پیغام کې ویلي، چې هېواد اوس له اوږدو جګړو وروسته د زیات امنیت شاهد دی او د نشهيي توکو پر ضد مبارزه کې پرمختګ شوی دی.
نوموړي زیاته کړې چې افغانان لا هم له جدي اقتصادي ستونزو، د نجونو د ښوونځیو او پوهنتونونو د تړل کېدو، او د پخوانیو سیاستوالو د تېروتنو د تکرار هڅو سره مخ دي.
خلیلزاد ټینګار کړی چې د بدلون اړتیا شته او دا بدلون باید د فکر بدلون وي.
هغه ویلي چې افغانان د دغو ننګونو د ماتولو وړتیا لري او هیله یې څرګنده کړې چې بریالي به شي.
د طالبانو حکومت د رییس الوزرا اقتصادي مرستیال ملا عبدالغني برادر وایي، چې بهر مېشتي افغانان دې هېواد ته راوګرځي.
هغه د هېواد د خپلواکۍ د ۱۰۶مې کلیزې په مناسبت غونډه کې ویلي، چې تاسو ته به معلومه شوې وي چې نورو هېوادونو کې د امکاناتو سره بیا هم د مالکیت او سکون احساس نشته.
نوموړي زیاته کړې چې «اسلامي امارت» ستاسې خپل نظام دی او موږ درته ښه راغلاست وایو.
ملا برادر پر هېوادونو هم غږ کړی چې د لاسوهنې پر ځای دې له «اسلامي امارت» سره د تعامل لار غوره کړي.
د طالبانو حکومت د کورنیو چارو وزارت ویلي، چې د اسد ۲۸مه د افغانستان د خپلواکۍ تاریخي ورځ ده او دوی په دې مناسبت د هېواد ټولو وګړو ته مبارکي ویلې ده.
د دغه وزارت څخه په خپره شوې اعلامیه کې ویل شوي چې ۱۰۶ کاله وړاندې د افغانستان مېړني ولسونو د انګلیسي ښکېلاک پر وړاندې په زړورتیا مبارزه وکړه او هېواد ته یې خپلواکي راوسته.
اعلامیه زیاتوي چې افغانانو تل پر خپلواکۍ، ملي ارزښتونو او پر جغرافیې د هر ډول یرغل او تجاوز پر وړاندې قاطع دریځ نیولی او نړۍ ته یې ثابته کړې چې دا خاوره د یرغلګرو هدیره ده.
د اعلامیې په دوام کې ویل شوي چې که څه هم وروسته بیا افغانستان د نورو یرغلونو ښکار شو؛ خو د افغان ولس، مجاهدینو او مبارزینو په قربانیو سره بیا هم د آزادۍ لمر راوخوت او هېواد له اشغال خلاص شو.