پاکستاني رسنیو د چین ـ پاکستان ګډې سوداګرۍ خونې د سرپرست رییس، ظفر اقبال له قوله راپور ورکړی چې د چین ـ پاکستان اقتصادي دهلیز (CPEC) به د افغانستان لپاره سترې اقتصادي او ترانزیټي آسانتیاوې برابرې کړي.

د هغه په وینا، CPEC به د افغانستان لپاره ځکه د “لوبې بدلون” ثابت شي، چې دا هېواد د سیمې د ترانزیټي سوداګرۍ په وده کې د مرکز په توګه راڅرګندېږي.

اقبال ټینګار کړی چې افغانستان نور تړلی هېواد نه دی، بلکې د CPEC له لارې د منځنۍ آسیا، سویلي آسیا او منځني ختیځ ترمنځ په یوه وصلوونکي سوداګریز دهلیز بدلېږي.

د ملګرو ملتونو سرمنشي، انتونیو ګوترېش خبرداری ورکړی چې په نړۍ کې خلک د خپلو دیني او اعتقادي باورونو له امله تر بریدونو او وژنو لاندې راځي.

هغه د اګست په ۲۲مه پر اېکس لیکلي چې نړیواله ټولنه باید بې له ځنډه د دې ګواښ مقابله وکړي.

د ګوترېش په وینا، تلپاتې سوله هغه وخت شونې ده چې د انسانانو تنوع ولمانځل شي او هر څوک په امن او درناوي کې ژوند وکړای شي.

نوموړي زیاته کړې چې ګډې نړیوالې هڅې کولی شي له تبعیض، تاوتریخوالي او کرکې پاکه نړۍ جوړه کړي.

د ملي ډیموکراتیک ګوند مشر محسن داوړ وايي چې په پښتونخوا کې د ترهګرۍ پر ضد روانو پوځي عملیاتو یوازې ترهګري ډېره کړې ده.

هغه پر اېکس لیکلي چې په بنو او جان‌خېلو کې د خلکو پر کورونو بمبار شوی، یو ځوان وژل شوی او څو تنه ټپیان دي.

په همدې وخت کې پوځ په باجوړ کې پراخ عملیات پیل کړي چې له امله یې زرګونه کورنۍ بې‌ځایه شوي او ځینو کسانو ته مرګ‌ژوبله اوښتې ده.

ځايي سرچینې وایي په عملیاتو کې د ټي‌ټي‌پي وسله‌والو ته هم تلفات رسېدلي.

د امریکا د ولسمشر د ترهګرۍ ضد چارو مرستیال سلاکار سبېسټیان ګورکا ویلي، چې طالبان د ترهګرۍ پر ضد مبارزه کې له واشنګټن سره د یو ډول همکارۍ اړیکه لري.

نوموړي په خپلو څرګندونو کې ویلي:«کېدای شي دا خبره زما له خولې درته عجیبه ښکاره شي؛ خو طالبان زموږ د مبارزې په برخه کې یو ډول همکاران او شریکان دي.»

د ګورکا په وینا، د طالبانو حکومت هم د ځینو هغو ډلو له لوري ګواښ احساسوي، چې امریکا ته د خطر سبب ګرځي.

هغه زیاته کړې، که څه هم د دواړو لوريو ګواښونه په بشپړ ډول یو شان نه دي؛ خو تر ډېره ورته والی لري.

ګورکا ټینګار کړی چې د واشنګټن او طالبانو ترمنځ د ګډو امنیتي اندېښنو له کبله د همکارۍ ځینې لارې موجودې دي.

یو شمېر باوري سرچینو خبر ورکړی، چې پاکستان کې د افغان سیاسونو کېدونکې غونډه له ټاکلې نېټې ځنډېدلې.

د معلوماتو له مخې، یو شمېر سیاسونو ته لاهم ویزې نه دي ورکړل شوې او تر هغې، چې دا ستونزه حل نه شي، ناسته هم نه ترسره کېږي.

ټاکل شوې وه، چې دا ناسته د اګست په ۲۵مه او شپږویشتمه نېټه ترسره شوې وی.

بل لورته د یادې غونډې ګډونوالو په رسمي ډول څه نه دي ویلي.

د پاکستان د بهرنیو چارو وزارت ویاند شفقت علي خان ویلي چې په اسلام‌اباد کې د افغان څېرو غونډه غیر دولتي ده او حکومت پکې رول نه لري.

هغه ټینګار کړی چې دا یوازې د یوې څېړنیزې ادارې فعالیت دی او د امنیت هیڅ ډول اندېښنه یې نشته.

د یادونې ده چې په غونډه کې به شاوخوا ۳۶ افغان سیاسي څېرې او فعالان د اګست په ۲۵–۲۶ د بشري حقونو او سیاسي موضوعاتو په اړه بحث وکړي.

شفقت علي د پاکستان او چین اړیکې ستراتیژیکې بللې او د افغانستان د خاورې پر امنیتي ګواښونو یې اندېښنه څرګنده کړې.

هغه دغه راز ویلي چې د ترهګرۍ ضد عملیات د پاکستان د ځواکونو په خپلواک ډول ترسره کېږي.

د ملګرو ملتونو د کډوالو عالي کمېشنرۍ (UNHCR) ویلي، چې د ۲۰۲۵ کال له پیل راهیسې له ایران څخه تر ۱.۹ میلیونو ډېر افغان کډوال بېرته افغانستان ته ستانه شوي.

دغې کمېشنرۍ ویلي، چې په راستانه شوو کډوالو کې ۶۰ سلنه یې په جبري ډول شړل شوي دي.

د راپور له مخې، د ټولو ستنېدونکو له ډلې شاوخوا ۸۵ سلنه چې له ۱.۶ میلیونو ډېر کسان کېږي، د مارچ له ۲۰مې د اګست تر ۲۰مې پورې بېرته افغانستان ته ستانه شوي دي.

د هلمند ولایت په ګرمسیر ولسوالۍ کې د یو تراکتور ټېلۍ په دریاب کې ډوبه شوې چې له امله د درې ښځو او ۹ ماشومان په ګډون ۱۲ تنو خپل ژوند له لاسه ورکړی دی.

د هلمند د طالبانو د اطلاعاتو او فرهنګ رییس حافظ عبدالباري راشد هلمندي ویلي، چې دا پېښه نن هغه مهال رامنځته شوه چې یو شمېر خلک له ګرمسیر څخه ناوې ولسوالۍ ته په کښتۍ تېرېدل؛ خو د تراکتور ټېلۍ د اوبو تل ته وغورځېده.

نوموړي زیاته کړې چې په پېښه کې ۴ ماشومان ټپیان شوي او د طالب سرتېرو په چټک اقدام سره ۱۴ تنه نور ژغورل شوي دي.

د امریکا د استخباراتو ملي ادارې د افغانستان لپاره د دغه هېواد د پخواني ځانګړي استازي توماس وېسټ په ګډون د ۳۷ امریکایي چارواکو امنیتي جوازونه لغوه کړي دي.

دغې ادارې په خپره شوې اعلامیه کې ویلي، یاد کسان د محرمو مالوماتو په ساتنه کې پاتې راغلي او په قصدي ډول یې د مسلکي معیارونو سرغړونه کړې ده.

د ادارې رییسې تولسي ګابارد ټینګار کړی چې امنیتي جواز امتیاز دی، نه حق، او هغه کسان چې د شخصي یا سیاسي ګټو لپاره له محرمو مالوماتو ناوړه استفاده کوي، د خلکو پر باور سوداګري کوي.

یاد چارواکي له دې وروسته د محرم دولتي اسنادو د لوستلو او کارولو صلاحیت له لاسه ورکوي.

د طالبانو حکومت وياند ذبیح الله مجاهد پر اېکس ليکلي، افغانستان کې کومه وسله‌واله ډله نشته او په دې اړه د ملګرو ملتونو امنیت شورا کې د ځينو هېوادونو اندېښنې بې ځایه دي.

هغه د پوښتنې په ډول ویلي، چې د داسې اندېښنو اچول به د چا په ګټه او د کوم هدف لپاره وي؟

نوموړي ليکلي، هغه هېوادونه چې په دې اړه اندیښنې خپروي، بې دليله دې د افغانستان د بې ثباته کولو هڅه نه کوي.

هغه له هېوادونو غوښتي، چې د اندېښنو پرځای دې امنیت ته کار وکړي.