د طالبانو حکومت د رییس الوزرا اقتصادي مرستیال ملا عبدالغني برادر د سرپل ولایت په بلخاب ولسوالۍ کې د ډبرو سکرو د کان د استخراج او د کانونو ترمنځ د نښلونکي سړک د پرانیستې په مراسمو کې ویلي، چې د هېواد د طبیعي زېرمو کارونه د ملي اقتصاد د پیاوړتیا، د عوایدو د زیاتوالي او د بنسټیزو پروژو د تمویل لپاره حیاتي اهمیت لري.

هغه ویلي، چې د ملي پراختیا شرکت د بلخاب د سکرو کانونو د اسانتیا لپاره له ۲۰۰ کیلومترو زیات سړکونه جغل کړي دي چې له مخې یې د کانونو ترمنځ تګ راتګ او د سکرو انتقال اسان شوی دی.

نوموړي زیاته کړې، چې د بلخاب د سیمې اوسېدونکي به وکولای شي د اړتیا وړ سکاره په مناسب نرخ ترلاسه کړي، او ورسره به په دې ولسوالۍ کې د روغتونونو جوړول، د سړکونو پراختیا او نورو ټولنیزو خدمتونو ته هم ځانګړې پاملرنه وشي.

افغانستان د درې اړخیزو لوبو په لړۍ کې په درېیمه لوبه کې پاکستان ته د ۱۹ منډو په توپیر ماتې ورکړه.

افغانستان په ټاکل شوو شل اورونو کې د پنځه لوبغاړو په سوځېدو سره د پاکستان لوبډلې ته د ۱۷۰ منډو هدف وټاکه.

د پاکستان لوبډله د دې هدف په ترلاسه کولو کې پاتې راغله او د ۱۵۱ منډو په ترسره کولو وتوانیده.

په دې لوبه کې د پاکستان لوبډلې نهه لوبغاړي وسوځېدل او لوبه د افغان لوبډلې په بریا پای ته ورسېده.

د افغان سولې لپاره د امریکا پخواني ځانګړي استازي زلمي خليلزاد ويلي، چې د ښځينه ډاکټرانو کمښت د افغان نجونو او ښځو روغتيا ته جدي ګواښونه پېښ کړي دي.

نوموړي ویلي، چې طالبان ادعا کوي ښځې خوندي دي؛ خو په حقيقت کې هغه ښځې چې حياتي طبي مرستې ته اړتيا لري، خوندي نه دي.

هغه زياته کړې، چې د طالبانو حکومت مشر شیخ هبت‌الله بايد د ښوونځيو او پوهنتونونو او د ښځينه لوړو زده کړو پر بنديز بيا غور وکړي، ځکه چې افغانستان ښځینه ډاکترانو او متخصصینو ته ډېره اړتیا لري.

په درې اړخیزو شل اوریزو سیالیو کې افغان ملي لوبډله د پاکستانۍ لوبډلې پر وړاندې لومړی توپ وهنه ترسره کړه چې د پچې په ګټلو سره افغان لوبډلې لومړی توپ وهنه غوره کړه او په ۲۰ اورونو کې یې د ۵ لوبغاړو په سوځېدو ۱۶۹ منډې جوړې کړې، چې سیالې پاکستانۍ لوبډلې ته یې د ګټلو لپاره ۱۷۰ منډې هدف ورکړ.

په دې لوبه کې ابراهيم ځدراڼ د افغان لوبډلې بهترین لوبغاړی شو، چې د زړورتیا او ښکلې توپ وهنې سره یې ۶۵ منډې جوړې کړې او د خپل ټیم په بریا کې یې مهم رول ولوباوه.

د هند د بهرنیو چارو وزیر جی‌شنکر وایي، چې هند نن د هوا له لارې کابل ته ۲۱ ټنه مرستندویه توکي لېږدولي دي.

هغه په خپله ایکس‌پاڼه لیکلي، چې په دغو توکو کې کمپلې، خیمې، د حفظ الصحې کڅوړې، د اوبو زېرمه ټانکرونه، جنراتورونه، د پخلنځي لوښي، ګرځنده د اوبو تصفیې دستګاوې، د خوب کڅوړې، اړین درمل، ویلچرونه، د لاس ضد عفوني محلولونه، د اوبو د تصفیې ګولۍ، ORS محلولونه او نور طبي وسایل شامل دي.

نوموړي زیاته کړې، چې دوی به د وضعیت څارنه روانه وساتي او په راتلونکو ورځو کې به د اړتیا په کچه لا نورې بشري مرستې هم واستوي.

د طالبانو حکومت تر واک لاندې د ننګرهار ولایت د رسنیو له دفتر څخه په خپره شوې خبرپاڼه کې ویل شوي چې نن یې د دغې ولایت څخه کونړ ته د ۷۲ پروازونو په ترڅ کې ۳۶۱ ټپیان د ننګرهار حوزوي روغتون ته د درملنې په موخه انتقال کړي.

خبرپاڼه کې ویل شوي چې د ټپیانو له منځه یو تن ساه ورکړې او جنازه یې بیرته کونړ ته انتقال شوې.

همدا رنګه د یاد هوایي ډګر له لارې کونړ ته لس زره کیلو ګرامه خوراکي توکي او درمل وړل شوي او ترڅنګ یې ۵۴۰ تنه مسافر هم لېږدول شوي دي.

افغانستان د درې اړخیزو شل اوریزو سیالیو په لړ کې د پاکستان پر وړاندې د لوبې پچه وګټله او د لومړۍ توپ وهنې پرېکړه یې وکړه.

یاده لوبه د متحده عربي اماراتو په شارجه کرکټ لوبغالي کې ترسره کېږي، چې په کې دواړه ټیمونه د غوره پایلو لپاره د سیالۍ ډګر ته ښکته شوي دي.

د ترکیې ولسمشر رجب طیب اردوغان ویلي، هغه د شانګهای همکارۍ سازمان د غونډې پر مهال له ولادیمیر پوتین سره د اوکراین د جګړې د پای ته رسولو په اړه خبرې کړي او له ولادیمیر زیلنسکي سره یې ټیلیفوني تماس هم نیولی دی.

اردوغان زیاته کړې، د روسیې او اوکراین د استازو وروستۍ خبرې په استانبول کې ښيي چې د سولې دروازې لا تړل شوي نه دي؛ خو د رهبرانو د مخامخ لیدنې لپاره لازم شرایط لا نه دي برابر.

ترکیه چې د ناټو غړې ده، د جګړې له پیل راهیسې د مسکو او کیف دواړو سره اړیکې ساتلې او هڅه کوي د منځګړیتوب رول ولوبوي.

په کونړ او ننګرهار ولایتونو کې یو ځل بیا ۵.۲ درجې زلزله شوې ده.

د امریکا د زلزله‌پېژندنې مرکزي ادارې د معلوماتو له مخې، دغه زلزله د ننګرهار ولایت د جلال‌اباد ښار په شمال ۳۴ کیلومترۍ کې رامنځته شوې ده.

بل لور ته، له کونړ ولایت څخه هم راپورونه ورکول کېږي چې دې زلزلې ګڼ مالي زیانونه اړولي او د ډېرو کورونو د تخریب لامل شوې ده.

د بخښنې نړیوال سازمان د افغانستان ختیځ کې د وروستۍ زلزلې له قربانیانو سره د خواخوږۍ ترڅنګ خبرداری ورکړی چې د طالبانو محدودوونکي سیاستونو د مرستندویو بنسټونو فعالیتونه سخت کمزوري کړي دي.

د دغه سازمان د جنوبي آسیا مرستیال بابو رام پانت ویلي، افغانستان له ګڼو بحرانونو سره مخ دی، په داسې حال کې چې له ۲۲ میلیونو ډېر خلک بشري مرستو ته اړتیا لري او د ایران او پاکستان له لوري د کډوالو ایستلو دغه کړکېچ لا سخت کړی دی.

په اعلامیه کې ټینګار شوی چې د ښځو پر کار بندیز د ملګرو ملتونو او نورو سازمانونو ظرفیتونه کم کړي او طالبان باید بېړنۍ او بې‌خنډه د ټولو خیریه ادارو د فعالیت اجازه ورکړي.

د یادونې ده چې په کونړ کې وروستۍ زلزله کې له ۱۴۰۰ زیات کسان وژل شوي او زرګونه نور ټپیان شوي دي.