د روسيې د بېړنيو حالاتو وزارت خبر ورکړی چې نن يې د افغانستان ختيځ کې زلزله ځپليو ته ۲۰ ټنه نوره بشري مرسته هم استولې ده.
ياد وزارت ليکلي، دغه مرسته د دغه هېواد د ولسمشر ولاديمير پوتين په حکم استول شوې چې پکې خوراکي توکي شامل دي.
د دغه هېواد د بشري مرستو لومړۍ جوپه چې ۲۰ ټنه بشري مرستې يې لرلې، د روانې سنبلې مياشتې په ۱۴مه نېټه کابل ته را رسېدلې وه.
د امریکا ولسمشر ډونالډ ټرمپ ویلي چې د اروپايي ټولنې ځینې مشران به راتلونکې اوونۍ واشنګټن ته سفر وکړي څو د روسیې او اوکراین د کړکېچ او د جګړې د پای ته رسولو په اړه خبرې وکړي.
ټرمپ زیاته کړې چې ډېر ژر به له خپل روسي سیال ولادیمیر پوتین سره هم خبرې وکړي.
بل لورته د اوکراین ولسمشر ولادیمیر زلنسکي ویلي، چې که پوتین مذاکرات غواړي نو کییف ته دې د خبرو لپاره ورشي.
د برېټانیا د ټېلګراف ورځپاڼې راپور ورکړی چې پاکستان له افغانستان نه وړاندې شوی او اوس د نړۍ د تریاکو ستر تولیدوونکی هېواد دی.
راپور خبرداری ورکوي چې دا بدلون کولی شي میلیونه ډالر د ترهګرو ډلو لاس ته ور ورسوي او د سیمې امنیت په جدي ډول ګډوډ کړي.
د راپور له مخې، په پاکستان کې د تریاکو ښکاره او پراخه کرکیله د افغانستان د تولید کچې نه هم لوړه شوې ده چې د سیمې د امنیتي حالت په اړه یې اندېښنې زیاتې کړي دي.
هندي رسنیو راپور ورکړی چې هند هڅه کوي د طالبانو حکومت د بهرنیو چارو وزیر امیر خان متقي د ملګرو ملتونو د بندیزونو سربېره خپل هېواد ته ور وبولي.
د ټایمز اف اندیا د راپور له مخې، هند له طالبانو سره په تماس کې دی څو د متقي د سفر زمینه برابره کړي.
د طالبانو حکومت استازي سهیل شاهین ویلي، دواړه هېوادونه باید خپلې اړیکې پیاوړې کړي او د وزیرانو په کچه لیدنې ترسره کړي.
تمه ده هند د سفر د نېټې تر ټاکلو وروسته د امنیت شورا څخه د بندیز د معافیت غوښتنه وکړي.
تېره میاشت د امیرخان متقي سفر ځکه لغوه شو چې امنیت شورا ورته د سفر اجازه ورنه کړه.
د افغانستان لپاره د امریکا چارسمبالي ډان برون ویلي، د ولسمشر ډونالډ ټرمپ د نوې اجرایوي فرمان له مخې هغه هېوادونه چې د امریکایانو د ناسم توقیف ملاتړ کوي، د سختو پایلو سره به مخ شي.
نوموړي ویلي چې دا پرېکړه یو بې ساری ګام دی او نړۍ ته یې د یو پیغام او خبرداري په شکل ویلي: ” که تاسو هڅه وکړئ چې یو امریکایی وګړې د معاملې لپاره د وسیلې په توګه وکاروئ، نو تاسو به له سختو پایلو سره مخ شئ.”
د یادونې ده چې د افغانستان د هوایي چلند د پخوانۍ ادارې مشر افغاناصله امریکایي محمود شاه حبیبي په ګډون ډیری نور د طالبانو حکومت په نامعلومو زندانونو کې تري تم دي.
خوست کې د طالبانو حکومت امنیه قوماندانۍ له خلکو غوښتي چې د کرکټ لوبو د برياوو پر مهال دې په عامه ځایونو کې د لمانځلو څخه ډډه وکړي.
طالب چارواکي وايي، په وروستیو کې د ملي لوبډلې د بريا پر مهال په ښار کې د خلکو پراخې راټولېدنې لیدل شوي دي.
دا خبرداری په داسې وخت کې ورکول کېږي چې افغانستان کرکټ ملي لوبډله اوس مهال د درې اړخیزو سیالیو په پایلوبه کې د پاکستان پر وړاندې لوبېږي.
د سوریې د لنډمهالي حکومت د مشر احمد الشرع مېرمنې لطیقې الدروبي ویلي، ځینو اسلامي هېوادونو کې د مذهب په نوم نجونې له زدهکړو بې برخې دي.
هغې ویلي، چې دا ستر حماقت او له اسلام څخه ناخبري ده.
نوموړې دا څرګندونې د محصلینو فراغت غونډې ته کړې دي.
د یادونې ده، چې هغه خپله هم د هنري او بشري علومو پوهنځي څخه فارغه شوه.
ورورسته تر هغې، چې د نارینه ډاکټرانو له لوري د یوې زلزلې ځپلې مېرمنې د درمنلې تصویرونه په ټولنیزو رسنیو کې لاس په لاس شول؛ نو ګڼ شمېر افغانانو د ښځو پر وړاندې د طالبانو حکومت پر سیاست نیوکه کړې.
د ټولنیزو رسنیو افغان کاروونکو لیکلي، چې د ښځو پر وړاندې د ښوونځیو او پوهنتونونو د دروازو له بندولو سره د طالبانو حکومت مشر شیخ هبتالله دا ډول یو چاپیریال غواړي، چې د مېرمنو درملنه پکې نارینه کوي.
یو تن ټولنیز فعال لیکلي:«افغانان تر دې دمه د طالبانو په اسلامي نوافظو پوهه نشوه چې اخیر دوی د کوم ډول دین پیروي دي چې پر ځان یې د اسلام کته خوره کړې!»
بل لورته بیا په کور دننه یو شمېر شنونکو هم د طالبانو پر حکومت نیوکې کړې، چې د ښوونځیو مخه یې نیولې او راتلونکو کالونو کې به هیڅ یوه قابله هم پیدا نشي.
که څه هم د طالبانو حکومت ویلي وو، چې دوی بدل شوي او د نجونو زدهکړو ته به اجازه ورکړي؛ خو تر اوسه داسې کوم څرک نه لیدل کېږي.
د یادونې وړ ده چې شیخ هبتالله په یوه غږیز کلیپ کې دا هم ویلي:«ایسکول میسکول نشته، دا د مدرسې په ضد راوتې د اذهانو د بدلولو پروژه ده.»
د ایران د بشري حقونو سازمان په تازه راپور کې ویلي، چې په تېرو اته میاشتو کې له ۵۰ ډېر افغان وګړي په دغه هېواد کې اعدام شوي دي.
د یاد سازمان د معلوماتو له مخې، یوازې سږکال ۸۶۴ کسان په ایران کې اعدام شوي چې لږ تر لږه ۴۹ یې افغانان دي.
هممهاله د «ههنگاو» په نوم بل سازمان بیا وايي، د اعدام شویو افغانانو شمېر ۵۹ تنو ته رسېږي.
راپورونه ښيي چې ډېری افغان وګړي د مخدره موادو او قتل په تړاو په دار ځړول شوي دي.
د بشري حقونو سازمان زیاتوي، د روان کال د اعدامونو شمېر د تېر کال د همدې مودې په پرتله دوه برابره لوړ شوی دی.
ایراني چارواکي وايي د سویلي خراسان له لارې افغانستان ته د دغه هېواد صادرات زیات شوي دي.
د «ایرنا» د راپور له مخې، سږکال یوازې له دې ولایت څخه د صادراتو ارزښت ۱۷۴ میلیونه ډالرو ته رسېږي.
چارواکي زیاتوي چې د بندیزونو سره سره د ایران ټرانزیټي او سوداګریز بهیر وده کړې او د افغانستان لپاره ډېری توکي د ماهيرود له پوله لېږدول کېږي.