د ټایمز اف انډیا د راپور له مخې، د طالبانو حکومت د عامې روغتیا وزارت د درملو او خوړو مرستیال وزیر، حمدالله زاهد، تېره اونۍ هند ته سفر کړی و.
راپور زیاتوي، د نوموړي د سفر هدف د روغتیايي او درمل جوړونې نندارتون کې ګډون و.
ورځپاڼې همدارنګه لیکلي، دغه سفر په داسې وخت کې شوی چې ګنګوسې دي د طالبانو حکومت د بهرنیو چارو وزیر امیر خان متقي ښايي روان کال هند ته سفر وکړي.
هند تر اوسه د طالبانو حکومت په رسمیت نه دی پېژندلی؛ خو له کابل سره د اړیکو د ښه کېدو هڅې یې پیل کړې دي.
د طالبانو حکومت د بهرنیو چارو وزیر مولوي امیر خان متقي نن د امریکا د ولسمشر ډونالډ ټرمپ د ځانګړي استازي اډم بولر په مشرۍ له هغه پلاوي سره وکتل، چې د افغان سولې لپاره د امریکا پخوانی ځانګړی استازی ډاکټر زلمی خلیلزاد هم پکې شامل و.
د طالبانو حکومت مرستیال ویاند حمدالله فطرت په خپله ایکسپاڼه لیکلي، چې په دې ناسته کې دواړو لورو د دوه اړخیزو اړیکو د پراختیا، د اتباعو د ستونزو، په افغانستان کې د پانګونې او نورو فرصتونو په اړه هر اړخیز بحثونه وکړل.
هغه ویلي، چې په دې ناسته کې ټینګار وشو چې د دواړو هېوادونو ترمنځ پر شته او راتلونکو موضوعاتو، په ځانګړي ډول د بندیانو پر مسئله، خبرې به دوام وکړي.
د فطرت په خبره، امیرخان متقي د خبرو په پیل کې د دوحې پخوانیو مذاکراتو ته په اشارې سره وویل، اوس ښه فرصت برابر شوی چې اړیکې عادي حالت ته راوګرځول شي او هېڅ داسې پېچلې ستونزه نه شته چې حل یې ستونزمن وي.
د نوموړي په خبره، د امریکايي پلاوي مشر په خپله وینا کې د ختیځو ولایاتو د وروستۍ زلزلې په تړاو خواخوږي څرګنده کړې او کابل ته خپل سفر یې ګټور وباله.
د فطرت لیکلي، امریکایي پلاوي ویلي، چې دواړه لوري باید د تېرو ناستو پر تعقیب عملي ګامونه واخلي تر څو مثبتې پایلې ترلاسه شي.
یاد پلاوي ویلي چې امریکا د ملتونو د انتخاب ازادۍ ته درناوی لري او نه غواړي پر افغانانو څه تحمیل کړي.
د راپورونو له مخې، د نیوزیلېنډ په اوکلېنډ ښار کې زرګونو کسانو د فلسطین په ملاتړ لاریون کړی دی.
د لاریون تنظیموونکي وايي شاوخوا ۵۰ زره کسان راوتلي؛ خو پولیس دا شمېر ۲۰ زره ښيي.
لاریونوالو د فلسطین بیرغونه پورته کړي او شعارونه یې ورکړي؛ خو کومې ګډوډۍ نه دي رامنځته شوي.
په همدې حال کې بیا د نیوزیلېنډ لومړي وزیر د اسرائیل تګلاره د شرم وړ بللې ده.
د افغان سولې لپاره د امریکا پخوانی ځانګړی استازی زلمی خلیلزاد کابل ته تللی.
حماسه میډیا ته سرچینو ویلي چې خلیلزاد به د طالبانو د لوړ پوړو چارواکو سره ناستې او خبرې وکړي.
دا چې د خلیلزاد کابل ته سفر د کومې موخې لپاره دی تر دې دمه نور جزیات نه دي څرګند شوي.
د جنوبي وزیرستان عليوزیر ولسوالۍ کې د بادار درې په سیمه کې پر یو پوځی کاروان برید کې لږ تر لږه ۱۲ پوځيان وژل شوي او ۴ نور سخت ټپیان شوي دي.
چارواکي وايي، برید د کمین په ډول ترسره شوی و.
تحریک طالبان پاکستان یا ټيټيپي د برید مسئولیت منلی او ادعا یې کړې چې جنګیالیو یې د پوځ وسلې هم له ځان سره وړي دي.
دا د ۲۰۲۴ د ډسمبر وروسته تر ټولو خونړۍ پېښه بلل شوې، هغه مهال هم د ټيټيپي په ورته برید کې ۱۶ پوځيان وژل شوي وو چې ورسره هممهاله د پاکستان هوايي بریدونه د افغانستان پر خاوره ترسره شول.
د روسیې په ختیځ کې د کامچاتکا سیمې په ساحلي برخه کې ۷.۴ درجې زلزله شوې.
د زلزلې مرکز د پیتروپاولوسک-کامچاتسکي ښار څخه شاوخوا ۱۱۲ کیلومتره لرې د ۳۹ کیلومتره په ژوروالي رامنځته شوې.
له پیښې وروسته د سونامي لومړنی خبرداری هم خپور شوی و خو څو ساعته وروسته لغوه شو.
د زلزلې د اووښتو تلفاتو په اړه تر دې دمه د زیان یا مرګ ژوبلې راپور نه دی ورکړل شوی.
په کونړ ولایت کې د شیګل ولسوالۍ د طالبانو حکومت د څارنې د مدیریت رییس شبیر احمد د خپل کور دننه د چاودنې له امله وژل شوی دی.
د پېښې په ترڅ کې د نوموړي زوی هم خپل ژوند له لاسه ورکړی دی.
ځايي سرچینو ویلي، چاودنه هغه مهال رامنځته شوه چې د ده په کور کې ایښودل شوي چاودېدونکي توکي وچاودېدل.
تر اوسه سیمهییزو طالب چارواکو په دې اړه څه نه دي ویلي.
د واینټ د راپور له مخې، د قطر یوه لوړپوړي سرچینې ویلي چې د حماس مشران په دوحه کې پر ځای نه وو چېرته چې د اسراییلو برید شوی و.
واینټ زیاته کړې چې دا عملیات د استخباراتي معلوماتو د نیمګړتیا له امله ناکام شول.
ویل شوي که د قطر یو لوړپوړی چارواکی، چې د حماس او اسراییلو ترمنځ د اړیکو مسوول دی، په دغه ځای کې موجود وای، برید به د دواړو هېوادونو ترمنځ ډېر ستر کړکېچ رامنځته کړی وای.
د اسراییلو څلورو امنیتي چارواکو واینټ ته ویلي چې د قطر پر ضد د برید پرېکړه په اسراییلو کې د سختو نیوکو سره مخ شوې ده.
البانیا د نړۍ په کچه لومړی هېواد شو چې د مصنوعي ځیرکتیا پر بنسټ یې وزیره ټاکلې ده.
د دې نوې وزیرې نوم «دیلا» دی چې د عامه تدارکاتو د څارنې او د فساد ضد مبارزې لپاره ټاکل شوې ده.
د البانیا لومړي وزیر اېدي راما ویلي، دیلا به د قراردادونو پروسه له رشوت، فشار او اړیکو پالنې خوندي کړي او د تدارکاتو بهیر به شفاف او چټک کړي.
دیلا تر دې وړاندې د “e-Albania” په ډیجیټلي پلاتفورم کې د یو میلیون څخه ډېر غوښتنلیکونه پروسس کړي دي.
خو په البانیا کې د دې نوښت په اړه نظرونه وېشلي دي.
د اپوزیسیون ډیموکرات ګوند دا کار «چټي» بللی، خو یو شمېر شنونکي وايي که په سمه توګه مدیریت شي، کولی شي د شفافیت او د خلکو د باور زیاتولو کې مرسته وکړي.
د فرانسې ولسمشر امانویل مکرون ویلي چې د ملګرو ملتونو عمومي اسمبلۍ د نیویارک اعلامیه او د دوو هېوادونو د حل لاره تصویب کړه.
د دې بهیر مشري فرانسه او سعودي کوي او ۱۴۲ هېوادونو یې ملاتړ کړی دی.
ټاکل شوې ده د سپتمبر په ۲۲مه د دواړو هېوادونو په ګډ کنفرانس کې د فلسطین د رسمیت پېژندنې وروستی لست اعلان شي.
مکرون ویلي، فرانسه به په راتلونکو غونډو کې فلسطین په رسمیت وپېژني او څو لوېدیځ هېوادونو یې ملاتړ کړی دی.