د اسراییل لومړي وزیر بنیامین نتانیاهو د ملګرو ملتونو د عمومي اسمبلۍ د ۸۰مې غونډې د ګډون لپاره نیویارک ته د سفر پر مهال ویلي، چې د امریکا له ولسمشر ډونالد ټرمپ سره به د خپلو وروستیو «بریاوو» او پر راتلونکو فرصتونو خبرې وکړي.

هغه ټینګار کړی، چې د اسمبلۍ په وینا کې به د هغو مشرانو پر ضد غږ پورته کړي، چې فلسطین یې په رسمیت پېژندلی دی.

نتانیاهو ویلي، په نیویارک کې به د اسراییلي وګړو، پوځیانو او هېواد په اړه «حقیقتونه» څرګند کړي.

نوموړي زیاته کړې، چې په واشنګټن کې به له ټرمپ سره د حماس د ماتولو، د ټولو برمته کسانو د ازادولو او د سولې د پراخولو په اړه هم بحث وکړي.

په افغانستان کې د ټرافیکي پېښو او مرګ ژوبلې کچه په وروستیو شپږو میاشتو کې په بې ساري ډول لوړه شوې ده.

د طالبانو حکومت د کورنیو چارو وزارت د ټرافیکو ریاست سرچینې وايي، په دې موده کې د ټرافیکي پېښو له امله تر ۱۲۰۰ زیات کسان مړه شوي، چې دا د تېر کال د همدې مودې په پرتله ۲۰ سلنه زیاتوالی ښیي.

یوازې د اګسټ میاشتې په وروستیو دوو اوونیو کې په لسو پېښو کې تر ۲۰۰ زیات کسان مړه او نږدې ۱۵۰ نور ټپیان شوي، چې پکې د هرات مرګونې پېښه هم شامله وه چې شاوخوا ۸۰ کسان پکې مړه شول.

د لارو خرابوالی، د موټرچلوونکو بې‌احتیاطي، د ټرافیکي اشارو نشتوالی، د نشه‌یي توکو کارول او د جدي څار نشتوالی د دغو پېښو مهم لاملونه بلل کېږي.

د سوریې ولسمشر احمد الشرع د ملګرو ملتونو عمومي اسمبلۍ ته په وینا کې له اسراییل وغوښتل چې په غزه کې روانه جګړه ژر تر ژره ودروي.

نوموړي وویل، سوریه د جګړو او ویجاړیو له سختو تجربو تېره شوې ده؛ نو ځکه د غزې له ماشومانو، ښځو او مظلومو خلکو سره ولاړه ده.

الشرع ټینګار وکړ، چې نړیواله ټولنه باید د جګړې د پای ته رسولو او د ولس د ژغورلو لپاره بېړني ګامونه واخلي.

د پاکستان پخواني لومړي وزیر عمران خان ویلي، چې د پوځ د اوسني مشر عاصم منیر تر واکمنېدو وروسته د طالبانو له حکومت سره اړیکې خرابې شوې او دا د سیمې د ثبات لپاره جدي ګواښونه رامنځته کوي.

خان زیاته کړې، چې د هغه د حکومت پر مهال اړیکې د همکارۍ او تفاهم پر بنسټ ولاړې وې او په قبایلي سیمو کې نسبي امنیت رامنځته شوی و.

هغه ادعا کړې، چې منیر افغان کډوال په زور شړلي، د طالبانو حکومت پر ضد یې دښمنانه دریځ نیولی او د ډرون بریدونو له امله اړیکې نورې هم خرابې شوې.

عمران خان ټینګار کړی، چې د سولې لپاره باید د طالبانو له حکومت سره خبرې وشي او د پوځي عملیاتو پر ځای سیاسي او ټولنیزې لارې غوره شي.

حماسه میډیا ته رسېدلي اسناد ښیي، چې هرات کې د طالبانو حکومت د یو افغان سوداګر حاجي نقیب الله په خوښه د هغه چینایي شریکوال پینګ جینوی نیولی دی.

د نوموړې مېرمنې ویلي، چې جینوی د اپریل په دریمه نقیب الله مشهور په یوسف ورغوښتی او هلته یې ورڅخه د یوې غیر معقول سند د امضا غوښتنه کوله چې هغه نه ده منلې او یوسف بیا پولیس پرې خبر کړي چې ګواکې نوموړي خلکو ته د زیان رسوولو هڅه کړې.

د جینوی مېرمن زیاتوي، چې یوسف وروسته د ده په مېړه تور پورې کړی، چې پوروړی یې دی او درغلي یې ورسره کړې.

د دواړو ترمنځ د سوداګرۍ ۱۲ کاله کېږي او حماسه میډیا ته رسېدلي سندونه ښيي، چې نقیب الله په چینایي شریکوان د ۴.۵ میلیونه ډالرو د درغلۍ تور پورې کړی.

افغانستان د ۲۰۲۵ د لومړیو شپږو میاشتو کې شاوخوا ۶.۷۸ میلیارد ډالره سوداګري کړې چې د تېر کال په پرتله ۳۰٪ ډېروالی ښيي.

د طالبانو حکومت د صنعت او سوداګرۍ وزارت ویاند عبدالسلام جواد ویلي، صادرات ۷۴۸ میلیونه ډالرو ته رسېدلي چې ۹٪ زیاتوالی ښیي او واردات ۶.۰۳ میلیارد ډالرو ته رسېدلي چې ۲۱٪ لوړ شوي.

د یادونې ده چې د افغانستان مهم صادرات وچه مېوه، زعفران، پسته، انګور او پروسس شوې خوراکي توکي دي چې پاکستان، هندوستان، امارات، قزاقستان، ازبکستان، ترکیې، ایران، چین او عراق ته لېږل شوي دي.

د «ګلوبل صمود» په نوم نړیوال بشردوستانه کاروان، چې نږدې ۵۰ ملکي بېړۍ لري او هدف یې د غزې سمندري کلابندۍ ماتول دي، ویلي چې د چهارشنبې شپه د یونان د «ګاوډوس» ټاپو ته څېرمه نړیوالو اوبو کې پرې د ډرون برید شوی دی.

د کاروان د ویاندې په وینا، په برید کې ټول مسافر خوندي پاتې شوي دي.

د ایټالیا د دفاع وزیر دغه پېښه غندلې او ویلي یې دي چې د ایټالیا یوه جنګي بېړۍ د مرستې لپاره سیمې ته روانه ده.

اسراییل له دې وړاندې دا کاروان غندلی او فعالان یې د حماس ډلې سره د همکارۍ په تور نیولي، خو د تېرې شپې د برید په اړه یې څه نه دي ویلي.

روسي ورځپاڼې نزاویسیمایا ګازیتا په یوه تازه راپور کې لیکلي، چې د طالبانو د دفاع وزارت سرپرست محمد یعقوب ته د چین له لوري د سفر بلنه ورکړل شوې ده.

د راپور له مخې، دا بلنه ښايي د امریکا د ولسمشر ډونالډ ټرمپ د وروستیو څرګندونو سره تړاو ولري.

ټرمپ ویلي و، چې غواړي د افغانستان بګرام هوايي اډه بیا د واشنګټن تر ولکې لاندې راولي.

راپور زیاتوي، چې امریکایي استازي له څو میاشتو راهیسې له طالب مشرانو او افغان سیاستوالو سره په تماس کې دي او د بګرام د بېرته نیولو طرحه د ټرمپ د انتخاباتي ستراتیژۍ برخه ده.

د سرچینې په وینا، پکن غواړي د ملا یعقوب په بللو سره د طالبانو د ځواک د حقیقي ظرفیت او د امریکا د احتمالي عملیاتو پر وړاندې د دوی د دریځ ارزونه وکړي.

تر اوسه روښانه نه ده، چې د طالبانو حکومت مشرتابه به دې سفر ته اجازه ورکړي او که نه.

د ایران د بشري حقونو سازمان ویلي، چې په تېرو نهو میاشتو کې په ایران کې له زرو ډېر کسان اعدام شوي دي.

دوی اټکل کوي چې هره ورځ له اوو تر نهو کسان اعدام شوي دي.

دغه سازمان وايي چې د ایران حکومت له اعدامونو د سیاسي اهدافو او د وېرې د خپرولو لپاره کار اخلي او د بشري حقونو شورا څخه یې غوښتنه کړې چې دغه اعدامونه د «بشریت ضد جنایت» په توګه وڅېړي.

د هند په ختیځ ښار کلکته او شاوخوا سیمو کې د سختو ورښتونو له امله لږ تر لږه ۱۲ کسان مړه شوي دي.

په ښار کې د اوبو ډنډونو د رامنځته کېدو له امله ترانسپورت هم ګډوډ شوی.

د بارانونو له امله د هندوانو د مذهبي جشن «دورګا پوجا» چمتووالی جدي خنډ سره مخ شوی دی.