په ۲۰۲۵ کال کې د خیبر پښتونخوا په بېلابېلو سیمو، په ځانګړي ډول بنو کې، پر پاکستاني پولیسو د وسله‌والو بریدونو له امله د پام وړ ځاني او مالي زیانونه اوښتي دي.

د پولیسو د لوړپوړو چارواکو د معلوماتو له مخې، یوازې په بنو کې د روان کال پر مهال په لسګونو بریدونه شوي چې په پایله کې یې لږ تر لږه ۲۷ پولیس سرتېري وژل شوي دي.

د دوی په وینا، په دغو بریدونو کې د پولیسو وسایط، پوستې او تجهیزات هم زیانمن شوي دي.

وسله‌والو د ډرون ټکنالوژۍ کارونه هم پیل کړي؛ خو د انټي‌ډرون وسایلو د فعالېدو وروسته سلګونه احتمالي بریدونه شنډ شوي هم دي.

د چارواکو له قوله، د پولیسو پر ضد بریدونه د امنیتي وضعیت د خرابولو هڅه ده، خو امنیتي ادارې د دغو ګواښونو پر وړاندې د مقابلې توان لري.

د ونزوئلا ملي شورا د واکمن ګوند تر کنټرول لاندې، یو نوی قانون تصویب کړ چې له مخې یې هغو کسانو ته تر ۲۰ کلونو بند سزا ورکول کېږي، چې د حکومت په وینا په «سمندري غلا، محاصره او ورته نړیوالو ناقانونه کړنو» کې لاس ولري.

دا اقدام وروسته له هغې وشو، چې امریکا د ونزوئلا د نفتو اړوند ټانکرونو د توقیف لړۍ چټکه کړې ده.

د امریکا چارواکي وايي، دا عملیات د تحریمونو د ماتولو او د مخدره توکو د قاچاق پر ضد ترسره کېږي، خو کاراکاس دا کړنې «اقتصادي محاصره» بولي او ادعا کوي چې واشنګټن غواړي د ولسمشر نیکولاس مادورو حکومت کمزوری کړي.

د فشارونو له امله، د ونزوئلا دولتي شرکت PDVSA اړ شوی چې تېل په ټانکرونو کې ذخیره کړي، چې دې چارې د تېلو زیرمې یو ځل بیا له لس میلیونو بېرلو پورته رسولې دي.

دا په داسې حال کې ده چې چین لا هم د ونزوئلا د تېلو تر ټولو ستر پېرېدونکی پاتې شوی او د دواړو هېوادونو ترمنځ سیاسي او اقتصادي کړکېچ لا پسې زیات شوی دی.

رویټرز خبري اژانس راپور ورکړی چې یوې نړیوالې سوداګریزې ډلې د پاکستان د ملي هوايي شرکت (PIA) ۷۵ سلنه ونډه واخیستله.

د راپور له مخې، یادې ډلې د PIA د ونډو په بازار کې تر ټولو لوړه بولي کړې ده، څو د شرکت د ملکیت لویه برخه ترلاسه کړي.

پاکستاني حکومت د اوږدمهالو مالي زیانونو له امله د شرکت د مدیریت توان له لاسه ورکړی او غواړي چې د دې ملي هوايي شرکت چلول خصوصي سکټور ته وسپاري.

د سوداګریزې ډلې له خوا د ونډې اخیستلو وروستۍ پرېکړه به د پاکستان د حکومت او د بازار د قوانینو تر موافقې وروسته اعلان شي.

روسي چارواکو ویلي، چې یو شکمن ځانمرګي بریدګر د مسکو په یلتسکایا سړک کې ځان ته چاودنه ورکړې چې له امله یې درې کسان د دوه ترافیک پولیس افسرانو په شمول وژل شوي.

د روسیې د دولتي خبري اژانس د معلوماتو له مخې، دوه ترافیک پولیسو د خپل خدمت موټر ته نږدې یو شکمن کس ولید او کله چې دوی د هغه د نیولو هڅه وکړه، نوموړي له ځان سره تړلو چاودېدونکو توکو ته چاودنه ورکړه

امنیتي ځواکونو سیمه کلابنده کړې او د پېښې په اړه پلټنې روانې دي.

د امریکا د پخواني ولسمشر جو بایډن زوی، هنټر بایډن، په یوه تازه پاډکاسټ مرکه کې د خپل پلار پر هغه پرېکړه نیوکه کړې چې له مخې یې امریکایي ځواکونه له افغانستانه وویستل شول.

هنټر بایډن ویلي چې حتی له افغانستان څخه د وتلو پر موضوع هم له خپل پلار سره یې خبرې کړي وې.

هغه ټینګار کړی چې که څه هم د وتلو پلان مهم و، خو په ځینو برخو کې یې د غوره مدیریت امکان شتوم درلود.

هنټر په همدې مرکه کې د خپل پلار له ګڼو نورو سیاسي پرېکړو او پالیسیو دفاع هم کړې او ویلي یې دي چې د ځینو اقداماتو هدف د امریکا د ملي ګټو ساتنه او د نړیوالو اړیکو تقویه کول وو.

هغه د خپلو خبرو پر مهال د پلار د کارونو پر پیچلتیا او د هغه د پرېکړو د ستونزو په اړه هم وضاحت ورکړی.

د پاکستان ډان ورځپاڼې راپور ورکړی چې د روان مالي کال په لومړیو پنځو میاشتو کې د پاکستان سوداګریز کسر د افغانستان په ګډون له ۹ ګاونډیو هېوادونو سره د پام وړ زیات شوی دی.

راپور ښيي چې په دې موده کې د پاکستان واردات د صادراتو په پرتله ډېر شوي او د سوداګریز کسر کچه شاوخوا ۳۹.۳۳ سلنه لوړه شوې ده.

د معلوماتو له مخې، د پاکستان د ګاونډیو هېوادونو سره د سوداګریز کسر ارزښت څه دپاسه ۶۰ میلیاردو ډالرو ته رسېدلی دی، چې د اقتصادي فشارونو د زیاتوالي نښه ګڼل کېږي.

کارپوهان وايي، د سوداګریز کسر زیاتوالی د وارداتو د لوړوالي او د صادراتو د ټیټوالي له امله رامنځته شوی، او د دې وضعیت د اصلاح لپاره د سوداګرۍ او اقتصادي پالیسیو په برخه کې اقدامات اړین دي.

د امریکا د تګزاس ایالت کې مکسیکو پورې اړوند یوه کوچنۍ الوتکه لوېدلې چې له امله یې د یوه ماشوم په ګډون شپږ کسان وژل شوي دي.

د رویټرز خبري اژانس د راپور له مخې، دغه الوتکه یو دوه کلن ماشوم چې سخت سوځېدلی و، د بیړنۍ درملنې لپاره له مکسیکو څخه امریکا ته لېږداوه.

چارواکو ویلي، الوتکه د الوتنې پر مهال له ستونزې سره مخ شوه او وروسته ولوېده.

په راپور کې راغلي چې په الوتکه کې ټول اته کسان سپاره وو، چې له ډلې یې شپږ تنو خپل ژوند له لاسه ورکړی او دوه نور ژغورل شوي دي.

د ترکیې د کورنیو چارو وزارت تایید کړی چې د لیبیا د پوځ لوی درستیز محمد علي احمد الحداد د الوتکې د لوېدو له پېښې وروسته انقرې کې مړ شوی دی.

د لیبیا ولسمشرۍ شورا هم خبر ورکړی چې الحداد له څو نورو لوړپوړو نظامي چارواکو سره وژل شوی دی.

د ترکیې د کورنیو چارو وزیر په وینا، الوتکې د حیمانا سیمې په فضا کې د بېړنۍ ناستې غوښتنه وکړه؛ خو له هغې وروسته یې اړیکه پرې شوه.

د لیبیا لومړي وزیر عبدالحمید الدبیبه د پېښې له امله د خپل هېواد د پوځ د لوی درستیز پر مړینه خواشیني څرګنده کړې ده.

د پښتنو یوې قبایلي جرګې له پاکستاني حکومت غوښتي چې د چمن دروازه دې ژر پرانیزي، څو هغه زرګونه مسافر او سوداګر بېرته خپلو کورونو ته ستانه شي چې له اکتوبر راهیسې په افغانستان کې بند پاتې دي.

قبایلي مشرانو ویلي، د ډیورنډ کرښې د تړل کېدو له امله سوداګریز فعالیتونه ځنډېدلي او بشري ستونزې رامنځته شوې دي.

دوی زیاته کړې چې ډېری مسافر قانوني اسناد لري، خو د ستنېدو اجازه نه ورکول کېږي، او زرګونه بار وړونکې لارۍ هم د خوړو له کمښت سره مخ دي.

مشرانو د ازاد سفر غوښتنه کړې او د درې ورځنۍ جرګې د جوړېدو اعلان یې کړی.

له ۵۰ څخه زیاتو نامتو جرمني سیاستوالو، فرهنګي څېرو او د بشري حقونو فعالانو د یوه پرانیستي لیک له لارې له فدرالي حکومت غوښتي، هغه افغان وګړي دې ژر تر ژره جرمني ته ولېږدوي چې مخکې ورسره د منلو رسمي ژمنه شوې ده.

د جرمني رسنیو د راپورونو له مخې، په لیک کې راغلي چې شاوخوا ۱۸۰۰ افغانان، چې پخوا یې له جرمني بنسټونو سره همکاري کړې او دا مهال په پاکستان کې مېشت دي، د جبري ستنولو له جدي ګواښ سره مخ دي.

لیکوالانو خبرداری ورکړی چې دغو کسانو ته په افغانستان کې د بېرته ستنېدو په صورت کې امنیتي خطرونه متوجه دي.

د لیک لاسلیک کوونکو پر جرمني حکومت غږ کړی چې د خپلو بشري او اخلاقي مسوولیتونو له مخې دې د دغو افغانانو د خوندي انتقال بهیر چټک کړي او ځنډ دې پای ته ورسوي.