د ایران د ههنګاو د بشري حقونو سازمان د راپور له مخې، ایران په روان میلادي کال کې لږ تر لږه ۵۲ ښځې اعدام کړې دي چې دا شمېر په تېرو ۲۵ کلونو کې د ښځو د اعدام تر ټولو لوړه کچه بلل کېږي.
د راپور له مخې، وروستۍ اعدام شوې ښځه ۴۰ کلنه راضیه عباسي وه چې د کرج په قزلحصار زندان کې یې د اعدام حکم پلی شو.
دغه بنسټ وایي، ډېری ښځې د قتل، نشهيي توکو، کورني تاوتریخوالي پر وړاندې د ځاندفاع او همداراز د سیاسي او امنیتي تورونو له امله اعدام شوې دي.
هند یو ځل بیا له افغانستان سره د بشري مرستو او روغتیايي همکارۍ پر دوام ټینګار کړی او ویلي یې دي چې د اساسي درملو د اوږدمهاله برابرولو ته ځانګړې پاملرنه کوي.
د هند د روغتیا وزارت د یوې اعلامیې له مخې، د دې هېواد د روغتیا وزیر جګهت پراکاش نډا د طالبانو حکومت د عامې روغتیا له وزیر مولوي نور جلال جلالي سره ګټوره ناسته کړې ده.
په دې لیدنه کې د روغتیايي همکاریو پیاوړتیا او د افغانستان د طبي اړتیاوو د ملاتړ په اړه خبرې شوې دي.
د دغې ژمنې په لړ کې، هند افغانستان ته د سرطان درمل او واکسینونه په سمبولیک ډول وسپارل، چې دا د افغان ولس سره د روان ملاتړ نښه بلل شوې ده.
همداراز یاد وزارت ویلي، چې یوه لویه مرستندویه بسته، چې درمل، واکسینونه او د ۱۲۸ سلایس سي ټي سکن دستګاه پکې شامله ده، هم افغانستان ته لېږل کېږي.
د امریکا ولسمشر ډونالډ ټرمپ وايي، د ده تر مشرۍ لاندې حکومت د ایران اټومي خطر له منځه وړی دی.
هغه د خلکو یوې غونډې ته د وینا پر مهال ادعا وکړه، چې د ایران اټومي پروګرام یې شنډ کړی او په غزه کې یې هم جګړه پای ته رسولې ده.
د یادونې ده چې تېره ورځ د ایران د بهرنیو چارو وزیر عباس عراقچي هم ویلي وو چې امریکا د ایران د اټومي تاسیساتو په له منځه وړلو کې بریالۍ وه.
د امریکا ولسمشر ډونالډ ټرمپ وايي، په ۱۰ میاشتو کې یې ۸ جګړې درولې او داسې جدي او کوټلی ګام یې اخیستی چې هېچا نه و کړی.
ټرمپ په واشنګټن کې د وینا پر مهال وویل، یو کال مخکې امریکا مړه وه او د ناکامۍ تر پولې رسېدلې وه؛ خو په یوه کال کې چې موږ څه ترلاسه کړي، هغه هېچا نه دي ترلاسه کړي.
هغه یو ځل بیا د پخواني ولسمشر جوبایډن پر پالیسۍ نیوکه وکړه او زیاته یې کړه چې نور د هغه مهال پالیسي پای ته رسیدلې او د عملي کیدو وړ نه ده.
ډونالډ ټرمپ وویل چې هغه ته د فاسد نظام د له منځه وړلو لپاره دروند ولسي واک (مینډېټ) ورکړل شوی او په امریکا کې یې د غیرقانوني تګ راتګ لړۍ بنده کړې ده.
د امریکا ولسمشر زیاته کړه چې د ځمکې او سمندر له لارې د نشهيي توکو راوړل یې ۹۴ سلنه کم کړي دي.
د افغانستان د فوټبال فدراسیون وایي، محمد یوسف کارګر د فیفا د انکشافي او تخنیکي کمېټې افتخاري غړیتوب رسمي سند او کارت د یوې نړیوالې ناستې پر مهال ترلاسه کړ.
په همدې ناسته کې د فیفا مشر جیاني انفانتینو له ښاغلي کارګر سره په لیدنه کې د افغانستان د فوټسال او فوټبال وروستیو بریاوو ستاینه کړې ده.
یاد فدارسیون ویلي، چې په دې ناسته کې د ۲۰۲۶ کال لپاره د فوټبال د پراختیا او تخنیکي پروګرامونو په اړه بحثونه وشول.
د یادونې ده چې محمد یوسف کارګر به تر ۲۰۲۹ کال پورې د فیفا د انکشافي او تخنیکي کمېټې غړی پاتې شي.
د امریکا کانګرس د ۲۰۱۹ کال «سزار قانون» په لغوه کولو سره د بشار اسد د واکمنۍ پر مهال پر سوریې ټول لګول شوي تحریمونه پای ته ورسول.
دا پرېکړه د امریکا د استازو جرګې وروسته د سنا مجلس له لورې د رایو په اکثریت تائید شوه او تمه ده ولسمشر ټرمپ یې هم لاسلیک کړي.
امریکايي چارواکي وایي، د تحریمونو دایمي لغوه کېدل به جګړهځپلې سوریې ته د بهرنیو پانګونو د بېرته راګرځېدو لاره هواره کړي او د هېواد د اقتصادي بیا رغونې بهیر به چټک کړي.
د سوریې موقت حکومت دا اقدام د پانګوالو د حقوقي اندېښنو د ختمولو لپاره مهم بللی.
د وحدت اسلامي ګوند مشر محمد محقق وايي، د نړۍ هېڅ هېواد د طالبانو پر ضد د کورنۍ جګړې ملاتړ نه کوي.
هغه د طالبانو له حکومت وغوښتل چې له سختدریځۍ لاس واخلي او معقولو خبرو اترو ته حاضر شي.
محمد محقق ویلي: «نړۍ وايي جګړه مه کوئ. ختیځ او لوېدیځ وايي جګړه مه کوئ. ګاونډیان هم وايي جګړه مه کوئ.»
نوموړي دا څرګندونې د سهشنبې په ورځ،د خپل تازه چاپ شوي خاطراتي کتاب د مخکتنې په غونډه کې وکړې.
هغه ټینګار وکړ چې که څه هم ځینې هېوادونه طالبانو ته مالي مرستې کوي، خو نړیواله ټولنه له فکري پلوه له دې ډلې لرې شوې او د طالبانو واکمني په رسمیت نه پېژني.
محمد محقق ادعا کړې چې «طالبان نه پاتې کیږي او تلونکي دي» او زیاته یې کړه چې وروستیو کې سیاسي بهیرونو او ګوندونو په دې برخه کې «متحد دریځ» خپل کړی دی.
محمد محقق یو ځل بیا ویلي، چې هېڅوک د جګړې پلوی نه دي.
هغه له طالبانو وغوښتل چې معقولو او مانادارو خبرو ته چمتو شي او له نړیوالې ټولنې یې وغوښتل چې د طالبانو او د هغوی د مخالفینو ترمنځ د خبرو زمینه برابره کړي
د هېواد مشهورې سندرغاړې اریانا سعید ویلي، چې د زلاله هاشمي د نادرکه کېدو په اړه خپرې شوې اندېښنې سمې نه وې او هغه ژوندۍ او په خوندي حالت کې ده.
د هغې په وینا، زلاله هاشمي د کورنیو ستونزو له امله له خپل مېړه سره یو ځای خوندي ځای ته تللې ده.
اریانا سعید ټینګار کړی، چې دا پېښه جنايي اړخ نه لري او له خلکو او رسنیو یې غوښتي، چې له اوازو خپرولو ډډه وکړي او د ښځو شخصي حریم ته درناوی ولري.
دا په داسې حال کې ده چې څه موده مخکې د سندرغاړې زلاله هاشمي د نادرکه کیدو اوازې خپرې شوې.
د طالبانو حکومت استخباراتي رسنۍ المرصاد د رسمي امنیتي سرچینو په حواله راپور ورکړی، چې د طالبانو حکومت ځانګړو ځواکونو د بدخشان ولایت په فیضاباد ښار شاوخوا کې نن شپه ځانګړي عملیات ترسره کړي، چې په پایله کې یې د چینایي وګړو پر ضد د بریدونو په تړاو یو مطلوب شکمن شخص ژوندی نیول شوی دی.
د راپور له مخې، یاد عملیات پر هغه پټنځای ترسره شوي چې شکمن کسان پکې مېشت وو او ګومان کېږي، په ګاونډي تاجکستان کې پر چینایي اتباعو د بریدونو سره تړاو لري.
امنیتي سرچینې وایي، له نیول شوي کس سره وسلې او نور پوځي تجهیزات هم ترلاسه شوي دي.
المرصاد لیکلي، د ځانګړې څېړنې لومړنۍ موندنې او د نیول شوي کس ابتدایي اعترافونه ښيي، چې د یادو بریدونو د پلان جوړونه د افغانستان له خاورې بهر شوې وه.
د ننګرهار پخواني والي ضیاءالحق امرخېل ویلي، د لارو بندېدل که څه هم له ګاونډیو هېوادونو سره اقتصادي تاوانونه لري؛ خو دا زیانونه موقتي دي.
د هغه په وینا، دغه بندیزونه کولی شي خلک کورني صنعت ته وهڅوي او په هېواد کې د صنعتي فرهنګ د ودې لامل شي.
امرخېل ټینګار کړی، چې ولس باید اوسنۍ سختۍ وزغمي، څو په راتلونکي کې دوامداره هوساینه او ځانبسیاینه ترلاسه شي.