یلدا حکیم، چې په سکای نیوز کې کار کوي، د نړیوالو رسنیو په ډګر کې د خپل اغېزناک حضور له امله ستایل شوې ده.
نوموړې د سیاسي موضوعاتو د مسلکي پوښښ او زړورتیا له کبله د کال د غوره ټلوېزیوني ویاندې جایزه ګټلې ده.
د افغانستان پخواني ولسمشر حامد کرزي پر خپله ټولنیزه پاڼه د یو بیان په خپرولو سره د یلدا حکیم ستاینه کړې او د هغې بریا یې د افغانانو لپاره ویاړ بللی دی.
د پاکستان د بهرنیو چارو وزارت ویلي چې د پاکستان پر امنیت، خپلواکۍ او د خلکو پر خوندیتوب هېڅ ډول جوړجاړی نه شي کېدای.
یاد وزارت له افغانستان څخه غوښتنه کړې چې د پاکستان امنیتي اندېښنې په پام کې ونیسي او پر افغان خاوره د هغو وسلهوالو ډلو پر ضد جدي اقدام وکړي چې د پاکستان پر ضد فعالیت کوي.
په بیان کې د طالبانو حکومت یادونه هم شوې چې د پاکستان د اندېښنو په حل کې یې کافي اقدام نه دی کړی.
د پاکستان د بهرنیو چارو وزارت ویلي چې له ۲۰۲۱ کال وروسته له افغانستانه د بریدونو شمېر زیات شوی او تېر کال شاوخوا ۵۳۰۰ بریدونه ثبت شوي چې له امله یې شاوخوا ۱۲۰۰ کسانو ته مرګژوبله اوښتې ده.
د پاکستان په وینا، په افغانستان کې د تحریک طالبان پاکستان او نورو وسلهوالو ډلو شتون د سیمې او نړۍ امنیت ته ګواښ دی.
یاد وزارت ټینګار کړی چې پاکستان د ډیپلوماسۍ او خبرو اترو ملاتړ کوي او غواړي له افغان لوري سره رغنده تعامل ته دوام ورکړي.
د یادونې ده چې د طالبانو حکومت په ځلونو د پاکستان دا ډول ادعاوې په کلکه رد کړي دي.
د امریکا د بهرنیو چارو وزارت د ایران هغه ادعا په بشپړه توګه رد کړې چې ګواکې په دوبۍ کې د امریکا پر قونسلګرۍ برید کې ۱۰۰ امریکايي پوځیانو یا ملکي وګړو ته مرګژوبله اوښتې ده.
دغه وزارت ویلي چې په برید کې هېڅ څوک نه دی وژل شوی او نه هم ټپي شوی دی.
د امریکا بهرنیو چارو وزارت له نړیوالې ټولنې غوښتي چې د امریکا او نورو هېوادونو پر ډیپلوماټیکو تاسیساتو د ایران غیرقانوني او ویجاړونکي بریدونه وغندي.
همدارنګه یاد وزارت ویلي چې په متحده عربي اماراتو کې له هغو امریکايي وګړو سره په مستقیم تماس کې دی چې د مرستې غوښتنه یې کړې او د هغوی د ایستلو لپاره د چارتر الوتنو د تنظیم هڅې روانې دي.
د طالبانو حکومت د ټولګټو چارو وزارت وایي چې د هېواد د اوسپنې پټلۍ له لارې د توکو د لېږد بهیر په عادي ډول روان دی او تر اوسه د انتقالاتو په برخه کې کوم خنډ نه دی رامنځته شوی.
یاد وزارت په خپره شوې خبرپاڼه کې ویلي، چې د هېواد د اوسپنې پټلۍ د څلورو بندرونو له لارې د مالونو انتقالات منظم دوام لري.
د خبرپاڼې له مخې، د ۱۴۰۴ لمریز کال د کب له ۸مې نېټې څخه تر ۱۲مې پورې د اوسپنې پټلۍ له لارې ټولټال ۱۲۷ زره او ۶۵۰ مټریک ټنه توکي لېږدول شوي دي.
د وزارت په وینا، د رېل پټلۍ له لارې د توکو لېږد د سوداګرۍ د اسانتیا او اقتصادي فعالیتونو د پیاوړتیا لپاره مهم رول لري.
پاکستاني رسنیو راپور ورکړی چې د دغه هېواد یو شمېر سیاسي ګوندونو، د جمعیت علمای اسلام ګوند په ګډون، له حکومته غوښتي چې د افغانستان له حکومت سره د ستونزو د حل لپاره خبرې پیل کړي.
د یاد ګوند مشر مولانا فضل الرحمن په یوې غونډه کې ویلي چې د ستونزو د حل تر ټولو ښه لار خبرې دي او د پاکستان حکومت باید د خبرو اترو لاره خپله کړي.
بل لور ته د پاکستان لومړي وزیر شهباز شریف د ځینو سیاسي ګوندونو له مشرانو سره په یوه انلاین غونډه کې د هېواد د امنیتي وضعیت په اړه خبرې کړې دي.
په دې غونډه کې د ځینو نورو ګوندونو مشرانو بیا د افغانستان پر وړاندې د پوځي اقداماتو ملاتړ هم څرګند کړی دی.
امنیتي سرچینې وایي چې د بلوچستان ایالت د کچلاغ او کوېټې ترمنځ سیمه کې د ایف سي پر عمومي قومندانۍ برید شوی دی.
د سرچینو په وینا، دا عملیات د بلوچستان په کچه د «غزهبند» په نوم ترسره شوي چې هدف یې د پاکستان د سرحدي ځواکونو مرکز و.
راپورونه زیاتوي چې د برید په پایله کې د پاکستان د پوځ یو شمېر سرتېرو ته مرګژوبله اوښتې ده، خو د تلفاتو کره شمېر لا نه دی څرګند شوی.
ویل کېږي چې دا برید د طالبانو حکومت وروسته له هغې کړی چې د پاکستان پوځ پر کندهار هوایي بریدونه کړي وو.
د امریکا د سنا جرګې غړو هغه طرحه رد کړه چې غوښتل یې د ډونالډ ټرمپ حکومت دې د کانګرس له اجازې پرته پر ایران بریدونه ودروي.
په سنا کې د ۱۰۰ غړو له ډلې دا طرحه د ۵۲ مخالفو او ۴۷ موافقو رایو په اکثریت رد شوه.
د سنا ډېری سناتورانو د ایران پر وړاندې د پوځي عملیاتو ملاتړ وکړ.
دغه طرحه د ډیموکرات او جمهوري غوښتونکو ځینو سناتورانو له لوري وړاندې شوې وه.
په دې طرحه کې غوښتنه شوې وه چې پر ایران روان هوايي بریدونه دې ودرول شي او که هر ډول پوځي اقدام کېږي، نو باید د کانګرس رسمي اجازه ترلاسه شي.
خو د سنا اکثریت غړو د دې طرحې مخالفت وکړ او له همدې امله طرحه تصویب نه شوه.
اوس مهال په سنا کې د جمهوري غوښتونکي ګوند اکثریت دی چې ۵۳ څوکۍ لري.
د ډیموکرات ګوند ۴۵ څوکۍ لري او دوه خپلواک سناتوران هم شته چې زیاتره وخت د ډیموکراتانو ملاتړ کوي.
د برېتانیا د استخباراتي ادارې MI6 پخواني مشر جان سوارز ویلي چې د ایران پر ضد روانه جګړه غیر ضروري او بې ګټې ده.
نوموړي له یوه امریکايي ټلویزیون سره په مرکه کې ویلي چې له ایران سره د جګړې اړتیا نه وه، ځکه د ایران له لوري د برید کوم جدي ګواښ موجود نه و.
د هغه په وینا، که په ایران کې اوس وضعیت ښه هم شي، ښايي د وینزویلا په څېر حالت رامنځته شي؛ خو امکان لري چې وضعیت تر دې هم ډېر خطرناک شي.
بل لور ته ډیموکراټیک سناتور کرس مرفي هم د حکومت پر پرېکړو نیوکه کړې ده.
هغه ویلي چې د ډونالډ ټرمپ خبرې له هغه څه سره سمون نه خوري چې د امریکا د بهرنیو چارو وزیر مارکو روبیو یې وایي، او دا روښانه نه ده چې امریکا ولې له ایران سره جګړه پیل کړه.
د یادونې ده چې مارکو روبیو ویلي و:«موږ پوهېدو چې که پر ایران برید وشي، ایران به سمدستي پر امریکايي ځواکونو برید وکړي؛ نو موږ نه غوښتل چې لومړی ضربه موږ ته ورسېږي.»
د روسیې ولسمشر ولادیمیر پوتین وایي، روسیه ښايي اروپا ته د ګازو رسونه بنده کړي، په ځانګړي ډول وروسته له هغه چې د جګړو له امله د انرژۍ بیې لوړې شوې دي.
نوموړي ویلي، اروپايي اتحادیه هڅه کوي چې پر روسي ګاز او مایع طبیعي ګاز (LNG) بندیزونه ولګوي.
پوتین زیاته کړې، که پر روسي ګاز او تېلو بندیزونه ولګول شي، نو مسکو به د نورو بازارونو لکه چین لور ته مخه کړي.
د بهرنیو رسنیو د راپورونو له مخې، د روسیې پر انرژۍ د اروپا د تکیې له کمېدو سره، مسکو هڅه کوي خپل صادرات نورو نړیوالو بازارونو ته واړوي.
د جمهوري نظام د کورنیو چارو وزارت امنیتي مرستیال، جنرال خوشال سادات ویلي چې د پاکستان ډېری جنګي الوتکې او مهمات د امریکا جوړ دي او په اوسني وضعیت کې امریکا او اسراییل خپلو اکمالاتو ته لومړیتوب ورکوي.
د هغه په وینا، که پاکستان ته د بمونو او تخنیکي پرزو رسونه کمه شي؛ نو ښایي د دې هېواد د هوايي ځواک مهمات ژر محدود شي او اړ شي چې خپلې ستراتیژیکې زېرمې وکاروي، هغه څه چې د هند له احتمالي ګواښ سره د مقابلې له امله ورته اسانه نه دي.
سادات زیاتوي چې افغانستان د درنو وسلو پر ځای انساني ځواک او قوي دیني انګېزه لري او د ده په باور، همدا ځواک کولای شي پرته له هوايي بمبار څخه هم پر پاکستان فشار واچوي او امنیتي ستونزې رامنځته کړي.