د طالبانو حکومت د کورنیو چارو وزارت وايي، په کابل کې یې اووه تنه چې په مسلکي ډول په سوالګري بوخت وو، نیولي دي.
له یاد وزارت څخه په خپره شوې خبرپاڼه کې راغلي، دغه کسان د ښار په بېلابېلو سیمو کې د جلا عملیاتو پر مهال ونیول شول.
د معلوماتو له مخې، په نیول شویو کسانو کې ښځې هم شته او له دوی څخه نږدې ۶۷۶ زره افغانۍ نغدې پیسې، درې د سرو زرو لاکټونه او د یوه موټر اسناد ترلاسه شوي دي.
چارواکي زیاتوي، نیول شوي کسان له لومړنیو پوښتنو وروسته د طالبانو حکومت عدلي او قضايي ادارو ته سپارل شوي دي.
