په دې نړۍ کې د یو دیکتاتور په توګه، څوک کولی شي هر هغه څه وکړي چې زړه یې غواړي، پرته له دې چې د خلکو نظر ته اهمیت ورکړي. دا ډول مطلقه واک اکثره وخت دیکتاتوران د عجیب او بې عقلانه کړنو ته هڅوي. په دې مقاله کې، موږ د ځینو دیکتاتورانو هغه بې ګټې او عجیب کارونه څیړو چې دوی د خپلې واکنۍ پر وخت کړي دي.
پول پوټ – کمبودیا ـ له رياضياتو څخه کرکه
پول پوټ، چې د ۱۹۷۵ نه تر ۱۹۷۹ پورې د کمبودیا واکمن و، ریاضیات یې له ماشومتوبه نه خوښیدل. کله چې واک ته ورسید، نو یې په ټوله کمبودیا کې د ریاضیاتو زده کړه منع کړه او ټول ریاضي کتابونه یې وسوځول. ده باور درلود چې لوړ ریاضیات د لویدیځې نړۍ د زوال نښه ده او دا چې رياضيات د خپلواک فکرونو مخه نيسي. خو ده په حقیقت کې د ریاضیاتو د زده کړې منع کولو له لارې هڅه کوله چې له خلکو څخه خپله علمي برتري واخلي. له ساينس څخه د پول پوټ کرکه ښايي د يو ځانګړي آسيايي هيواد خلکو ته داسې اشنا اشنا غوندې ښکاره شي.
انور خوجه – البانیا ـ د پخو مورچلونو هيواد
انور خوجه، چې د البانیا واکمن و، باور یې درلود چې البانیا به د دښمنانو لخوا ونیول شي. له دې امله یې په ۷۰ او ۸۰مو کلونو کې د هېواد په هر ګوټ کې نږدې یو میلیون پاخه د پناه ځايونه يا مورچلونه جوړ کړل. دا مورچلونه دومره زیات و چې هر څلور البانیایانو ته دغه يو پوخ او ګومبدې ته ورته جوړښت لرونکې ودانۍ رسېدله. خو، دا ودانۍ دومره کوچنۍ او بې ګټې وې چې هر بزګر کولای شوای په یوه تبر سره یې ویجاړې کړي. هوسکا د دې پر ځای چې د خپل وږي او مسکين ولس په ښېګڼه پيسې مصرف کړي، بېځايه او بې فايدې پناه ځايونه يې جوړ کړل.
معمر القذافي – لیبیا ـ د باکره ښځينه عسکرو ګارد
معمر القذافي، چې تر ۲۰۱۱ پورې د لیبیا واکمن و، په ځانګړو او عجیب شیانو پسې و. ده د شخصي محافظینو په توګه د امازون ګارډ، چې یوه ښځينه وسله واله ډله وه، د ځان لپاره رامنځته کړه. دا ښځې نه یواځې لوړ قد لرونکې او قوي وې، بلکې دوی تل باید باکرې پاتې شوې وای چې دا د واکمن القذافي سره د دوی د وفادارۍ نښه بلل کېدله.
قربانقلي بردي محمدوف – ترکمنستان ـ د خپل سپي ۶ متره هسکه طلايي مجسمه
قربانقلي بردي محمدوف، چې تر ۲۰۲۲ پورې د ترکمنستان واکمن و، په خپله واکنۍ کې لپاره بې شمیره عجیب کارونه وکړل. ده په پلازمینه کې د خپل محبوب سپي یوه ۶ متره لوړه طلایي مجسمه جوړه کړه. همدارنګه، ده یو کتاب ولیکه چې په هغه کې یې دغه سپی په شعرونو کې وستایه.
سپامورات نیازوف – ترکمنستان ـ پر مياشتو د خپلې کورنۍ د غړو نومونه ايښودل
سپامورات نیازوف، چې د ترکمنستان مخکېنی واکمن و، د ځان په نامه د میاشتې او ورځې نومونه بدل کړل. همدارنګه، ده د خپل ځان یوه ۱۲ متره لوړه طلایي مجسمه جوړه کړه چې هر وخت د لمر خوا ته تاویږي. ده یو کتاب هم ولیکه چې په ښوونځیو او پوهنتونونو کې د زده کوونکو لپاره لازمي کتاب و. د موټر چلونې د جواز اخيستلو په امتحان کې به هم له دغه کتاب څخه پوښتنې راتللې.
کیم جونګ اون – شمالي کوریا ـ د ۲۰۰۰ ښځو د خوشحالۍ ډله
کیم جونګ اون، د شمالي کوریا واکمن، د ۲۰۰۰ ښځو د خوشحالۍ ډله جوړه کړې وه چې د ده او لوړ پوړو جنرالانو د خوشحالۍ لپاره وه. دا ښځې په ځانګړو ښوونځیو او پوهنتونونو کې انتخاب شوې او بیا یې د مختلفو هنرونو او مساج زده کړه وکړه. پکښې بعضې يې حتی تر سن کم عمر لرونکي وي. له پنځه ويشت کلنۍ وروسته دغه د ساعت تيري په کار مامورې ښځې له کاره ليرې کيږي او پر ځای يې د کم عمر نوې مېرمنې راځي.
جان بوډل بوکاسا – مرکزي افریقایي جمهوریت ـ د قيصر پيښې
جان بوډل بوکاسا، د مرکزي افریقایي جمهوریت واکمن، د خپل ځان د قیصر په څیر ژوند کولو لپاره خپلې واکني کاروله. ده د ناپلیون بوناپارټ د تاج پوشۍ د مراسمو په څیر خپل تاج پوشۍ مراسم ترسره کړل چې په هغه کې یې زرګونه قیمتي جواهرات، شراب، او ګلونه شامل ول. دا مراسم د هېواد د کلني بودیجې له دريمې څخه په زیاته برخه د لګښتونو سبب شول. دا په داسې حال کې چې د مرکزي افريقا جمهوريت خلک بې وزله او وږي ول.
په دې توګه، يادو دیکتاتورانو نه یوازې د خپلې واکمنۍ په وخت کې بې شمیره بې ګټې او عجیب کارونه کړي دي، بلکې د خپلو خلکو ژوندونونه یې هم اغیزمن کړي دي.
ستاسو په هيواد کې چا کله او څنګه خپله سرچپه واکمني چلولې او له خپل واک څخه يې بېځايه ګټه پورته کړې ده؟!
احمدولي اڅکزی
