اکسیوس د دوو باخبره سرچینو له قوله راپور ورکړی چې د امریکا ولسمشر ډونالډ ټرمپ به د پنجشنبې په ورځ د امریکا د مرکزي قوماندې (سنتکام) له مشر جنرال براد کوپر څخه د ایران پر وړاندې د احتمالي پوځي اقداماتو په اړه معلومات ترلاسه کړي.
د راپور له مخې، سنتکام داسې طرحه چمتو کړې چې پکې پر ایران لنډمهاله خو شدید بریدونه شامل دي، او ښايي د زیربناوو هدف ګرځول هم پکې وي.
سرچینې وایي، بل وړاندیز شوی پلان د هرمز تنګي د یوې برخې د نیولو په اړه دی، څو دا مهمه نړیواله سوداګریزه لاره بیا د تجارتي بېړیو پر مخ پرانېستل شي.
په راپور کې دا هم ویل شوي چې دا عملیات ممکن د ځمکنيو ځواکونو کارول هم ولري.
اکسیوس زیاتوي چې په غونډه کې ښايي د ځانګړو ځواکونو هغه عملیات هم مطرح شي چې هدف یې د ایران د لوړ غلظت لرونکي یورانیمو زیرمو ترلاسه کول دي.
