د طالبانو حکومت د چارو ادارې رئیس نورالحق انور ادعا کړې چې د پخواني نظام پر مهال په افغانستان کې پوهنتونونه د «بېحیايۍ» پر مرکزونو بدل شوي وو.
نوموړي دا څرګندونې په کابل کې د نوي تعلیمي کال د پیل په مراسمو کې وکړې.
هغه وویل، په پخواني نظام کې په پوهنتونونو کې د جوماتونو پر ځای کتابتونونه جوړېدل او د ده په وینا، همدې چارې د «بېحیايۍ» فضا رامنځته کړې وه.
انور ټینګار وکړ چې له دې وروسته به د طالبانو چارواکي پر پوهنتوني استادانو د ږیرې پرېښودو او د «سنت» او «افغاني کلتور» له مخې د جامو اغوستلو ته جدي پاملرنه وکړي.
دا څرګندونې په داسې حال کې کېږي چې نوی تعلیمي کال پیل شوی، خو د نجونو پر زدهکړو سخت بندیزونه لا هم پر خپل ځای پاتې دي.
د شپږم ټولګي څخه پورته نجونې د پنځم پرلهپسې کال لپاره ښوونځیو ته له تګه محرومې دي، او طالبانو حکومت هغوی له پوهنتونونو او حتی د طبي زدهکړو له دوام څخه هم منع کړې دي.
د طالبانو تازه دریځ د هېواد د لوړو زدهکړو راتلونکې او د علمي بنسټونو پر خپلواکۍ نوې پوښتنې راولاړې کړې دي، په داسې حال کې چې د نجونو د زدهکړو دوامداره بندیزونه لا هم د کورنیو او نړیوالو اندېښنو سبب ګرځېدلي دي.
