آکسیوس د یوې باخبره سرچینې په حواله راپور ورکړی چې د ایران چارواکو هغو هېوادونو ته چې د امریکا او تهران ترمنځ د سولې د خبرو د منځګړیتوب هڅه کوي، ویلي چې دوی نه غواړي یو ځل بیا د ډونالډ ټرمپ له خوا وغولول شي.
د راپور له مخې، ایراني چارواکو پاکستان، مصر او ترکیه ته ویلي چې د امریکا پوځي تحرکاتو او د اضافي ځواکونو استولو د دې شکونه زیات کړي چې ښايي د خبرو وړاندیز یوازې یو تاکتیک وي.
بل لور ته، امریکايي او اسراییلي چارواکي وایي چې ټرمپ په یو وخت کې هم د ډیپلوماسۍ او هم د پوځي فشار تګلاره مخ ته وړي او ښايي حتی د احتمالي خبرو په صورت کې هم جګړه د څو اوونیو لپاره دوام ومومي.
