د امریکا د بهرنیو چارو وزارت د نړۍ په کچه د خپلو اتباعو لپاره نړیوال خبرداری خپور کړی او له امریکایانو یې غوښتي چې په ځانګړي ډول په منځني ختیځ کې ډېر احتیاط وکړي.
د یاد وزارت د قونسلګرۍ چارو څانګې ویلي چې د سیمې د کړکېچ له امله ښايي په ځینو هېوادونو کې هوايي حریم لنډ مهاله وتړل شي او د سفرونو په بهیر کې هم جدي ګډوډي رامنځته شي.
په خبرپاڼه کې همداراز ویل شوي چې د امریکا ډیپلوماتیک تاسیسات، حتی له منځني ختیځ څخه بهر هم، مخکې هدف ګرځېدلي دي او د ایران ملاتړي ډلې ښايي د امریکا اړوند نور ځایونه او ګټې هم په نړۍ کې په نښه کړي.
