د پخواني ولسمشر اشرف غني د ویاند مرستیال شاه حسین مرتضوي د پاکستان د وروستي تیري په اړه ویلي چې د افغانستان د ځمکنۍ بشپړتیا ساتنه یوازې د طالبانو د حکومت دنده نه ده، بلکې ټول افغانان باید په کې خپل مسوولیت ادا کړي.
هغه ټینګار کړی چې په داسې حساسو شرایطو کې باید سیاسي اختلافات څنډې ته کړل شي.
ښاغلي مرتضوي زیاته کړې چې د تاریخ په اوږدو کې د پاکستان سیاست د افغانستان په ګټه نه دی تمام شوی.
د هغه په وینا، دا تمه کول چې افغانستان به د پاکستان له لارې پرمختګ او سوکالي ومومي، یوه ناسمه هیله ده.
نوموړي وویل چې د هېواد د دفاع مسئله ملي ارزښت لري او اړتیا ده چې ټول افغانان، له هر سیاسي فکر سره سره، د خپل وطن د ساتنې لپاره یو موټی شي.
هغه باور لري چې سیاسي اختلافونه باید د خلکو ترمنځ د بېلتون لامل ونه ګرځي.
مرتضوي همداراز له هغو افغانانو چې په بهر کې ژوند کوي وغوښتل، څو د افغانستان د ملي ګټو ملاتړ وکړي او خپل غږ پورته کړي.
