د عزیزي ګروپ مشر میرویس عزیزي د طالبانو حکومت د رییس الوزرا اقتصادي مرستیال ملا عبدالغني برادر ته د ۱۰ زره میګاواټه برېښنا د تولید پروژې راپور وړاندې کړی دی.
هغه ویلي، تر هوکړې وروسته، تخنیکي ټیمونو په بغلان، بلخ، جوزجان، هرات او بامیان کې د پروژې لومړنۍ ارزونې ترسره کړي دي.
نوموړي ویلي، پروژه په درېیو پړاوونو وېشل شوې، چې په لومړي پړاو کې به ۴ زره میګاواټه برېښنا تولید شي.
بل لورته ملا برادر د پروژې د څار لپاره ځانګړې کمېټه ټاکلې او لارښوونه یې کړې چې راپورونه دې اقتصادي مرستیالۍ ته وسپارل شي.
