په خیبر پښتونخوا کې د وروستیو سېلابونو او سختو ورښتونو له امله ۳۲۳ کسان مړه شوي او ۱۵۰ نور تري تم دي؛ خو د ټول د پاکستان په کچه بیا د مړو شویو کسانو شمېر ۶۵۷ ته رسېدلی دی.
چارواکي وايي، د ژغورنې عملیاتو لپاره پوځ پنځه الوتکې او یو نیم میلیارده پاکستانۍ روپۍ ځانګړې کړې دي.
په ګلګت بلتستان کې هم سېلابونو زرګونه کسان له ستونزو سره مخ کړي، لارې تړلې دي او د برېښنا، اوبو او مخابراتو خدمات ټکني شوي دي.
چارواکي وايي، سږکال ورښتونه د تېر کال پرتله ۶۰ سلنه زیات شوي او تر سپټمبر پورې د زیاتېدو احتمال لري.
