د افغانستان د ملي راډیو ټلویزیون پخواني مشر، اسماعیل میاخېل ویلي، هېڅوک نشي هېرولی چې پاکستان یو وخت طالبانو ته پټنځایونه ورکړل او د بېرته راتګ زمینه یې ورته برابره کړه چې له امله یې ټوله سیمه اغېزمنه شوه.
میاخېل زیاتوي، هر هغه نوښت چې غیرطالب سیاستوالو ته د راټولېدو او سیاسي جوړښت فرصت برابر کړي، یو مثبت ګام دی، ځکه افغانان د داسې یوه سیاسي بهیر مستحق دي چې د ټول ملت ونډه په کې وي، نه د یوې تندلارې ډلې استبداد.
نوموړي د زلمی خلیلزاد څرګندونې “نامسوولانه” بللې، ځکه خلیلزاد غیرطالب سیاستوال د تاوتریخوالي غوښتونکي بللي دي.
د میاخېل په وینا:«د حیرانتیا خبره خو دا ده چې د دوحې ناکام او بدنام تړون لاسلیکوونکی او د سولې په نامه د افغانستان د سقوط معمار، ښاغلی خلیلزاد چې طالبان یې یو وخت ترهګر خو تر ننه ورسره اړیکې پالي او لابي ورته کوي، دغه کار ماشومانه بولي. دی پرته له دې چې پټ ضمایم روښانه کړي د خپلو شخصي عقدو له امله هره مبارزه او هڅه چې د طالب په تاوان وي، تر پوښتنې راولي او هغه تحریموي.»
هغه دغه راز ویلي، که خلیلزاد پر بینالافغاني خبرو باور درلود؛ نو باید لومړی کس وای چې د هر هغې کړنې هرکلی یې کړی وای چې د ملي خبرو اترو او جوړجاړي فرصت په کې وي.
میاخېل ټینګار کوي چې هره هڅه او لاره چې پر طالبانو فشار راوړي او هغوی د بینالافغاني خبرو اترو مېز ته کېنوي، د ستایلو ده.
