د طالبانو حکومت ویاند ذبیح الله مجاهد ویلي، چې امریکا د دوی د رسمیت پېژندنې غوښتنې نه دي منلې.
نوموړي ویلي، چې «اسلامي امارت» څو ځله له امریکایي چارواکو سره د رسمیت پېژندنې او د سفارتونو د سپارلو غوښتنه کړې، خو مثبت ځواب یې نه دی ترلاسه کړی.
په وروستیو څلورو کلونو کې روسیه یوازینی هېواد دی چې د طالبانو حکومت یې په رسمیت پېژندلی او ایران او چین ورسره نږدې اړیکې لري.
بل لورته شنونکي وايي، د امریکا له سیالانو سره د طالبانو حکومت نږدې والی کولای شي د کابل او واشنګټن اړیکې لا ترینګلې کړي.
