د طالبانو حکومت د اطلاعاتو او کلتور وزارت وايي، واک ته له رسېدو وروسته نږدې ۲۴ زره بهرني سیلانیان افغانستان ته ورغلي دي.
د یاد وزارت ویاند خبیب غفران وایي، د ګرځندوی د اسانولو لپاره پروګرامونه روان دي او د تیر کال په ترڅ کې څلور هوټلونه جوړ شوي او سږ کال به څلور نور جوړ شي.
د غفران په وینا، د خصوصي سکتور په مرسته د ویزې غځولو، ژباړې، ترانسپورت او د کلتور د پېژندنې خدمتونه سیلانیانو ته برابریږي.
د یادونې ده چې د طالبانو حکومت ګرځندویان د عاید سرچینه او د اقتصاد د بیا راژوندي کېدو لاره بولي؛ خو منتقدان یې وايي چې په داسې حال کې چې افغان ښځې له بنسټیزو حقونو محرومې دي، بهرنۍ سیلانیانې د طالبانو حکومت د تبلیغاتي کمپاین برخه ګرځي.
