د طالبانو حکومت د ریاست الوزراء اداري مرستیال مولوي عبدالسلام حنفي نن له غرمې مخکې د یوه پلاوي په مشرۍ چین ته ولاړ، ترڅو د چین – جنوبي اسیا په نهم نندارتون او فورم کې ګډون وکړي.
د طالبانو حکومت مرستیال ویاند حمدالله فطرت لیکلي، چې یاد پلاوي د چین په رسمي بلنه دغه هیواد ته سفر کړی، چې په ترکیب کې یې د طالبانو حکومت د صنعت او سوداګرۍ سرپرست وزیر نورالدین عزیزي او د بهرنیو چارو وزارت مالي او اداري معین ډاکټر محمد نعیم وردګ هم شامل دي.
ټاکل شوې ده چې مولوي عبدالسلام حنفي به د دغه سفر په ترڅ کې د نندارتون او فورم ګډون او وینا تر څنګ، د چین له یو شمېر لوړپوړو چارواکو سره هم وګوري او د دواړو هیوادونو ترمنځ د اړیکو پراختیا، اقتصادي همکاریو او نورو مهمو موضوعاتو په اړه بحث او خبرې وکړي.
