د ۱۰ زره مېګاواټه برېښنا تولید پروګرام د پلي کېدو په لړ کې د جوزجان ولایت د شبرغان ولسوالۍ د جنګل کلان د طبیعي ګازو کان او د بغلان ولایت د پلخمري د ډبرو سکرو کان د اکتشاف او استخراج قراردادونه د طالبانو حکومت د اړوندو ادارو او عزیزي کانونو او پټرولیم شرکت ترمنځ لاسلیک شول.
د عزیزي ګروپ رییس میرویس عزیزي ویلي، د دغو قراردادونو د لاسلیک په مراسمو کې، چې په کابل کې د ریاست الوزراء د اقتصادي مرستیال ملا عبدالغني برادر په حضور کې ترسره شول، ګډون کړی دی.
نوموړي زیاته کړې، چې له ملا عبدالغني برادر، د کابینې له یو شمېر وزیرانو او د خپلواکو ادارو له رییسانو سره یې هم د برېښنا تولید، د طبیعي ګازو او ډبرو سکرو د کانونو د استخراج او اړوندو پروژو په اړه خبرې کړې دي.
عزیزي تر دې وړاندې هم ویلي وو، چې د عزیزي ګروپ له لوري په کابل کې د سرطان روغتون، نسايي ولادي روغتون او طبي پوهنتون د جوړولو چارې په عملي ډول پیل شوې دي.
