د جرمني د Isar Aerospace فضايي شرکت «سپېکټرم» توغندی د ناروې له Andøya فضايي اډې په بریالیتوب سره فضا ته وتوغول شو او د اروپا د سوداګریزو فضايي ماموریتونو لپاره یې مهم پړاو ثبت کړ.
د رویټرز د راپور له مخې، دغه توغندي پنځه کوچنۍ سپوږمکۍ او یوه تخنیکي ازمایښتي وسیله له ځان سره لېږدوله. دا د اروپا له وچې مدار ته د یوه خصوصي شرکت د سوداګریز توغندي لومړنۍ بریالۍ توغوونه بلل شوې ده.
د دې توغندي بریالیتوب د اروپا لپاره ځکه مهم بلل کېږي چې اروپايي هېوادونه هڅه کوي د سپوږمکیو د توغولو په برخه کې پر خپلو وړتیاوو تکیه زیاته او له امریکا خپله فضايي اتکا کمه کړي.
اېسر اېرو سپېس شرکت تر دې مخکې هم د «سپېکټرم» توغندي د توغولو هڅه کړې وه، خو د ۲۰۲۵ کال په مارچ کې هغه توغندی له توغولو لږ وروسته له ستونزې سره مخ او سمندر ته ولوېد.
