قزاقستان د ترکمنستان-افغانستان-پاکستان-هند د ګازو د نللیکې (ټاپي) په جوړولو کې ګډون ته لېوالتیا ښودلې.
اذرنیوز خبري اژانس د قزاقستان د لومړي وزیر له قوله ویلي چې له ترکمنستان سره مذاکرات روان دي څو د دې پروژې په برخه کې د قزاقستان ممکنه ونډه وارزول شي.
د TAPI ګاز نللیکه ټولټال ۱،۸۱۴ کیلومتره اوږده ده او د څلورو هېوادونو له خاورې تېرېږي: ترکمنستان – ۲۱۴ کیلومتره، افغانستان – ۷۷۴ کیلومتره، پاکستان – ۸۲۶ کیلومتره، چې بیا د هند تر پولو پورې رسېږي.
په ملګرو ملتونو کې د افغانستان پخواني استازي محمود صیقل د قطر او اندونیزیا ترمنځ د تحصیلي بورسونو د هوکړه لیک د لاسلیک په تړاو ویلي، چې دغه هوکړه لیک په داسې حال کې شوی چې ګواکي افغانستان په قطر پورې تړاو لري.
ښاغلي صیقل ویلي، چې قطر د افغانستان د اوسني وضعیت مسوول دی او همدوی افغانستان د ښځو په زندان او د ترهګرو په ځاله بدل کړی دی.
نوموړي زیاته کړې، چې قطر طالبان بیا ځلې واک ته ورسول او اوس د افغانستان په استازیتوب له اندونیزیا سره تحصیلي هوکړه لیک لاسلیکوي.
صیقل دغه راز ویلي چې په افغانستان پورې اړوند هر ډول هوکړه لیک کې باید د د دغه هېواد د مشروع حکومت د استازي لاسلیک هم وي.
د یادونې ده چې دوه ورځې وړاندې د قطر او د اندونیزیا ترمنځ دغه هوکړه لیک لاسلیک شوی، چې په اساس یې یو شمېر افغان محصلین به په اندونیزیا کې تحصیلي بورسیې ترلاسه کړي.
د افغانستان کرکټ بورډ غوراوي کمېتې، د بنګلهدېش پر وړاندې د درې یو ورځنیو لوبو لپاره د لوبغاړو نوملړ اعلان کړ.
کرکټ بورډ د دې لوبو لپاره د حشمتالله شهیدي په لوبډلمشرۍ ۱۹ لوبغاړي انتخاب کړي دي.
ټاکل شوې، چې یادې سیالۍ د روان کال د نومبر میاشتې په ۶مه نېټه د متحده عربي اماراتو په شارجه لوبغالي کې پیل شي.
د لوبغاړو نوملړ کې حشمت الله شهیدي، رحمت شاه، رحمن الله ګربز، اکرام عليخیل، عبدالمالک، ریاض حسن، درویش رسولي، صدیق اتل، عظمت الله عمرزی، محمدنبي، ګلبدین نائب، راشدخان، ننګیال خروټی، الله محمدغضنفر، نوراحمد لکڼوال، فضل الحق فاروقي، بلال سمیع، نوید ځدراڼ او فریداحمد ملک ټاکل شوي دي.
د هند لومړی وزیر نریندرا مودي وايي، په اوکراین کې جګړه باید په سولهییزه توګه پای ته ورسېږي.
د بریکس له سرمشریزې سره هممهاله نریندرا مودي د روسیې ولسمشر ولادیمیر پوتین ته ویلي چې، هند په اوکراین کې سوله غواړي.
نریندرا مودي دا څرګندونې داسې مهال کوي چې د روسیې په کازان کې د بریکس سازمان سرمشریزه پيل شوې ده.
د یادونې ده چې ولادیمیر پوتین به د دې غونډې په څنډه کې د ملګروملتونو له عمومي منشي انتونیو ګوتېریش سره وګوري.
د کابل په بازارونو کې افغانۍ په بې مخینې ډول لوړه شوې ده.
د کابل په بازارونو کې نن یوه افغانۍ له لس زره ایراني تومان سره تبادله کېږي.
نن سهار د افغانۍ ارزښت ۹۷۰ زرو تومان ته رسېده؛ خو درې بجې بیا د افغانیو قیمت لس زرو تومان ته پورته شو.
د یادونې ده، چې د نورو بهرنیو اسعارو پر وړاندې هم د افغانیو بیه لوړه شوې، چې نن یو ډالر په ۶۶.۷۲ افغانۍ تبادله کېږي.
پداسې حال کې چې نن د بریکس سازمان ناستې لومړۍ ورځ ده؛ خو د طالبانو حکومت لا هم تمه لري چې دغې ناستې ته به وبلل شي.
د طالبانو حکومت د صنعت او سوداګرۍ وزارت سرپرست نورالدین عزیزي ویلي، تمه لري چې په روانې او یاهم راتلونکي ناسته کې د ګډون بلنه ورکړل شي.
د یادونې ده چې د طالبانو حکومت تر دې وړاندې له روسیې څخه په یو لیک کې غوښتی وو چې په دغه ناسته کې د ګډون بلنه ورکړي.
له بادغيس څخه یو شمیر سرچینې وایي د طالبانو د اطلاعاتو او فرهنګ رٸيس مطيع الله متقي خبريالانو ته خبرداری ورکړی، چې له دې وروسته دې کورنيو او بهرنيو رسنيو ته انځور نه اخلي.
متقي خبریالانو ته ویلي، چې کورنیو او بهرنیو رسنیو لپاره انځور اخيستل جرم ګڼل کېږي.
په ورته وخت کې د لغمان او ننګرهار ولایتونو یو شمېر خبریالان وايي، د طالبانو د امر بالمعروف د سرپرست وزیر په غونډه کې خبریالانو ته د تصویر او فلم اخیستلو اجازه نه ده ورکړل شوې.
د ایران حکومت ویلي، هغه ډله یې نیولې، چې په دغه هېواد کې به یې افغان وګړي د پیسو لپاره برمته کول.
ایراني رسنیو د دغه هېواد د چارواکو له قوله ویلي، چې د دغې ډلې مشر د هرات ولایت اوسېدونکی دی او ډله یې د وحشي پړانګانو په نوم پېژندل کېدله.
د سرچینو د معلوماتو له مخې، نوموړی کس افغانستان کې د وژنو په تور بندي وو، خو د طالبانو له واک ته رسېدو وروسته له زندانه ازاد او ایران کې یې د جرمي کړنو شبکه فعاله کړې وه.
که څه هم ایراني حکومت د یادې ډلې په اړه نور معلومات نه دي ورکړي؛ خو ویلي یې دي، چې دوی څه موده وړاندې له تهران څخه د یو افغان سوداګر د تښتولو هڅه هم کړې وه.
اسراییلو د غزې تړانګې په شمال کې د بریدونو په دوام کې ګڼو فلسطینانو ته مرګژوبله اړولې ده.
په غزې تړانګه کې روغتیایي چارواکو اسوشېټېډپرېس خبري اژانس ته ویلي چې د غزې په شمال کې یې د اسراییلو د دوشنبې ورځې په هوایي او ځمکنیو حملو کې له ۱۲ زیاتو وژل شویو مړي راټول کړي دي.
په غزې تړانګې کې د عامې روغتیا وزارت عاجلې څانګې ویلي، چې په وژل شویو کې ۶ تنه هغه نارینه دي چې د دوشنبې ورځې په سر کې د جبالیا ښار د بې ځایه شویو کمپ ته د څښاک اوبو د تر لاسه کولو لپاره ورغلي وو.
د یادونې ده چې اسراییلو د دوشنبې په ورځ د لبنان په سویل کې د یوه برید له امله بخښنه وغوښته، خو د غزې تړانګې په شمال کې یې بیا خپلو بریدونو ته زور ورکړی دی.
د هرات طالب چارواکي وایي، چې په طبعیت کې ۳۰ بېلابېل وحشي مرغان یې خوشې کړي دي.
دوی ویلي، چې دغه مرغان د چاپېريال ساتنې د سرغړوونکو لهخوا د سپين ادې او د مرغانو پلورونکو له بازار څخه راټول شوي وو.
طالب چارواکو زیاته کړې، چې دوی په جدي توګه د وحشي ژوو د ښکار، انتقال، قاچاق، پېر او پلور مخه نیسي.
د یادونې ده چې افغانستان د خپلو وحشي مرغانو سربېره، د نایابه مرغانو د موسمي مهاجرت په مسیر کې هم دی چې هر کال د هند بحر څخه سایبریا ته او برعکس مهاجرت کوي.