د پاکستان د بهرنیو چارو وزارت ویاند طاهر اندرابي ویلي، په دغه هېواد کې د ناامنۍ له زیاتېدو وروسته د اسلام‌اباد صبر نامحدود نه دی او له کابل یې غوښتي چې د افغانستان له خاورې د پاکستان پر ضد د فعالیتونو مخه ونیسي.

اندرابي په یوه خبري ناسته کې ویلي، پاکستان له افغان لوري تمه لري چې خپله خاوره د هېڅ ډول وسله‌والو ډلو لپاره د پټنځای او یا هم د بریدونو د طرحې په توګه ونه کارول شي.

هغه زیاته کړې چې که دا وضعیت همداسې دوام ومومي، اسلام‌اباد به اړ شي مناسب ګامونه پورته کړي.

نوموړي د پاکستان د دفاع وزیر هغه څرګندونې هم تایید کړې چې که اړتیا وي، ښايي د افغانستان پر وړاندې اقدام وشي.

بل لور ته، د طالبانو حکومت هرکله ټینګار کړی چې د هېواد خاوره به د هېڅ هېواد پر ضد ونه کارول شي او پاکستان کې ستونزې یې ددغه هېواد داخلي مسئله بللې ده.

‏د امریکا د پنسلوانیا ایالت ډیموکراټ سناتور جان فترمن ویلي، د ایران اوسني واکمنان یوازې د زور او ځواک ژبې ته غبرګون ښيي او له هغوی سره پر خبرو باور نه شي کېدای.

نوموړي په یوې ټلویزیوني مرکې کې ویلي چې له پخوا راهیسې یې پوښتنه کوله څنګه کېدای شي ایران ته د اټومي وسلو د ترلاسه کولو اجازه ورکړل شي.

هغه زیاته کړې چې تهران په لوړه کچه بډایه شوي یورانیم لري او دا چاره جدي اندېښنه رامنځته کوي.

فترمن ټینګار کړی چې د ده په اند یوازې فشار او پوځي اقدام کولی شي د ایران پر چلند اغېز وکړي.

هغه ویلي که اړتیا وي، باید بیا هم پر ایران سخت ګامونه واخیستل شي.

نوموړي د خپلو خبرو په ترڅ کې دا هم ویلي چې له داسې نظام سره خبرې ګټه نه لري او باید په مستقیم او قوي اقدام ورسره چلند وشي.

د طالبانو حکومت مشر شیخ هبت‌الله اخوندزاده د تبلیغ طریقو، د مبلغانو د دعوت او اړوندو لارښوونو په اړه نوی قانون توشیح کړی دی.

د دغه قانون یوه نسخه، چې طلوع‌نیوز ترلاسه کړې، په دوو فصلونو او ۱۷ مادو کې ترتیب شوې ده.

د قانون له مخې به د تبلیغ کوونکو فعالیتونه د امر بالمعروف او نهی عن المنکر وزارت له لوري تنظیمېږي.

په دې قانون کې ویل شوي چې مبلغان باید د حنفي مذهب پیروان، بالغ او عاقل وي او پر هغه څه بشپړه پوهه او تسلط ولري چې خلک ورته رابولي.

قانون همداراز ټینګار کوي چې تبلیغي ډلې باید له خلکو سره ښه چلند وکړي او د تبلیغ پر مهال ښځې او نابالغ کسان (ماشومان) له ځان سره مل نه کړي.

د قانون له مخې د مبلغینو مهمې ځانګړنې عبارت دي له: مسلمان او د حنفي مذهب پیروي، بلوغ او عقل، اخلاص، مهرباني، صبر، او پر دیني موضوعاتو بشپړه پوهه.

په همدې حال کې د مبلغینو مکلفیتونو کې له خلکو سره ښه چلند او له ځان سره د ښځو او ماشومانو نه ملګرتیا شامل دي.

د تبلیغ د لارو چارو په برخه کې قانون وایي چې مبلغان کولی شي د وینا، ښو اخلاقو او نیکو کړنو له لارې، د «جهاد» د لارې او همدارنګه د ټولنیزو رسنیو لکه راډیو، مجلو، کتابونو او نورو هغو وسیلو له لارې چې د ذی‌روح موجوداتو انځورونه پکې نه وي، تبلیغ او دعوت ترسره کړي.

د افغانستان د کرېکټ ملي لوبډلې مشر روزونکي جانټن ټراټ له خپلې دندې استعفا وکړه او له افغان لوبډلې سره یې رسمي مخه ښه وکړه.

ټراټ چې د ۲۰۲۲ کال په جولای میاشت کې د افغانستان د کرېکټ بورډ له خوا د ملي لوبډلې د مشر روزونکي په توګه ټاکل شوی و، نږدې درې کاله یې له لوبډلې سره کار وکړ.

د نوموړي تر مشرۍ لاندې افغان لوبډلې د نړیوالو سیالیو په ډګر کې د پام وړ پرمختګ وکړ او تاریخي بریاوې یې خپلې کړې.

افغان لوبډلې د ۲۰۲۳ کال پنځوس اوریز نړیوال جام کې د لومړي ځل لپاره انګلستان او پاکستان ته ماتې ورکړه او د جدول شپږم مقام یې خپل کړ.

همدارنګه په ۲۰۲۴ کال شل اوریز نړیوال جام کې افغان لوبډله تر نیمه پایلوبې ورسېده چې دا د افغانستان لپاره بېساری پرمختګ و.

د ټراټ د روزنې پر مهال افغانستان د استرالیا او نیوزیلنډ په څېر سترو لوبډلو ته هم تاریخي ماتې ورکړه او د نړیوالو سیالیو په ډګر کې یې خپل ځواک ثابت کړ.

د افغانستان کرېکټ بورډ په یوه خبرپاڼه کې د ټراټ د خدمتونو ستاینه کړې او ویلي یې دي چې د هغه تر مشرۍ لاندې افغان لوبډلې سترې او تاریخي لاسته راوړنې ترلاسه کړې دي.

ټراټ د خپلې خدای پامانۍ پر مهال ویلي، افغان لوبغاړي ځیرک، زیارکښ او بااستعداده دي او اوس دا وړتیا لري چې د نړۍ له سترو لوبډلو سره سیالي وکړي او بریاوې خپلې کړي.

د وال استریت ژورنال راپور ورکړی چې ډونالډ ټرمپ د ایران پر وړاندې د یو محدود لومړني برید د ترسره کولو امکان ارزوي، څو تهران دې ته وهڅوي چې د اټومي تړون منلو ته غاړه کېږدي.

د دې ورځپاڼې په وینا، د امریکا احتمالي پیلنی برید به د ایران څو پوځي یا دولتي مرکزونه په نښه کړي.

وال‌استریت ژورنال زیاته کړې چې که چیرې د ایران حکومت د ټرمپ د هغې غوښتنې عملي کولو څخه ډډه وکړي چې له مخې یې باید د یورانیمو بډاینه پای ته ورسوي؛ نو امریکا به د حکومت د تاسیساتو پر ضد پراخ پوځي کمپاین پیل کړي.

‏د ملګرو ملتونو د وګړو صندوق ویلي چې د افغانستان د وجهي صندوق په ملاتړ یې د هېواد په بېلابېلو سیمو کې ۱۴۷ زره او ۵۴۵ کسانو ته روغتیايي خدمات برابر کړي دي.

د راپور له مخې، په دغو خدماتو کې امېندوارې مېرمنې، نوي زېږېدلي ماشومان، کوچنیان او زلمیان شامل دي، چې موخه یې د کورنیو د روغتیا پیاوړتیا ده.

دا مرستې په ځانګړي ډول په لرې پرتو سیمو کې ښځو او ماشومانو ته رسول شوې دي.

ملګرو ملتونو زیاته کړې چې یاد روغتیايي مرکزونه کورنیو بې‌ځایه شویو، بېرته راستنېدونکو او کوربه ټولنو ته بنسټیز خدمات وړاندې کوي.

میټا اعلان کړی چې د ۲۰۲۶ کال د اپرېل په میاشت کې به د مېسنجر ځانګړې وېبپاڼه په بشپړ ډول وتړي.

له دې وروسته به کاروونکي ونه شي کولی په جلا توګه دې پاڼې ته لاسرسی ولري او په اوتومات ډول به د فېسبوک اصلي پاڼې ته ولېږدول شي.

شرکت ویلي چې ټولې پخوانۍ خبرې اترې او پیغامونه به خوندي پاتې شي او کاروونکي کولی شي د فېسبوک له اصلي پاڼې یا د موبایل له اپلېکېشن څخه خپل پیغامونه وګوري.

میټا تر دې مخکې د ۲۰۲۵ کال په ډسمبر کې د وینډوز او مک لپاره د مېسنجر جلا اپلېکېشنونه هم بند کړي وو.

د شرکت په وینا، دا پرېکړه د خدماتو د یوځای کولو او د سرچینو د ښه کارونې لپاره شوې ده.

د سوریې دولتي اژانس (سانا) د راپور له مخې، د سوریې د لنډمهالي حکومت مشر احمد شرع د یو فرمان له لارې د بندیانو یوې ځانګړې کټګورۍ ته د بښنې اعلان کړی دی.

دا پرېکړه د سیاسي بدلون له پړاو وروسته لومړنۍ رسمي عفوه بلل کېږي، چې د بشار اسد د واکمنۍ تر پای ته رسېدو وروسته صادره شوې ده.

د راپور له مخې، هغه زندانیان چې د سختو او لاعلاجه ناروغیو سره مخ دي او یا یې عمر له اویا کلونو پورته دی، د دې بښنې له امتیازه برخمنېږي.

خو د عامو وګړو پر ضد د جدي جرمونو مرتکبین، او هغه کسان چې د شکنجې او تاوتریخوالي په تور محکوم شوي، له دې بښنې څخه بهر ساتل شوي دي.

دا په داسې حال کې ده، چې سوریه کې د موقت حکومت له جوړېدو راهیسې لسګونه کسان د پخواني نظام سره د تړاو او د خلکو پر وړاندې د سرغړونو په تور نیول شوي او بندیان شوي دي.

د هوايي چلند د څار نړیوالې ادارې Flightradar24 اعلان کړی چې د ایران پر فضا د هوايي خبرتیا (NOTAM) رسمي اعلامیه نافذه شوې او پیلوټانو ته سپارښتنه شوې چې د ځمکې له سطحې څخه تر FL100 (نږدې ۱۰ زره فټه) لوړوالي پورې له ټاکل شوې سیمې څخه ډډه وکړي، ځکه چې د توغندیو د توغولو احتمال شته.

یادې ادارې په خپل رسمي بیان کې ویلي، د دې خبرتیا له مخې ښايي په مشخصو مختصاتو کې راکټي ازموینې یا توغونې ترسره شي، چې له امله یې ټیټ ارتفاعي هوايي تګ راتګ له جدي خطر سره مخ کېدای شي.

د NOTAM (Notice to Air Missions) هغه رسمي خبرتیا ده چې د ملکي هوايي چلند ادارې یې خپروي او پکې د هوايي تګ راتګ لپاره د لنډمهاله خطرونو، محدودیتونو او یا هم د ځانګړو فعالیتونو په اړه معلومات ورکول کېږي.

تېره ورځ د خیبرپښتونخوا ایالت په باجوړ ولسوالۍ کې د موټر بم برید او نښتې له کبله لږ تر لږه ۱۱ پاکستاني سرتېري او د ټي‌ټي‌پي ۱۲ وسله‌وال وژل شوي وه؛ چې ددې پېښې په غبرګون کې، د پاکستان د بهرنیو چارو وزارت په اسلام‌اباد کې د طالبانو حکومت د سفارت مرستیال احضار کړی او خپل سخت اعتراض یې وړاندې کړی.

پاکستان ویلي، دا ډول بریدونه د سیمې امنیت ته جدي ګواښ دی.

د پاکستان دفاع وزیر خواجه آصف خبرداری ورکړی چې که اړتیا وي، پر افغانستان هوایي بریدونه هم ترسره کېدای شي.

د وزارت ویاند طاهر اندرابي ویلي، ټي‌ټي‌پي د افغانستان خاورې څخه خوندي فعالیت کوي؛ خو د فعالیتونو د محدودولو لپاره هیڅ عملي اقدام نه دی شوی.