اسرائیلي ځواکونو د غزې په بېلابېلو برخو کې ۳۴ فلسطینیان وژلي دي.
د غزې روغتیایي چارواکي وایي، چې په وژل شویو کسانو کې یو یې فلسطیني خبریال دی.
بل لورته حماس اعلان کړی، چې د خبریال محمد عابد ربو په وژل کېدو سره غزه کې د وژل شویو خبریالانو شمېر ۱۷۲ ته ورسېد.
دا په داسې حال کې ده چې تر دې وړاندې یو شمېر رسنیو له اروپایي ټولنې غوښتي وو چې اسرائیل خبریالان وژني او باید مرستې ورسره بندې شي.
یو شمېر سرچینو ویلي، چې د طالبانو حکومت په یو شمېر ولایتونو کې د جک (JACK) مؤسسې د روغتيايي خدمتونو برخې فعاليتونه بند کړي دي.
یو شمېر مکتوبونه چې د طالبانو حکومت لخوا نشر شوي، پکې ویل شوي، چې دغه موسسه بايد نور روغتيايي خدمتونه بند کړي.
ویل کېږي، چې له تېرو دوو ورځو راهيسې اوو ولايتونو کې د دغې مؤسسې په کار تر امر ثاني بنديز لګېدلی.
د جک موسسې تر اوسه په دې اړه څه نه دي ویلي.
ناروې کې د افغانستان پخوانۍ سفیره شکریه بارکزۍ وایي، چې احمدشاه مسعود ملي اتل نه دی.
شکریه بازکزۍ په یوې مرکه کې ویلي، چې ملاعمر هم د یوې ډلې لپاره اتل دی، احمد شاه مسعود هم د یو شمېر خلکو لپاره اتل دی؛ خو د دې لپاره دواړه یو ډول دي.
د اغلې بارکزۍ په خبره، دا غازي امان الله خان خپل اتل بولي.
هغې ویلي:”حکومت چې وپرځید د مقاومت جبهه ایجاد شوه، دا چې ولې ایجاد شوه د همدې جبهې او تړليو خلکو یې په جمهوریت کې د یو او بل سره د قدرت په تقسیماتو وران شوه او بیا طالبان واک ته ورسېدل.”
نوموړې زیاته کړې، که دوی د قدرت په ګدۍ د یو او بله سره سر نه وای وهلی، حکومت به روغ جوړ و او ټوله ګډ وډي او د حکومت کمزوري د اوسنۍ مقاومت جبهې د واکدارانو له لاسه رامنځته شوې وه.
راپورونه وایي، چې د پاکستاني پوځ درې کارکوونکي چې درې واړه ورونه هم دي، د نامعلومه وسله والو له لوري تښتول شوي.
ویل کېږي، چې دغه درې ورونه چې کرنل خالد امیر، اصف امیر او فهد امیر نومېږي، د دیره اسماعیل خان له کلاچې سیمې څخه تښتول شوي دي.
د سرچینو په وینا، دغه درې وروڼه ډیره اسماعیل خان ته د خپل پلار د جنازې لپاره راغلي وو، چې هغه څو ورځې وړاندې وفات شوی و.
راپورونو زیاته کړې، چې دغه درې وروڼو حکومتي دندې ترسره کولې چې کرنل خالد امیر په پوځ کې دنده ترسره کوله، اصف امیر د کینټونمنټ بورډ سره کار کاوه، او فهد امیر په نادرا کې کار کاوه.
تر اوسه ددغې پېښې مسولیت کوم چا په غاړه نه دی اخیستی.
پاکستان کې د برېښنا د بیو د زیاتېدو او پر دوکانونو د نویو مالیاتو د وضع کېدو له امله سوداګرو او دکاندارانو لاریون کړی.
ویل کېږي چې په ټول پاکستان کې نن عامه بازارونه بند دي او یوازې درملتونونه او د لومړنیو خوراکي موادو د پلور دکانونه پرانېستي.
دوی وایي، د پاکستان حکومت په بې ساري ډول د برېښنا بیې لوړې کړې دی.
دا په داسې حال کې ده چې څه موده وړاندې پاکستان له نړۍوال بانک او سعودي عربستان څخه هم د پور غوښتنه کړې وه.
د افغانستان کرکټ ملي لوبډله د نیوزیلېنډ پر وړاندې د یوازینۍ ټېسټ لوبې لپاره په تمریناتي کمپ کې د ګډون په موخه هند ته ولاړ.
د افغانستان له کرکټ بورډ څخه په خپره شوې خبرپاڼه کې راغلي چې په دې سفر کې د ملي لوبډلې ۲۰ لوبغاړي شامل دي.
که څه هم په دغه نوملړ کې د یما عرب، ریاض حسن او شمس الرحمن په ګډون یو شمېر ځوانو لوبغاړو ته ځای ورکړل شوی؛ خو بیا هم د افسر ځاځي په شمول په ځینو لوبغاړو نیوکې موجودې دي.
د یادونې ده چې دا سیالۍ د راتلونکې سېپټمبر میاشت پر ۹مه په ګرېټر نویډا لوبغالي کې پیل او په ۱۳مه نېټه به پای ته ورسېږي.
ایرانۍ رسنۍ وایي، د تهران د تېلو او برېښنا د پلور پیسې د امریکا له خوا په پاکستان کنګل شوې دي.
د ایران عرش خبري اژانس د زاهدان سوداګرۍ خونې د پلاوي غړي، امانالله کهرازهي له خولې لیکلي چې پر پاکستان د امریکا د زیات نفوذ له کبله د تهران او اسلام اباد سوداګریزې اړیکې زیانمنې شوې دي.
هغه ویلي، امریکا د پاکستان د پوځ لګښتونه ورکوي او اسلام اباد د واشنګټن له تاثیر ځان نشي خلاصولی.
بل لورته پاکستان تر اوسه په دې اړه څه نه دي ویلي.
په اروپايي هیوادونو کې د افغانستان سفارتونو یو شمیر سرچینو منلې، چې ځینو اروپایي هېوادونو له دوی د سفارت د تړلو او یا هم د طالبانو حکومت ته د سپارولو غوښتنه کړې.
تر دې وړاندې د طالبانو حکومت له ټولو هېوادونو غوښتي وو چې د دوی سفیران ومني او د جمهوریت د سفیرانو کاري موده یې پای ته رسولې وه.
تر دې مهاله متحده عربي امارات، چین او پاکستان د طالب سفیرانو باور لیکونه منلي دي.
د طالبانو حکومت د دفاع وزارت لوی درستیز فصیح الدین فطرت ویلي، داعش ډله افغانستان کې هیڅ حضور نه لري.
هغه ویلي، دا ډله یې سخته ځپلې او په تمامه معنی له منځه وړل شوې ده.
نوموړی دا څرګندونې داسې مهال کوي چې ډېری هېوادونه په افغانستان کې د داعش په اړه اندېښمن دي.
تر دې وړاندې بیا د طالبانو حکومت ویاند ذبیح الله مجاهد ویلي وو چې ښایي یو یا دوه سلنه داعش افغانستان کې شتون ولري.
د بلوڅ ازادي غوښتونکو له لوري د هیروف عملیات د ۱۳۰ پاکستاني پوځیانو په وژلو سره پای ته رسېدلي دي.
د بلوچستان رسنیو خبر ورکړی چې په دغو عملیاتو کې د مجېد برېګېډ ډلې ۹ کسانو ځانمرګي بریدونه هم کړي وو.
دا عملیات چې شل ساعته یې دوام وکړ، په تېرو څو کالو کې بې ساري عملیات بلل کېدل.
دا عملیات د پاکستاني پوځیانو په نظامي قرارګاوو ترسره شوي وو.