بلوچستان کې د جګړو له شدت سره سم؛ د یاد ایالت د اطلاعاتو پخواني لنډمهالي وزیر جان اچکزي ویلي، د خپلواک بلوچستان په اړه بلوڅو ته دروغ ویل شوي.

نوموړي ویلي، دوی ته ویل کېږي چې بلوچستان خپلواک وو او دوی په زوره له پاکستان سره یو ځای کړل شوي دي.

د اڅکزي په خبره، بلوچستان د ټولو استازو په خوښه له پاکستان سره یوځای شوی.

دا په داسې حال کې ده چې له نږدې شپږو لسیزو راپه دې‌خوا بلوڅ د خپلې خاورې د ازادۍ لپاره جګړه کوي.

د یادونې ده چې څو ورځې وړاندې د بلوڅو د سختو جګړو له امله پاکستاني پوځ ته درنه مرګ ژوبله واوښته.

د امریکا د استازو مجلس د بهرنیو اړیکو د کمیټې مشر مایکل مک‌کال اعلان وکړ چې هغه به د سپټمبر په لسمه د احمد مسعود په ګډون د افغانستان د ملي مقاومت جبهې له استازو سره وګوري.

مک کال وايي، دی په ډېره لېوالتیا د احمد مسعود د هڅو په اړه اورېدلو ته په تمه دی چې د طالبانو له منګولو د خپلو خلکو د خلاصون لپاره هڅې کوي.

مک‌کال د جمعې په ورځ پر خپله ایکس‌پاڼه لیکلي، چې دی او د ده ټیم له کلونو راهیسې له ښاغلي مسعود او ملي مقاومت جبهې سره په دوامداره توګه تماس لري.

مک‌کال ټینګار کړی چې د طالبانو تروریستي رژیم په افغانستان کې د بشري حقونو په برخه کې هر ډول پرمختګ له منځه وړی دی.

د امریکا د استازو جرګې د بهرنیو اړیکو د کمېټې مشر دغه څرګندونې د امریکا د پخواني پوځي شان راین د هغې غوښتنې په ځواب کې وکړې، چې د امریکا کانګرس ته د احمد مسعود د بلنې لپاره یې کړې وه.

دغه امریکايي چارواکي په وار وار په افغانستان کې د طالبانو حکومت پر فعالیت نیوکې کړې وې.

د هېواد پخواني ولسمشر حامد کرزي د ذکیه خدادي په بریا خوښي ښودلې او ویلي یې دي چې ټولو افغانو ښځینه لوبغاړو ته بریالیتوب غواړي.

د کرزي په خبره ذکیې په په کډوالۍ کې د خپل هېواد لپاره د ویاړ راوړلو په موخه سخت زیار اېستلی دی.

د یادونې ده چې ذکیه خدادي خپلې کیوبايي سیالې ته ماتې ورکړه او د لومړي ځل لپاره یې د برنزو مډال خپل کړ.

د طالبانو حکومت وایي، غواړي پر هوایي حریم د کنټرول او هوایي دفاعي تجهیزات له روسیې وپیري.

د طالبانو د دفاع وزارت لوجیستیک برخې رئیس عبدالبصیر صابري ټاس خبري اژانس ته ویلي چې دوی د دفاع په برخه کې په کافي اندازه ځمکني توکي لري.

نوموړي د مسکو او کابل ترمنځ همکاري ستایلې او ویلي یې دي چې روسیه او افغانستان باید د یو بل ملاتړ وکړي.

هغه دغه راز ویلي، افغانستان کې هیڅ امریکایي سرتېری نشته او له امریکا راپاتې وسلې د هېواد د امنیت ټینګښت لپاره کاروي.

د طالبانو حکومت د پوهنې وزارت چارواکو د نوي قانون په اړه د یوناما اندېښنې بې‌ځایه وبللې.

دوی یوناما خپله دوښمنه بللې.

د پوهنې.وزارت چارواکو د نوي قانون په اړه تبلیغات د دوښمن کار بللی.

یاد وزارت ویلي چې نوی قانون د اسلامي شریعت په رڼا کې جوړ شوی.

د یادونې ده چې د طالبانو حکومت د امربالمعروف نوی قانون له ګڼ شمېر غبرګونونو سره مخ شوی دی.

د طالبانو حکومت د یو مکتوب په صادرولو سره په کندهار کې له مالدرانو او کروندګرو غوښتي چې زکات او عشر دوی ته ورکړي.

دغه مکتوب چې ټولنیزو رسنیو کې لاس په لاس کېږي، په کې راغلي، چې هیڅوک نشي کولای ذکات او عشر له مسوولینو پرته بل چاته ورکړي.

مکتوب کې راغلي، عشر او ذکات باید د رسمي پارچې ترلاسه کولو پر اساس ورکړل شي، ترڅو یې بیا مسوولین خپلو اړمنو ته ورسوي.

پخواني ولسمشر حامد کرزي ویلي، ترکیه او افغانستان یو له بل سره تاریخي اړیکې لري.

هغه د ترکیې سفارت له مېلمستیا د مننې ترڅنګ ویلي، ترکیې له افغانستان سره ګڼې مرستې کړي او دغه راز یې افغان ځوانانو ته تحصیلي زمینې برابرې کړې، چې د مننې وړ دي.

بل لورته د ترکیې سفارت هم په دې اړه خوښي ښودلې.

له طالبانو د عمران خان ملاتړ د اکسفورډ پوهنتون ریاست ته د هغه د نامزادۍ په اړه اندېښنې راپورته کړې دي.

عمران خان ځان د اکسفورډ پوهنتون ریاست ته نوماند کړی و؛ خو جیو نیوز د باوري سرچینو په حواله ویلي، چې دغه ریاست د عمران خان په اړه داسې ایمیلونه تر لاسه کړي چې عمران خان د طالبانو ملاتړ کوو.

اکسفورډ ته رسېدلي معلومات ښیي چې عمران خان افراطي فکر لري او پاکستان کې یې د طالبانو د دفتر د ورکړې اجازه اخیستله.

پیغامونو کې له اکسفورډ پوهنتون غوښتل شوي چې د عمران خان اسناد دقیق ډول وڅېړي.

د تحریک طالبان پاکستان ډلې ادعا کړې چې د وزیرستان مشهوره سیمه میرعلي بازار د دوی په لاس کې دی.

یادې ډلې ویلي، تېره شپه یې هم د پاکستاني پوځیانو دوه غټې او پنځه وړې پوستې نیولې دي.

د یادې ډلې په خبره، له دغو پوستو څخه د پاکستان پوځیان تښتېدلي.

د پاکستان حکومت تر اوسه په دې اړه څه نه دي ویلي.