په شمالي وزیرستان کې د اتمانزیو جرګې په خپله سیمه کې د ټولو دولتي ادارو د کار بندېدو اعلان کړی.
دغې جرګې د اعتراض په ډول د بنو او غلام خان لاره تړلې او ویلي یې دي، چې حکومت ورسره د امنیت ټینګولو ژمنه کړې وه؛ خو پاتې په کې راغلی.
د دغې جرګې ویاند مولانا بیت الله ویلي، چارواکي باید ټول دفترونه وتړي او کارکوونکي باید کار ته ولاړ نشي.
بل لورته دولتي مسوولینو دا یو ترورستي عمل بللی او پولیسو ته یې یو مکتوب کې لیکلي، چې په سیمه کې د دولتي ادارو امنیت خوندي کړي.
د امریکا ولسمشر جو بایډن وایي، چې پر اسرائیل د ایران د برید په اړه جدي بحث روان دی.
بایډن ویلي چې دوی په دې اړه بحث کوي چې اسرائیل ایران ته څه ډول د توغندیو ځواب ووایي.
نوموړي زیاته کړې چې دا به هم ولیدل شي چې دغه برید د ایران لپاره څه نتیجې لري.
بایډن دغه راز ویلي چې په دې اړه به د اسرائیل له صدراعظم بنیامین نتنیاهو سره هم خبرې وکړي او وې ویل چې امریکا د اسرائیل کلک ملاتړی دی.
دا په داسې حال کې ده چې تېره ورځ ایران پر اسرائیل سلګونه توغندي ور وتوغول؛ خو د مرګ ژوبلې په اړه یې څه نه دي ویل شوي.
د اسرائیلو لومړي وزیر بنیامین نتنیاهو ویلي، چې ایران د دوی پر خاورې برید سره لویه تېروتنه وکړه.
د بهرنیو رسنیو د راپورونو پر اساس، نتنیاهو ویلي، چې ایران به د دغه برید دروند پور پرې کړي.
بل لورته د کاناډا لومړي وزیر ویلي، چې ایران په برید سره عام خلک په نښه کړي دي.
په همدې حال کې ایران هم ګواښ کړی، چې که اسرائیل برید وکړي؛ نو دوی به هم توند غبرګون وښيي.
د کاناډا د بهرنیو چارو وزیره وایي، چې نړۍواله ټولنه باید له طالبانو سره حساب کتاب وکړي.
میلاني جولي د ملګروملتونو عمومي اسامبلې ته په وینا کې ویلي، چې طالبان پر ښځو او نجونو سیسټماټیک ظلم کوي او باید حساب کتاب ورسره وشي.
جولي ویلي، چې طالبان د ښځو او نجونو پر وړاندې د غیر انساني قوانینو پلي کولو ته دوام ورکوي او ځوانې نجونې د تعلیم له اساسي حق څخه محروموي.
نوموړې د پوښتنې په شکل ویلي، چې انساني کرامت ته دا څرنګه درناوی دی؟ دا څنګه د خپلو خلکو غوره ګټې خوندي کوي؟
د یادونې ده چې د نړۍ ۲۲ هېوادونو چمتوالی نېولی چې د ښځو پر وړاندې د هر ډول تبعیض د له منځه وړلو له کنوانسیون څخه د سرغړونې له امله د عدالت نړۍوالې محکمې ته د طالبانو پرضد عریضه وکړي.
دغو ۲۲ هېوادونو خبرداری ورکړی، چې که طالبان په شپږو میاشتو کې د بشري حقونو په ځانګړې توګه د ښځو له حقونو د سرغړونې مخه ونه نیسي، د هاګ محکمې ته به یې بوځي.
د امریکا ولسمشریزو ټاکنو ته نوماندې کاملا هرېس ویلي، ایران په منځني ختیځ کې یوه خطرناکه او بې ثباته کوونکی ځواب دی او دوی د اسرائیل ملاتړ ته ژمن دي.
هغې ویلي، ډاډه دي چې اسرائیل د ایران او د دوی له ملاتړه د برخمنو نیابتي ډلو پر وړاندې د جګړې بشپړ توان لري.
دا په داسې حال کې ده چې ایران تېره شپه پر اسرائیلو تر سلو ډېر توغندي ور توغولي دي.
امریکا ویلي وو چې پر اسرائیل د ایران مستقیم برید به ناوړه پایلې ولري.
منظور پښتین وایي، د پښتنو مشرانو او د خلکو په همت یې پاکستاني پولیس په شا تمبولي او میدان یې خپل واک کې اخیستی.
نوموړي ویلي، پولیسو په ډېرې بې شرمۍ د دوی خیمو ته اور ورکړی، ملګري یې وهلي او د یو شمېر غړو بیکونه یې غلا کړي دي.
منظور زیاته کړې، په هر قیمت چې کېږي، دا جرګه به ترسره کوي او یو وار بیا یې په خلکو غږ کړی، چې په پوره جوش سره راټول شي.
هغه ویلي، دوی تل د خلکو لپاره امن غوښتی؛ خو پاکستاني پولیسو تل د دوی مخ کې خنډونه جوړ کړي.
پاکستاني پولیسو خیبر کې د قامي لویې جرګې لپاره لګول شویو خیمو ته اور ورته کړی.
د پښتون ژغورنې غورځنګ غړو ویلي، د پاکستاني پوځیانو او پولیسو د موټریز کاروان شمېر تر سلو اوښت، چې لګول شوې خیمې یې ړنګې کړې، سیار تشنابونه یې له منځه یوړل او د اودسونو لپاره لګول شوې ټانکۍ یې سورۍ کړې.
د دوی د معلوماتو له مخې، د پولیسو په ډزو کې د پي ټي ایم یو شمېر غړي ټپیان شوي هم دي.
بل لورته منظور پښتین له خلکو غوښتي چې د قامي جرګې میدان ته راټول او د پولیسو مخه ونیسي.
د اسرائیل پوځ ویلي، چې موږ د ایراني توغوندیو هیڅ ګواښ او خطر نه وینو.
یاد پوځ په یوه اعلامیه کې خپلو خلکو ته ویلي، چې تاسو اوس کولای شئ چې خپل کورونه او پناه ځایونه پرېږدئ، تر هغې چې موږ ته امر کېږي.
یاد پوځ زیاته کړې، چې په دې وخت کې موږ د دې برید په ارزیابۍ اخته یو.
اسرائیلي پوځ د مرګ ژوبلې په اړه څه نه دي ویلي.
د ایران تسنیم خبري اژانس راپور ورکړی، چې ایران څه د پاسه څلور سوه توغوندي پر اسرائیلو توغولي.
یاد اژانس ویلي، چې دغه توغوندي خپل هدف ته رسېدلي.
ددغه برید د مرګ ژوبلې په اړه څه نه دي ویل شوي.
د دغه برید په اړه اسرائیلو رسمي څه نه دي ویلي.
بل لورته یو شمېر راپورونه وایي، چې د اسرائیل صدراعظم بنیامین نتنیاهو څو شیبو کې ایران سره د رسمي جنګ د اعلان خبر ورکوي.
اسرائیل وایي، په تېرو څو ساعتونو کې یې پر لبنان ۳۰ توغندي ور توغولي.
د اسرائیلي رسنیو د راپورونو پر اساس، په دغو توغندیو کې ۱۵ یې پر جلیل علیا او پنځلس نور یې پر لویدیځ جلیل ورتوغول شوي، چې یو شمېر سیمو کې یې اورلګېدنه هم رامنځته کړې.
سرچینې د اوښتو تلفاتو په اړه څه نه دي ویلي.
اسرائیلو دغه راز ادعا کړې چې په لبنان کې یې څو هغه ودانۍ هم له منځه وړې، چې له وسلو ډکې وې.