د افغانستان د وروستي جمهوریت لومړي مرستیال امرالله صالح نیویارک ټایمز سره د طالبانو د کورنیو چارو د وزیر سراج الدین حقاني مرکې ته په اشارې سره وایي د طالبانو یوه ډله هڅه کوي د سیمې او لودیځو هیوادونو په مرسته په شیخ هبت الله احتمالي کودتا وکړي.

ښاغلي صالح په خپل ایکس پاڼې لیکلي د برېکس سازمان ته د طالبانو نه ور بلل ددوي انزوا او ناهیلي په ګوته کړې.

نوموړي لیکلي په داسې حال کې چې نیویارک ټایمز د یوشمیر طالب چارواکو سپینولو ته کار ویلی، چې د احتمالي کودتا لپاره هڅه کوي بهرنۍ ملاتړ ترلاسه کړي.

د وروستي جمهوریت دغه دوهمه درجه چارواکي لیکلي: « د نیویارک ټایمز مقاله له CIA سره د حقاني شبکې د اوږدمهاله همکارۍ دوام دی او له دې لارې دوی غواړي ځانونه متفاوت او کودتا ته لېوال وښيي. »

د ایران د اسلامي شورا رئیس محمدباقر قالیباف له امریکا څخه غوښتي، چې اسراییل کنټرول او یو دوامدار اوربند ته مجبور کړي.

نوموړي ویلي، چې ایران به د اسراییل وروستي برید ته “حتمي ځواب” ورکړي.

په ورته وخت کې د ایران د بهرنیو چارو وزیر عباس عراقچي ویلي، چې امریکا پر ایران د برید لپاره اسراییل ته یو فضایي دهلیز برابر کړی دی.

ده زیاته کړه، پر ایران د اسراییل په عملیاتو کې د امریکا د ګډون شواهد ایران ته روښانه دي.

عباس عراقچي دغه راز ویلي، چې ایران د ملګرو ملتونو سرمنشي ته لیک استولی او د امنیت شورا د بېړنۍ غونډې غوښتنه یې کړې ده.

فلیپین کې د ټرامي په نوم د توپان له کبله تر اوسه ۱۳۰ کسان مړه او تري تم شوي دي.

د یاد هېواد د طبعي پېښو پر وړاندې د مبارزې ادارې ویلي، دا توپان د تېرې جمعې په ورځ د هېواد په لویدیځ کې پیل شوی دی.

د سرچینو د معلوماتو له مخې، د دغه توپان له کبله د اوښتو تلفاتو شمېر لاهم وروستی نه دی او ښايي تر دې نور هم زیات شي.

وال سټریټ ژورنال د یوه اسراییلي چارواکي له قوله ویلي، چې پر ایران د اسراییل له برید مخکې ایران څلور ایس-۳۰۰ د توغندیو دفاعي سیسټم درلود چې تر ټولو پرمختللی هوايي دفاعي سیسټم ګڼل کېږي؛ خو دغه ټول د اسراییل په برید کې ویجاړ او له منځه تللي.

ایران تر اوسه په دې اړه څه نه دي ویلي؛ خو ګواښ کوي چې د هر شوي برید ځواب به ورکوي.

د یادونې ده چې اسراییلو تېره شپه ناوخته د ایران بېلابېل نظامي ځایونه او تاسیسات په نښه کړل.

ایران ویلي، چې د دې هوايي حملو په نتیجه کې څلور ایراني سرتېری وژل شوي دي.

د طالبانو د امربالمعروف وزیر خالد حنفي ویلي، تر دې وروسته بالغې ښځې نه شي کولای چې په لوړ اواز تلاوت او ترانې ووايي.

هغه ویلي، د بالغو ښځو غږ عورت دی او دوی نور نشي کولای چې دا چاره ترسره کړي.

نوموړي دغه راز زیاته کړې، چې دوی به د امرباالمعروف قانون به په تدریجي ډول پلی کړي.

دا په داسې حال کې ده، چې د طالبانو حکومت په نوي قانون کې د ذیروح شیانو پر تصویر اخیستلو هم بندیز لګولی دی.

د امریکا ولسمشر جوبایډن هیله څرګنده کړې، چې د اسراییل له‌خوا پر ایران وروستۍ هوايي حملې به په منځني ختیځ کې د روان کړکېچ دې څپرکې ته د پای ټکی کېږدي.

بایډن ویلي، چې اسراییلو له پوځي مرکزونو پرته په ایران کې نور اهداف نه دي په نښه کړي او هیله یې څرګنده کړې چې دا به د روان کړکېچ پای وي.

د یادونې ده چې اسراییلو تېره شپه ناوخته د ایران بېلابېل نظامي ځایونه او تاسیسات په نښه کړل.

بل لورته ایران ویلي، چې د دې هوايي حملو په نتیجه کې څلور ایراني سرتېری وژل شوي دي.

پنځه پاکستاني پوځیان په شمالي وزیرستان کې د یو برید پر مهال وژل شوي دي.

د راپورونو له مخې، تېره ورځ شمالي وزیرستان کې پر یوه پوسته برید شوی، چې له کبله یې پنځه تنه پولیس وژل شوي او پنځه نور ټپیان دي.

د معلوماتو له مخې، پېښه په میرعلي سیمه کې شوې، چې د یو شمېر ټپیانو وضعیت هم نازک ښودل شوی.

لاهم د یادې پېښې مسوولیت چا نه دی منلی.

ورورسته له هغه چې په ټولنیزو رسنیو کې د ټلویزیون د مشرانو سره د شیخ هبت الله اخوندزاده د لیدنې او د نوموړي له لورې د ټلویزیوني نشراتو د بندیدو خبرونه خپاره شول، حماسه میډیا په جنوب او جنوب لویدیځ کې د یوشمیر رسنیو له خاوندانو سره خبرې وکړې.

د یوه راډیو ټلویزیون یوه مسول چې نه یې غوښتل نوم یې واخیستل شي حماسه میډیا ته وویل چې دوی کندهار ته غوښتل شوي وو؛ خو د طالبانو مشر شیخ هبت الله ورسره ونه لیدل.

هغه وویل:” موږ کندهار ته وغوښتل شو؛ خو کله چې هلته ورسېدو، طالب چارواکو زموږ لېدنه بیرته لغوه کړه او راته یې وویل چې شیخ هبت الله اخندزاده اوس وخت نه لري.“

نوموړي زیاته کړه چې په ټولنیزو رسنیو کې خپاره شوي معلومات ناسم دي او د ملا هبت الله سره د دوی د لېدنې اوازې سمې نه دي.

جیش العدل ډلې په سیستان کې پر ایراني پوځیانو د برید پړه پر غاړه واخیسته.

په دغه برید کې د ایران په تفتان ښار کې لږ تر لږه ۱۰ تنه ایراني پوځیان ووژل شول.

د ایران ایرنا خبري اژانس د سیستان او بلوچستان د پولیسو د اطلاعاتي مرکز په حواله خبر ورکړی چې وسله والو کسانو د تفتان ښار په ګوهرکوه کې د پولیسو له ګزمې سره نښته وکړه.

د حال وش ویب پاڼې چې د سیستان او بلوچستان خبرونه خپروي خبر ورکوي چې د ګوهرکوه په سیمه کې د وسله والو له خوا دوه پوځي موټرونه په نښه شوي او په موټرو کې سپاره لس پوله ساتي کسان مړه او نور ژوبل شوي دي.

د طالبانو د بهرنیو چارو وزارت سیاسي مرستیال عباس ستانکزي د ستراتیژیکو مطالعاتو په انستیتوت کې ویلي، چې د طالبانو د نظام دوام په ټولنه کې د عدالت په تامین پورې اړه لري.

عباس ستانکزي ویلي، په کومه ټولنه کې چې عدالت تامين نه وي او فساد او ګډوډي پکې وي، خلک پر داسې نظام باور نه کوي او له هېواده تښتي.

نوموړي زیاته کړې، په کومه ټولنه کې چې عدالت نه وي پلی شوی او خلکو ته د انسان او مسلمان په شان مساوي حقوق نه وي ورکړل شوي، خلک نظام خپل نه ګڼي.

ښاغلي ستانکزي دا هم ویلي، چې افغانانو تل د جګړې په ډګر کې بریاوې ترلاسه کړي، خو په سیاست کې ناکام شوي دي.

هغه دغه راز ویلي، که دوی خپل مسوولیتونه په سمه توګه ترسره نه کړي او نظام باثباته او تلپاتې نکړي، نو دوی به خدای او د تیرو شلو کلونو شهیدانو ته حساب ورکړي.